Chapter 259

यजुर्विधानं वक्ष्यामि भुक्तिमुक्तिप्रदं शृणु

yajurvidhānaṃ vakṣyāmi bhuktimuktipradaṃ śṛṇu

ओंकारपूर्विका राम महाव्याहृतयो मताः

oṃkārapūrvikā rāma mahāvyāhṛtayo matāḥ

सर्वकल्मषनाशिन्यः सर्वकामप्रदास् तथा

sarvakalmaṣanāśinyaḥ sarvakāmapradās tathā

आज्याहुतिसहस्रेण देवानाराधयेद्बुधः

ājyāhutisahasreṇa devānārādhayedbudhaḥ

मनसः काङ्क्षितं राम मनसेप्सितकामदं

manasaḥ kāṅkṣitaṃ rāma manasepsitakāmadaṃ

शान्तिकामो यवैः कुर्यात्तिलैः पापापनुत्तये

śāntikāmo yavaiḥ kuryāttilaiḥ pāpāpanuttaye

धान्यैः सिद्धार्थकैश् चैव सर्वकाम करैस् तथा

dhānyaiḥ siddhārthakaiś caiva sarvakāma karais tathā

औदुम्बरीभिरिध्माभिः पसुकामस्य शस्यते

audumbarībhiridhmābhiḥ pasukāmasya śasyate

दध्ना चैवान्नकामस्य पयसा शान्तिमिच्छतः

dadhnā caivānnakāmasya payasā śāntimicchataḥ

अपामार्गसमिद्धस्तु कामयन् कनकं बहु

apāmārgasamiddhastu kāmayan kanakaṃ bahu

कन्याकामो घृताक्तानि युग्मशो ग्रथितानि तु

kanyākāmo ghṛtāktāni yugmaśo grathitāni tu

जातीपुष्पाणि जुहुयाद्ग्रामार्थी तिलतण्डुलान्

jātīpuṣpāṇi juhuyādgrāmārthī tilataṇḍulān

वश्यकर्मणि शाखोढवासापामार्गमेव च

vaśyakarmaṇi śākhoḍhavāsāpāmārgameva ca

विषासृङ्मिश्रसमिधो व्याधिघातस्य भार्गव

viṣāsṛṅmiśrasamidho vyādhighātasya bhārgava

क्रुद्धस्तु जुहुयात्सम्यक् शत्रूणां बधकाम्यया

kruddhastu juhuyātsamyak śatrūṇāṃ badhakāmyayā

सर्वव्रीहिमयीं कृत्वा राज्ञः प्रतिकृतिं द्विज

sarvavrīhimayīṃ kṛtvā rājñaḥ pratikṛtiṃ dvija

सहस्रशस्तु जुहुयाद्राजा वशगतो भवेत्

sahasraśastu juhuyādrājā vaśagato bhavet

वस्त्रकामस्य पुष्पाणि दर्वा व्याधिविनाशिनी

vastrakāmasya puṣpāṇi darvā vyādhivināśinī

ब्रह्मवर्चसकामस्य वासोग्रञ्च विधीयते

brahmavarcasakāmasya vāsograñca vidhīyate

प्रत्यङ्गिरेषु जुहुयात्तुषकण्टकभस्मभिः

pratyaṅgireṣu juhuyāttuṣakaṇṭakabhasmabhiḥ

विद्वेषणे च पक्ष्माणि काककौशिकयोस् तथा

vidveṣaṇe ca pakṣmāṇi kākakauśikayos tathā

कापिलञ्च घृतं हुत्वा तथा चन्द्रग्रहे द्विज

kāpilañca ghṛtaṃ hutvā tathā candragrahe dvija

वचाचूर्णेन सम्पातात्समानीय च तां वचां

vacācūrṇena sampātātsamānīya ca tāṃ vacāṃ

सहस्रमन्त्रितां भुक्त्वा मेधावी जायते नरः

sahasramantritāṃ bhuktvā medhāvī jāyate naraḥ

एकादशाङ्गुलं शङ्कु लौहं खादिरमेव च

ekādaśāṅgulaṃ śaṅku lauhaṃ khādirameva ca

द्विषतो बधोसीति जपन्निखनेद्रिपुवेश्मनि

dviṣato badhosīti japannikhanedripuveśmani

उच्चाटनमिदं कर्म शत्रूणां कथितं तव

uccāṭanamidaṃ karma śatrūṇāṃ kathitaṃ tava

चक्षुष्या इति जप्त्वा च विनष्टञ्चक्षुराप्नुयात्

cakṣuṣyā iti japtvā ca vinaṣṭañcakṣurāpnuyāt

उपयुञ्जत इत्य् एदनुवाकन्तथान्नदं

upayuñjata ity edanuvākantathānnadaṃ

तनूनपाग्ने सदिति दूर्वां हुत्वार्तिवर्जितः

tanūnapāgne saditi dūrvāṃ hutvārtivarjitaḥ

भेषजमसीति दध्याज्यैर् होमः पशूपसर्गनुत्

bheṣajamasīti dadhyājyair homaḥ paśūpasarganut

त्र्यम्वकं यजामहे होमः सौभाग्यवर्धनः

tryamvakaṃ yajāmahe homaḥ saubhāgyavardhanaḥ

कन्यानाम गृहीत्वा तु कन्यलाभकरः परः

kanyānāma gṛhītvā tu kanyalābhakaraḥ paraḥ

भयेषु तु जपन्नित्यं भयेभ्यो विप्रमुच्यते

bhayeṣu tu japannityaṃ bhayebhyo vipramucyate

धुस्तूरपुष्पं सघृतं हुत्वा स्यात् सर्वकामभाक्

dhustūrapuṣpaṃ saghṛtaṃ hutvā syāt sarvakāmabhāk

हुत्वा तु गुग्गुलं राम स्वप्ने पश्यति शङ्करं

hutvā tu guggulaṃ rāma svapne paśyati śaṅkaraṃ

युञ्जते मनो ऽनुवाकं जप्त्वा दीर्घायुराप्नुयात्

yuñjate mano 'nuvākaṃ japtvā dīrghāyurāpnuyāt

विष्णोरवाटमित्येतत् सर्वबाधाविनाशनं

viṣṇoravāṭamityetat sarvabādhāvināśanaṃ

रक्षोघ्नञ्च यशस्यञ्च तथैव विजयप्रदं

rakṣoghnañca yaśasyañca tathaiva vijayapradaṃ

अयत्नो अग्निरित्येतत् संग्रामे विजयप्रदं

ayatno agnirityetat saṃgrāme vijayapradaṃ

इदमापः प्रवहत स्नाने पापापनोदनं

idamāpaḥ pravahata snāne pāpāpanodanaṃ

विश्वकर्मन्नु हविषा सूचीं लौहीन्दशाङ्गुलाम्

viśvakarmannu haviṣā sūcīṃ lauhīndaśāṅgulām

कन्याया निखनेद्द्वारि सान्यस्मै न प्रदीयते

kanyāyā nikhaneddvāri sānyasmai na pradīyate

देव सवितरेतेन जुहुयाद्बलकामो द्विजोत्तम

deva savitaretena juhuyādbalakāmo dvijottama

अग्नौ स्वाहेति जुहुयाद्बलकामो द्विजोत्तम

agnau svāheti juhuyādbalakāmo dvijottama

तिलैर् यवैश् च धर्मज्ञ तथापामार्गतण्डुलैः

tilair yavaiś ca dharmajña tathāpāmārgataṇḍulaiḥ

सहस्रमन्त्रितां कृत्वा तथा गोरोचनां द्विज

sahasramantritāṃ kṛtvā tathā gorocanāṃ dvija

तिलकञ्च तथा कृत्वा जनस्य प्रियतामियात्

tilakañca tathā kṛtvā janasya priyatāmiyāt

रुद्राणाञ्च तथा जप्यं सर्वाघविनिसूदनं

rudrāṇāñca tathā japyaṃ sarvāghavinisūdanaṃ

सर्वकर्मकरो होमस् तथा सर्वत्र शन्तिदः

sarvakarmakaro homas tathā sarvatra śantidaḥ

अजाविकानामश्वानां कुञ्जराणां तथा गवां

ajāvikānāmaśvānāṃ kuñjarāṇāṃ tathā gavāṃ

मनुष्याणान्नरेन्द्राणां बालानां योषितामपि

manuṣyāṇānnarendrāṇāṃ bālānāṃ yoṣitāmapi

ग्रामाणां नगरानाञ्च देशानामपि भार्गव

grāmāṇāṃ nagarānāñca deśānāmapi bhārgava

उपद्रुतानां धर्मज्ञ व्याधितानां तथैव च

upadrutānāṃ dharmajña vyādhitānāṃ tathaiva ca

मरके समनुप्राप्ते रिपुजे च तथा भये

marake samanuprāpte ripuje ca tathā bhaye

रुद्रहोमः परा शान्तिः पायसेन घृतेन च

rudrahomaḥ parā śāntiḥ pāyasena ghṛtena ca

कुष्माण्डघृतहोमेन सर्वान् पापान् व्यपोहति

kuṣmāṇḍaghṛtahomena sarvān pāpān vyapohati

शक्तुयावकभैक्षाशी नक्तं मनुजसत्तम

śaktuyāvakabhaikṣāśī naktaṃ manujasattama

बहिःस्नानरतो मासान्मुच्यते ब्रह्महत्यया

bahiḥsnānarato māsānmucyate brahmahatyayā

मधुवातेति मन्त्रेण होमादितो ऽखिलं लभेत्

madhuvāteti mantreṇa homādito 'khilaṃ labhet

दधि क्राव्नेति हुत्वा तु पुत्रान् प्राप्नोत्यसंशयं

dadhi krāvneti hutvā tu putrān prāpnotyasaṃśayaṃ

तथा घृतवतीत्येतदायुष्यं स्यात् घृतेन तु

tathā ghṛtavatītyetadāyuṣyaṃ syāt ghṛtena tu

स्वस्तिन इन्द्र इत्य् एतत्सर्वबाधाविनाशनं

svastina indra ity etatsarvabādhāvināśanaṃ

इह गावः प्रज्यायध्वमिति पुष्टिविवर्धनम्

iha gāvaḥ prajyāyadhvamiti puṣṭivivardhanam

घृताहुतिसहस्रेण तथा लक्ष्मीविनाशनं

ghṛtāhutisahasreṇa tathā lakṣmīvināśanaṃ

श्रुवेण देवस्य त्वेति हुत्वापामार्गतण्डुलं

śruveṇa devasya tveti hutvāpāmārgataṇḍulaṃ

मुच्यते विकृताच्छीघ्रमभिचारान्न संशयः

mucyate vikṛtācchīghramabhicārānna saṃśayaḥ

रुद्र पातु पलशस्य समिद्भिः कनकं लभेत्

rudra pātu palaśasya samidbhiḥ kanakaṃ labhet

शिवो भवेत्यग्न्युत्पाते व्रीहिभिर्जुहुयान्नरः

śivo bhavetyagnyutpāte vrīhibhirjuhuyānnaraḥ

याः सेना इति चैतच्च तस्करेभ्यो भयापहम्

yāḥ senā iti caitacca taskarebhyo bhayāpaham

यो अस्मभ्यमवातीयाद्धुत्वा कृष्णतिलान्नरः

yo asmabhyamavātīyāddhutvā kṛṣṇatilānnaraḥ

सहस्रशो ऽभिचाराच्च मुच्यते विकृताद्द्विज

sahasraśo 'bhicārācca mucyate vikṛtāddvija

अन्नेनान्नपतेत्येवं हुत्वा चान्नमवाप्नुयात्

annenānnapatetyevaṃ hutvā cānnamavāpnuyāt

हंसः शुचिः सदित्येतज्जप्तन्तोये ऽघनाशनं

haṃsaḥ śuciḥ sadityetajjaptantoye 'ghanāśanaṃ

चत्वारि भङ्गेत्येतत्तु सर्वपापहरं जले

catvāri bhaṅgetyetattu sarvapāpaharaṃ jale

देवा यज्ञेति जप्त्वा तु ब्रह्मलोके महीयते

devā yajñeti japtvā tu brahmaloke mahīyate

वसन्तेति च हुत्वाज्यं आदित्याद्वरमाप्नुयात्

vasanteti ca hutvājyaṃ ādityādvaramāpnuyāt

सुपर्णोसीति चेत्यस्य कर्मव्याहृतिवद्भवेत्

suparṇosīti cetyasya karmavyāhṛtivadbhavet

नमः स्वाहेति त्रिर्जप्त्वा बन्धनान्मोक्षमाप्नुयात्

namaḥ svāheti trirjaptvā bandhanānmokṣamāpnuyāt

अन्तर्जले त्रिरावर्त्य द्रुपदा सर्वपापमुक्

antarjale trirāvartya drupadā sarvapāpamuk

इह गावः प्रजायध्वं मन्त्रोयं बुद्धिवर्धनः

iha gāvaḥ prajāyadhvaṃ mantroyaṃ buddhivardhanaḥ

हुतन्तु सर्पिषा दध्ना पयसा पायसेन वा

hutantu sarpiṣā dadhnā payasā pāyasena vā

शतम् य इति चैतेन हुत्वा पर्णफलाणि च

śatam ya iti caitena hutvā parṇaphalāṇi ca

आरोग्यं श्रियमाप्नोति जीवितञ्च चिरन्तथा

ārogyaṃ śriyamāpnoti jīvitañca cirantathā

ओषधीः प्रतिमोदग्ध्वं वपने लवने ऽर्थकृत्

oṣadhīḥ pratimodagdhvaṃ vapane lavane 'rthakṛt

अश्वावती पायसेन होमाच्छान्तिमवाप्नुयात्

aśvāvatī pāyasena homācchāntimavāpnuyāt

तस्मा इति च मन्त्रेन बन्धनस्थो विमुच्यते

tasmā iti ca mantrena bandhanastho vimucyate

युवा सुवासा इत्य् एव वासांस्याप्नोति चोत्तमम्

yuvā suvāsā ity eva vāsāṃsyāpnoti cottamam

मुञ्चन्तु मा शपथ्यानि सर्वान्तकविनाशनम्

muñcantu mā śapathyāni sarvāntakavināśanam

मा माहिंसीस्तिलाज्येन हुतं रिपुविनाशनं

mā māhiṃsīstilājyena hutaṃ ripuvināśanaṃ

नमो ऽस्तु सर्वसर्पेभ्यो घृतेन पायसेन तु

namo 'stu sarvasarpebhyo ghṛtena pāyasena tu

कृणुधवं राज इत्य् एतदभिचारविनाशनं

kṛṇudhavaṃ rāja ity etadabhicāravināśanaṃ

दूर्वाकाण्डायुतं हुत्वा काण्डात् काण्डेति मानवः

dūrvākāṇḍāyutaṃ hutvā kāṇḍāt kāṇḍeti mānavaḥ

ग्रामे जनपदे वापि मरकन्तु शमन्नयेत्

grāme janapade vāpi marakantu śamannayet

रोगार्तो मुच्यते रोगात् तथा दुःखात्तु दुःखितः

rogārto mucyate rogāt tathā duḥkhāttu duḥkhitaḥ

औडुम्बरीश् च समिधो मधुमान्नो वनस्पतिः

auḍumbarīś ca samidho madhumānno vanaspatiḥ

हुत्वा सहस्रशो राम धनमाप्नोति मानवः

hutvā sahasraśo rāma dhanamāpnoti mānavaḥ

सौभाग्यं महदाप्नोति व्यवहारे तथा त्रयम्

saubhāgyaṃ mahadāpnoti vyavahāre tathā trayam

अपां गर्भमिति हुत्वा देवं वर्षापयेद्ध्रुवम्

apāṃ garbhamiti hutvā devaṃ varṣāpayeddhruvam

अपः पिवेति च तथा हुत्वा दधि घृतं मधु

apaḥ piveti ca tathā hutvā dadhi ghṛtaṃ madhu

प्रवर्तयति धर्मज्ञ महावृष्टिमनन्तरं

pravartayati dharmajña mahāvṛṣṭimanantaraṃ

नमस्ते रुद्र इत्य् एतत् सर्वोपद्रवनाशनं

namaste rudra ity etat sarvopadravanāśanaṃ

सर्वशान्तिकरं प्रोक्तं महापातकनाशनं

sarvaśāntikaraṃ proktaṃ mahāpātakanāśanaṃ

अध्यवोचदित्यनेन रक्षणं व्याधितस्य तु

adhyavocadityanena rakṣaṇaṃ vyādhitasya tu

रक्षोघ्नञ्च यशस्यञ्च चिरायुःपुष्टिवर्धनम्

rakṣoghnañca yaśasyañca cirāyuḥpuṣṭivardhanam

सिद्धार्थकानां क्षेपेण पथि चैतज्जपन् सुखी

siddhārthakānāṃ kṣepeṇa pathi caitajjapan sukhī

असौ यस्ताम्र इत्य् एतत् पठन्नित्यं दिवाकरं

asau yastāmra ity etat paṭhannityaṃ divākaraṃ

उपतिष्ठेत धर्मज्ञ सायं प्रातरतन्द्रितः

upatiṣṭheta dharmajña sāyaṃ prātaratandritaḥ

अन्नमक्षयमाप्नोति दीर्घमायुश् च विन्दति

annamakṣayamāpnoti dīrghamāyuś ca vindati

प्रमुञ्च धन्वन्नित्येतत् षड्भिरायुधमन्त्रणं

pramuñca dhanvannityetat ṣaḍbhirāyudhamantraṇaṃ

रिपूणां भयदं युद्धेनात्रकार्या विचारणा

ripūṇāṃ bhayadaṃ yuddhenātrakāryā vicāraṇā

मानो महान्त इत्य् एवं बालानां शान्तिकारकं

māno mahānta ity evaṃ bālānāṃ śāntikārakaṃ

नमो हिरण्यवाहवे इत्य् अनुवाकसप्तकम्

namo hiraṇyavāhave ity anuvākasaptakam

राजिकां कटुतैलाक्तां जुहुयाच्छत्रुनाशनीं

rājikāṃ kaṭutailāktāṃ juhuyācchatrunāśanīṃ

नमो वः किरिकेभ्यश् च पद्मलक्षाहुतैर् नरः

namo vaḥ kirikebhyaś ca padmalakṣāhutair naraḥ

राज्यलक्ष्मीमवाप्नोति तथा बिल्वैः सुवर्णकम्

rājyalakṣmīmavāpnoti tathā bilvaiḥ suvarṇakam

इमा रुद्रायेति तिलैर् होमाच्च धनमाप्यते

imā rudrāyeti tilair homācca dhanamāpyate

दूर्वाहोमेन चान्येन सर्वव्याधिविवर्जितः

dūrvāhomena cānyena sarvavyādhivivarjitaḥ

आशुः शिशान इत्य् एतदायुधानाञ्च रक्षणे

āśuḥ śiśāna ity etadāyudhānāñca rakṣaṇe

संग्रामे कथितं राम सर्वशत्रुनिवर्हणं

saṃgrāme kathitaṃ rāma sarvaśatrunivarhaṇaṃ

राजसामेति जुहुयात् सहस्रं पञ्चभिर्द्विज

rājasāmeti juhuyāt sahasraṃ pañcabhirdvija

आज्याहुतीनां धर्मज्ञ चक्षूरोगाद्विमुच्यते

ājyāhutīnāṃ dharmajña cakṣūrogādvimucyate

शन्नो वनस्पते गेहे होमः स्याद्वास्तुदोषनुत्

śanno vanaspate gehe homaḥ syādvāstudoṣanut

अग्न आयूंसि हुत्वाज्यं द्वेषं नाप्नोति केनचित्

agna āyūṃsi hutvājyaṃ dveṣaṃ nāpnoti kenacit

अपां फेनेति लाजाभिर्हुत्वा जयमवाप्नुयात्

apāṃ pheneti lājābhirhutvā jayamavāpnuyāt

भद्रा इतीन्द्रियैर् हीनो जपन् स्यात् सकलेन्द्रियः

bhadrā itīndriyair hīno japan syāt sakalendriyaḥ

अग्निश् च पृथिवी चेति वशीकरणमुत्तमम्

agniś ca pṛthivī ceti vaśīkaraṇamuttamam

अध्वनेति जपन् मन्त्रं व्यवहारे जयी भवेत्

adhvaneti japan mantraṃ vyavahāre jayī bhavet

ब्रह्म राजन्यमिति च कर्मारम्भे तु सिद्धिकृत्

brahma rājanyamiti ca karmārambhe tu siddhikṛt

संवत्सरोसीति धृतैर् लक्षहोमादरोगवान्

saṃvatsarosīti dhṛtair lakṣahomādarogavān

केतुं कृण्वन्नितीत्येतत् संग्रामे जयवर्धनम्

ketuṃ kṛṇvannitītyetat saṃgrāme jayavardhanam

इन्द्रोग्निर्धर्म इत्य् एतद्रणे धर्मनिबन्धनम्

indrognirdharma ity etadraṇe dharmanibandhanam

धन्वा नागेति मन्त्रश् च धनुर्ग्राहनिकः परः

dhanvā nāgeti mantraś ca dhanurgrāhanikaḥ paraḥ

यजीतेति तथा मन्त्रो विज्ञेयो ह्य् अभिमन्त्रणे

yajīteti tathā mantro vijñeyo hy abhimantraṇe

मन्त्रश्चाहिरथेत्येतच्छराणां मन्त्रणे भवेत्

mantraścāhirathetyetaccharāṇāṃ mantraṇe bhavet

वह्नीनां पितरित्येतत्तूर्णमन्त्रः प्रकीर्तितः

vahnīnāṃ pitarityetattūrṇamantraḥ prakīrtitaḥ

युञ्जन्तीति तथाश्वानां योजने मन्त्र उच्यते

yuñjantīti tathāśvānāṃ yojane mantra ucyate

आशुः शिशान इत्य् एतद्यत्रारम्भणमुच्यते

āśuḥ śiśāna ity etadyatrārambhaṇamucyate

विष्णोः क्रमेति मन्त्रश् च रथारोहणिकः परः

viṣṇoḥ krameti mantraś ca rathārohaṇikaḥ paraḥ

आजङ्घेतीति चाश्वानां ताडनीयमुदाहृतं

ājaṅghetīti cāśvānāṃ tāḍanīyamudāhṛtaṃ

याः सेना अभित्वरीति परसैन्यमुखे जपेत्

yāḥ senā abhitvarīti parasainyamukhe japet

दुन्दुभ्य इति चाप्येतद्दुन्दुभीताड्नं भवेत्

dundubhya iti cāpyetaddundubhītāḍnaṃ bhavet

एतैः पूर्वहुतैर् मन्त्रैः कृत्वैवं विजयी भवेत्

etaiḥ pūrvahutair mantraiḥ kṛtvaivaṃ vijayī bhavet

यमेन दत्तमित्यस्य कोटिहोमाद्विचक्षणः

yamena dattamityasya koṭihomādvicakṣaṇaḥ

रथमुत्पादयेच्छीघ्रं संग्रामे विजयप्रदम्

rathamutpādayecchīghraṃ saṃgrāme vijayapradam

आ कृष्णेति तथैतस्य कर्मव्याहृतिवद्भवेत्

ā kṛṣṇeti tathaitasya karmavyāhṛtivadbhavet

शिवसंकल्पजापेन समाधिं मनसो लभेत्

śivasaṃkalpajāpena samādhiṃ manaso labhet

पञ्चनद्यः पञ्चलक्षं हुत्वा लक्ष्मीमवाप्नुयात्

pañcanadyaḥ pañcalakṣaṃ hutvā lakṣmīmavāpnuyāt

यदा बधून्दक्षायणां मन्त्रेणानेन मन्त्रितम्

yadā badhūndakṣāyaṇāṃ mantreṇānena mantritam

सहस्रकृत्वः कनकं धारयेद्रिपुवारणं

sahasrakṛtvaḥ kanakaṃ dhārayedripuvāraṇaṃ

इमं जीवेभ्य द्रति च शिलां लोष्ट्रञ्चतुर्दिशं

imaṃ jīvebhya drati ca śilāṃ loṣṭrañcaturdiśaṃ

क्षिपेद्गृहे तदा तस्य न स्याच्चौरभयं निशि

kṣipedgṛhe tadā tasya na syāccaurabhayaṃ niśi

परिमेगामनेनेति वशीकरणमुत्तमं

parimegāmaneneti vaśīkaraṇamuttamaṃ

हन्तुमभ्यागतस्तत्र वशीभवति मानवः

hantumabhyāgatastatra vaśībhavati mānavaḥ

भक्ष्यताम्वूलपुष्पाद्यं मन्त्रितन्तु प्रयच्छति

bhakṣyatāmvūlapuṣpādyaṃ mantritantu prayacchati

यस्य धर्मज्ञ वशगः सोम्य शीघ्रं भविष्यति

yasya dharmajña vaśagaḥ somya śīghraṃ bhaviṣyati

शन्नो मित्र इतीत्येतत् सदा सर्वत्र शान्तिदं

śanno mitra itītyetat sadā sarvatra śāntidaṃ

गणानां त्वा गणपतिं कृत्वा होमञ्चतुष्पथे

gaṇānāṃ tvā gaṇapatiṃ kṛtvā homañcatuṣpathe

वशीकुर्याज्जगत्सर्वम् सर्वधान्यैर् असंशयम्

vaśīkuryājjagatsarvam sarvadhānyair asaṃśayam

हिरण्यवर्णाः शुचयो मन्त्रोयमभिषेचने

hiraṇyavarṇāḥ śucayo mantroyamabhiṣecane

शन्नो देवीरभिष्टये तथा शान्तिकरः परः

śanno devīrabhiṣṭaye tathā śāntikaraḥ paraḥ

एकचक्रेति मन्त्रेण हुतेनाज्येन भागशः

ekacakreti mantreṇa hutenājyena bhāgaśaḥ

ग्रहेभ्यः शान्तिमाप्नोति प्रसादं न च संशयः

grahebhyaḥ śāntimāpnoti prasādaṃ na ca saṃśayaḥ

गावो भग इति द्वाभ्यां हुत्वाज्यङ्गा अवाप्नुयात्

gāvo bhaga iti dvābhyāṃ hutvājyaṅgā avāpnuyāt

प्रवादांशः सोपदिति गृहयज्ञे विधीयते

pravādāṃśaḥ sopaditi gṛhayajñe vidhīyate

देवेभ्यो वनस्पत इति द्रुमयज्ञे विधीयते

devebhyo vanaspata iti drumayajñe vidhīyate

गायत्री वैष्णवी ज्ञेया तद्विष्णोः परमम्पदं

gāyatrī vaiṣṇavī jñeyā tadviṣṇoḥ paramampadaṃ

सर्वपापप्रशमनं सर्वकामकरन्तथा

sarvapāpapraśamanaṃ sarvakāmakarantathā