Chapter 268

छत्रादिमन्त्रान्वक्ष्यामि यैस्तत् पूज्य जयादिकम्

chatrādimantrānvakṣyāmi yaistat pūjya jayādikam

ब्रह्मणः सत्यवाक्येन सोमस्य वरुणस्य च

brahmaṇaḥ satyavākyena somasya varuṇasya ca

सूर्यस्य च प्रभावेन वर्धस्व त्वं महामते

sūryasya ca prabhāvena vardhasva tvaṃ mahāmate

पाण्डराभप्रतीकाश हिमकुन्देन्दुसुप्रभ

pāṇḍarābhapratīkāśa himakundendusuprabha

यथाम्बुदश्छादयते शिवायैनां वसुन्धरां

yathāmbudaśchādayate śivāyaināṃ vasundharāṃ

तथाच्छादय राजानं विजयारोग्यवृद्धये

tathācchādaya rājānaṃ vijayārogyavṛddhaye

गन्धर्वकुलजातस्त्वं माभूयाः कुलदूषकः

gandharvakulajātastvaṃ mābhūyāḥ kuladūṣakaḥ

ब्रह्मणः सत्यवाक्येन सोमस्य वरुणस्य च

brahmaṇaḥ satyavākyena somasya varuṇasya ca

प्रभावाच्च हुताशस्य वर्धस्व त्वं तुरङ्गम

prabhāvācca hutāśasya vardhasva tvaṃ turaṅgama

तेजसा चैव सूर्यस्य मुनीनां तपसा तथा

tejasā caiva sūryasya munīnāṃ tapasā tathā

रुद्रस्य ब्रह्मचर्येण पवनस्य बलेन च

rudrasya brahmacaryeṇa pavanasya balena ca

स्मर त्वं राजपुत्रो ऽसि कौस्तुभन्तु मणिं स्मर

smara tvaṃ rājaputro 'si kaustubhantu maṇiṃ smara

यां गतिं ब्रह्महा गच्छेत् पितृहा मातृहा तथा

yāṃ gatiṃ brahmahā gacchet pitṛhā mātṛhā tathā

भूम्यर्थे ऽनृतवादी च क्षत्रियश् च पराङ्मुखः

bhūmyarthe 'nṛtavādī ca kṣatriyaś ca parāṅmukhaḥ

व्रजेस्त्वन्तां गतिं क्षिप्रं मा तत् पापं भवेत्तव

vrajestvantāṃ gatiṃ kṣipraṃ mā tat pāpaṃ bhavettava

विकृतिं मापगच्छेस्त्वं युद्धे ऽध्वनि तुरङ्गम

vikṛtiṃ māpagacchestvaṃ yuddhe 'dhvani turaṅgama

रिपून् विनिघ्नन्समरे सह भर्त्रा सुखी भव

ripūn vinighnansamare saha bhartrā sukhī bhava

शक्रकेतो महावीर्यः सुवर्णस्त्वामुपाश्रितः

śakraketo mahāvīryaḥ suvarṇastvāmupāśritaḥ

पतत्रिराड्वैनतेयस् तथा नारायणध्वजः

patatrirāḍvainateyas tathā nārāyaṇadhvajaḥ

काश्यपेयो ऽमृताहर्ता नागारिर्विष्णुवाहनः

kāśyapeyo 'mṛtāhartā nāgārirviṣṇuvāhanaḥ

अप्रमेयो दुराधर्षो रणे देवारिसूदनः

aprameyo durādharṣo raṇe devārisūdanaḥ

महाबलो मावेगो महाकायो ऽमृताशनः

mahābalo māvego mahākāyo 'mṛtāśanaḥ

गरुत्मान्मारुतगतिस्त्वयि सन्निहितः स्थितः

garutmānmārutagatistvayi sannihitaḥ sthitaḥ

विष्णुना देवदेवेन शक्रार्थं स्थापितो ह्य् असि

viṣṇunā devadevena śakrārthaṃ sthāpito hy asi

जयाय भव मे नित्यं वृद्धये ऽथ बलस्य च

jayāya bhava me nityaṃ vṛddhaye 'tha balasya ca

साश्ववर्मायुधान्योधान्रक्षास्माकं रिपून्दह

sāśvavarmāyudhānyodhānrakṣāsmākaṃ ripūndaha

कुमुदैरावणौ पद्मः पुष्पदन्तो ऽथ वामनः

kumudairāvaṇau padmaḥ puṣpadanto 'tha vāmanaḥ

सुप्रतीको ऽञ्जनो नील एते ऽष्टौ देवयोनयः

supratīko 'ñjano nīla ete 'ṣṭau devayonayaḥ

तेषां पुत्राश् च पौत्राश् च बलान्यष्टौ समाश्रिताः

teṣāṃ putrāś ca pautrāś ca balānyaṣṭau samāśritāḥ

भद्रो मन्दो मृगश् चैव गजः संकीर्ण एव च

bhadro mando mṛgaś caiva gajaḥ saṃkīrṇa eva ca

वने वने प्रसूतास्ते स्मरयोनिं महागजाः

vane vane prasūtāste smarayoniṃ mahāgajāḥ

पान्तु त्वां वसवो रुद्रा आदित्याः समरुद्गणाः

pāntu tvāṃ vasavo rudrā ādityāḥ samarudgaṇāḥ

भर्तारं रक्ष नागेन्द्र समयः परिपाल्यतां

bhartāraṃ rakṣa nāgendra samayaḥ paripālyatāṃ

ऐरावताधिरूढस्तु वज्रहस्तः शतक्रतुः

airāvatādhirūḍhastu vajrahastaḥ śatakratuḥ

पृष्ठतो ऽनुगतस्त्वेष रक्षतु त्वां स देवराट्

pṛṣṭhato 'nugatastveṣa rakṣatu tvāṃ sa devarāṭ

अवाप्नुहि जयं युद्धे सुस्थश् चैव सदा व्रज

avāpnuhi jayaṃ yuddhe susthaś caiva sadā vraja

अवाप्नुहि बलञ्चैव ऐरावतसमं युधि

avāpnuhi balañcaiva airāvatasamaṃ yudhi

श्रीस्ते सोमाद्बलं विष्णोस्तेजः सूर्याज्जवो ऽनिलात्

śrīste somādbalaṃ viṣṇostejaḥ sūryājjavo 'nilāt

स्थैर्यं गिरेर्जयं रुद्राद्यशो देवात् पुरन्दरात्

sthairyaṃ girerjayaṃ rudrādyaśo devāt purandarāt

युद्धे रक्षन्तु नागास्त्वां दिशश् च सह दैवतैः

yuddhe rakṣantu nāgāstvāṃ diśaś ca saha daivataiḥ

अश्विनौ सह गन्धर्वैः पान्तु त्वां सर्वतो दिशः

aśvinau saha gandharvaiḥ pāntu tvāṃ sarvato diśaḥ

मन्वो वसवो रुद्रा वायुः सोमो महर्षयः

manvo vasavo rudrā vāyuḥ somo maharṣayaḥ

नागकिन्नरगन्धर्वयक्षभूतगणा ग्रहाः

nāgakinnaragandharvayakṣabhūtagaṇā grahāḥ

प्रमथास्तु सहादित्यैर् भूतेशो मातृभिः सह

pramathāstu sahādityair bhūteśo mātṛbhiḥ saha

शक्रः सेनापतिः स्कन्दो वरुणश्चाश्रितस्त्वयि

śakraḥ senāpatiḥ skando varuṇaścāśritastvayi

प्रदहन्तु रिपून् सर्वान् राजा विजयमृच्छतु

pradahantu ripūn sarvān rājā vijayamṛcchatu

यानि प्रयुक्तान्यरिभिर्भूषणानि समन्ततः

yāni prayuktānyaribhirbhūṣaṇāni samantataḥ

पतन्तु तव शत्रूणां हतानि तव तेजसा

patantu tava śatrūṇāṃ hatāni tava tejasā

कालनेमिबधे यद्वत् युद्धे त्रिपुरघातने

kālanemibadhe yadvat yuddhe tripuraghātane

हिरण्यकशिपोर्युद्धे बधे सर्वासुरेषु च

hiraṇyakaśiporyuddhe badhe sarvāsureṣu ca

शोभितासि तथैवाद्य शोभस्व समयं स्मर

śobhitāsi tathaivādya śobhasva samayaṃ smara

नीलस्वेतामिमान्दृष्ट्वा नश्यन्त्वाशु नृपारयः

nīlasvetāmimāndṛṣṭvā naśyantvāśu nṛpārayaḥ

व्याधिभिर्विविधैर् घोरैः शस्त्रैश् च युधि निर्जिताः

vyādhibhirvividhair ghoraiḥ śastraiś ca yudhi nirjitāḥ

पूतना रेवती लेखा कालरात्रीति पठ्यते

pūtanā revatī lekhā kālarātrīti paṭhyate

दहन्त्वाशु रिपून् सर्वान्पताके त्वामुपाश्रिताः

dahantvāśu ripūn sarvānpatāke tvāmupāśritāḥ

सर्वमेधे महायज्ञे देवदेवेन शूलिना

sarvamedhe mahāyajñe devadevena śūlinā

शर्वेण जगतश् चैव सारेण त्वं विनिर्मितः

śarveṇa jagataś caiva sāreṇa tvaṃ vinirmitaḥ

नन्दकस्यापरां मूर्तिं स्मर शत्रुनिवर्हण

nandakasyāparāṃ mūrtiṃ smara śatrunivarhaṇa

नीलोत्पलदलश्याम कृष्ण दुःस्वप्ननाशन

nīlotpaladalaśyāma kṛṣṇa duḥsvapnanāśana

असिर्विशसनः खड्गस्तीक्ष्णधारो दुरासदः

asirviśasanaḥ khaḍgastīkṣṇadhāro durāsadaḥ

औगर्भो विजयश् चैव धर्मपालस्तथैव च

augarbho vijayaś caiva dharmapālastathaiva ca

इत्यष्टौ तव नामानि पुरोक्तानि स्वयम्भुवा

ityaṣṭau tava nāmāni puroktāni svayambhuvā

नक्षत्रं कृत्तिका तुभ्यं गुरुर्देवो महेश्वरः

nakṣatraṃ kṛttikā tubhyaṃ gururdevo maheśvaraḥ

हिरण्यञ्च शरीरन्ते दैवतन्ते जनार्दनः

hiraṇyañca śarīrante daivatante janārdanaḥ

राजानं रक्ष निस्त्रिंश सबलं सपुरन्तथा

rājānaṃ rakṣa nistriṃśa sabalaṃ sapurantathā

पिता पितामहो देवः स त्वं पालय सर्वदा

pitā pitāmaho devaḥ sa tvaṃ pālaya sarvadā

शर्मप्रदस्त्वं समरे वर्मन् सैन्ये यशो ऽद्य मे

śarmapradastvaṃ samare varman sainye yaśo 'dya me

रक्ष मां रक्षणीयो ऽहन्तवानघ नमो ऽस्तु ते

rakṣa māṃ rakṣaṇīyo 'hantavānagha namo 'stu te

दुन्दुभे त्वं सपत्नानां घोषाद्धृदयकम्पनः

dundubhe tvaṃ sapatnānāṃ ghoṣāddhṛdayakampanaḥ

भव भूमिसैन्यानां यथा विजयवर्धनः

bhava bhūmisainyānāṃ yathā vijayavardhanaḥ

यथा जीमूतघोषेण हृष्यन्ति वरवारणाः

yathā jīmūtaghoṣeṇa hṛṣyanti varavāraṇāḥ

तथास्तु तव शब्देन हर्षो ऽस्माकं मुदावह

tathāstu tava śabdena harṣo 'smākaṃ mudāvaha

यथा जीमूतशब्देन स्त्रीणां त्रासो ऽभिजायते

yathā jīmūtaśabdena strīṇāṃ trāso 'bhijāyate

तथा तु तव शब्देन त्रस्यन्त्वस्मद्द्विषो रणे

tathā tu tava śabdena trasyantvasmaddviṣo raṇe

मन्त्रैः सदार्चनीयास्ते योजनीया जयादिषु

mantraiḥ sadārcanīyāste yojanīyā jayādiṣu

घृतकम्बलविष्णादेस्त्वभिषेकञ्च वत्सरे

ghṛtakambalaviṣṇādestvabhiṣekañca vatsare

राज्ञो ऽभिषेकः कर्तव्यो दैवज्ञेन पुरोधसा ॥39

rājño 'bhiṣekaḥ kartavyo daivajñena purodhasā //39