अथ षट्षष्ठ्यधिकद्विशततमो ऽध्यायः
atha ṣaṭṣaṣṭhyadhikadviśatatamo 'dhyāyaḥ
माहेश्वरस्नानलक्षकोटिहोमादयः
māheśvarasnānalakṣakoṭihomādayaḥ
पुष्कर उवाच
puṣkara uvāca
स्नानं माहेश्वरं वक्ष्ये राजादेर्जयवर्धनम्
snānaṃ māheśvaraṃ vakṣye rājāderjayavardhanam
दानवेन्द्राय बलये यज्जगादोशनाः पुरा
dānavendrāya balaye yajjagādośanāḥ purā
भास्करे ऽनुदिते पीठे प्रातः संस्नापयेद् घटैः
bhāskare 'nudite pīṭhe prātaḥ saṃsnāpayed ghaṭaiḥ
ओं नमो भगवते रुद्राय च बलाय च पाण्डरोचितभस्मानुलिप्तगात्राय । तद्यथा जय जय सर्वान् शत्रून्मूकस्य कलहविग्रहविवादेषु भञ्जय । ओं मथ मथ सर्वपथिकान्योसौ युगान्तकाले दिधक्षति इमां पूजां रौद्रमूर्तिः सहस्रांशुः शुक्रः स ते रक्षतु जीवितं । सम्बर्तकाग्नितुल्यश् च त्रिपुरान्तकरः शिवः । सर्वदेवमयः सोपि तव रक्षतु जीवितं लिखि लिखि खिलि स्वाहा ॥
oṃ namo bhagavate rudrāya ca balāya ca pāṇḍarocitabhasmānuliptagātrāya / tadyathā jaya jaya sarvān śatrūnmūkasya kalahavigrahavivādeṣu bhañjaya / oṃ matha matha sarvapathikānyosau yugāntakāle didhakṣati imāṃ pūjāṃ raudramūrtiḥ sahasrāṃśuḥ śukraḥ sa te rakṣatu jīvitaṃ / sambartakāgnitulyaś ca tripurāntakaraḥ śivaḥ / sarvadevamayaḥ sopi tava rakṣatu jīvitaṃ likhi likhi khili svāhā ||
एवं स्नतस्तु मन्त्रेण जुहुयात्तिलतण्डुलम्
evaṃ snatastu mantreṇa juhuyāttilataṇḍulam
पञ्चामृतैस्तु संस्नाप्य पूजयेच्छूलपाणिनं
pañcāmṛtaistu saṃsnāpya pūjayecchūlapāṇinaṃ
स्नानान्यन्यानि वक्ष्यामि सर्वदा विजयाय ते
snānānyanyāni vakṣyāmi sarvadā vijayāya te
स्नानं घृतेन कथितमायुष्यवर्धनं परम्
snānaṃ ghṛtena kathitamāyuṣyavardhanaṃ param
गोमयेन च लक्ष्मीः स्याद्गोमूत्रेणाघमर्दनम्
gomayena ca lakṣmīḥ syādgomūtreṇāghamardanam
क्षीरेण बलबुद्धिः स्याद्दध्ना लक्ष्मीविवर्धनं
kṣīreṇa balabuddhiḥ syāddadhnā lakṣmīvivardhanaṃ
कुशोदकेन पापान्तः पञ्चगव्येन सर्वभाक्
kuśodakena pāpāntaḥ pañcagavyena sarvabhāk
शतमूलेन सर्वाप्तिर्गोशृङ्गोदकतो ऽघजित्
śatamūlena sarvāptirgośṛṅgodakato 'ghajit
पलाशबिल्वकमलकुशस्नानन्तु सर्वदं
palāśabilvakamalakuśasnānantu sarvadaṃ
वचा हरिद्रे द्वे मुस्तं स्नानं रक्षोहणं परं
vacā haridre dve mustaṃ snānaṃ rakṣohaṇaṃ paraṃ
आयुष्यञ्च यशस्यञ्च धर्ममेधाविवर्धनम्
āyuṣyañca yaśasyañca dharmamedhāvivardhanam
हैमाद्भिश् चैव माङ्गल्यं रूप्यताम्रोदकैस् तथा
haimādbhiś caiva māṅgalyaṃ rūpyatāmrodakais tathā
रत्नोदकैस्तु विजयः सौभाग्यं सर्वगन्धकैः
ratnodakaistu vijayaḥ saubhāgyaṃ sarvagandhakaiḥ
फलाद्भिश् च तथारोग्यं धात्र्यद्भिः परमां श्रियम्
phalādbhiś ca tathārogyaṃ dhātryadbhiḥ paramāṃ śriyam
तिलसिद्धार्थकैर् लक्ष्मीः सौभाग्यञ्च प्रियङ्गुणा
tilasiddhārthakair lakṣmīḥ saubhāgyañca priyaṅguṇā
पद्मोत्पलकदम्बैश् च श्रीर्बलं बलाद्रुमोदकैः
padmotpalakadambaiś ca śrīrbalaṃ balādrumodakaiḥ
विष्णुपादोदकस्नानं सर्वस्नानेभ्य उत्तमम्
viṣṇupādodakasnānaṃ sarvasnānebhya uttamam
एकाकी एककामायेत्येकोर्कं विधिवच्चरेत्
ekākī ekakāmāyetyekorkaṃ vidhivaccaret
अक्रन्दयतिसूक्तेन प्रबध्नीयान्मणिं करे
akrandayatisūktena prabadhnīyānmaṇiṃ kare
कुष्ठपाठा वाचा शुण्ठी शङ्खलोहादिको मणिः
kuṣṭhapāṭhā vācā śuṇṭhī śaṅkhalohādiko maṇiḥ
सर्वेषामेवकामानामीश्वरो भगवान् हरिः
sarveṣāmevakāmānāmīśvaro bhagavān hariḥ
तस्य संपूजनादेव सर्वान्कामान्समश्नुते
tasya saṃpūjanādeva sarvānkāmānsamaśnute
स्नापयित्वा घृतक्षीरैः पूजयित्वा च पित्तहा
snāpayitvā ghṛtakṣīraiḥ pūjayitvā ca pittahā
पञ्चमुद्गबलिन्दत्वा अतिसारात् प्रमुच्यते
pañcamudgabalindatvā atisārāt pramucyate
पञ्चगव्येन संस्नाप्य वातव्याधिं विनाशयेत्
pañcagavyena saṃsnāpya vātavyādhiṃ vināśayet
द्विस्नेहस्नपनात् श्लेष्मरोगहा चातिपूजया
dvisnehasnapanāt śleṣmarogahā cātipūjayā
घृतं तैलं तथा क्षौद्रं स्नानन्तु त्रिरसं परं
ghṛtaṃ tailaṃ tathā kṣaudraṃ snānantu trirasaṃ paraṃ
स्नानं घृताम्बु द्विस्नेहं समलं घृततैलकम्
snānaṃ ghṛtāmbu dvisnehaṃ samalaṃ ghṛtatailakam
क्षौद्रमिक्षुरसं क्षीरं स्नानं त्रिमधुरं स्मृतम्
kṣaudramikṣurasaṃ kṣīraṃ snānaṃ trimadhuraṃ smṛtam
घृतमिशुरसं तैलं क्षौद्रञ्च त्रिरसं श्रिये
ghṛtamiśurasaṃ tailaṃ kṣaudrañca trirasaṃ śriye
:न् 1 यवकामायेत्येकोर्कमिति क.. , छ.. च :प् 473
:n 1 yavakāmāyetyekorkamiti ka.. , cha.. ca :p 473
अनुलेपस्त्रिशुक्रस्तु कर्पूरोशीरचन्दनैः
anulepastriśukrastu karpūrośīracandanaiḥ
चन्दनागुरुकर्पूरमृगदर्पैः सकुङ्कुमैः
candanāgurukarpūramṛgadarpaiḥ sakuṅkumaiḥ
पञ्चानुलेपनं विष्णोः सर्वकामफलप्रदं
pañcānulepanaṃ viṣṇoḥ sarvakāmaphalapradaṃ
त्रिसुगन्धञ्च कर्पूरं तथा चन्दनकुङ्कुमैः
trisugandhañca karpūraṃ tathā candanakuṅkumaiḥ
मृगदर्पं सकर्पूरं मलयं सर्वकामदम्
mṛgadarpaṃ sakarpūraṃ malayaṃ sarvakāmadam
जातीफलं सकर्पूरं चन्दनञ्च त्रिशीतकम्
jātīphalaṃ sakarpūraṃ candanañca triśītakam
पीतानि शुक्लवर्णानि तथा शुक्लानि भार्गव
pītāni śuklavarṇāni tathā śuklāni bhārgava
कृष्णानि चैव रक्तानि पञ्चवर्णानि निर्दिशेत्
kṛṣṇāni caiva raktāni pañcavarṇāni nirdiśet
उत्पलं पद्मजाती च त्रिशीतं हरिपूजने
utpalaṃ padmajātī ca triśītaṃ haripūjane
कुङ्कुमं रक्तपद्मानि त्रिरक्तमुत्पलं
kuṅkumaṃ raktapadmāni triraktamutpalaṃ
धूपदीपादिभिः प्रार्च्य विष्णुं शान्तिर्भवेन्नृणां
dhūpadīpādibhiḥ prārcya viṣṇuṃ śāntirbhavennṛṇāṃ
चतुरस्रकरे कुण्डे ब्राह्मणाश्चाष्ट शोडश
caturasrakare kuṇḍe brāhmaṇāścāṣṭa śoḍaśa
लक्षहोमङ्कोटिहोमन्तिलाज्ययवधान्यकैः
lakṣahomaṅkoṭihomantilājyayavadhānyakaiḥ
ग्रहानभ्यर्च्य गायत्र्या सर्वशान्तिः क्रमाद्भवेत्
grahānabhyarcya gāyatryā sarvaśāntiḥ kramādbhavet
इत्य् आग्नेये महापुराणे महेश्वरस्नानलक्षकोटिहोमादयो नाम षट्षष्ट्यधिकद्विशततमो ऽध्यायः ॥
ity āgneye mahāpurāṇe maheśvarasnānalakṣakoṭihomādayo nāma ṣaṭṣaṣṭyadhikadviśatatamo 'dhyāyaḥ ||