अथ त्र्यशीत्यधिकद्विशततमो ऽध्यायः
atha tryaśītyadhikadviśatatamo 'dhyāyaḥ
मन्त्ररूपौषधकथनं
mantrarūpauṣadhakathanaṃ
धन्वन्तरिर् उवाच
dhanvantarir uvāca
आयुरारोग्यकर्तर ओंकारद्याश् च नाकदाः
āyurārogyakartara oṃkāradyāś ca nākadāḥ
ओंकारः परमो मन्त्रस्तं जप्त्वा चामरो भवेत्
oṃkāraḥ paramo mantrastaṃ japtvā cāmaro bhavet
गायत्री परमो मन्त्रस्तं जप्त्वा भुक्तिमुक्तिभाक्
gāyatrī paramo mantrastaṃ japtvā bhuktimuktibhāk
ओं नमो नारायणाय मन्त्रः सर्वार्थसाधकः
oṃ namo nārāyaṇāya mantraḥ sarvārthasādhakaḥ
ओं नमो भगवते वासुदेवाय सर्वदः
oṃ namo bhagavate vāsudevāya sarvadaḥ
ओं हूं नमो विष्णवे मन्त्रोयञ्चौषधं परं
oṃ hūṃ namo viṣṇave mantroyañcauṣadhaṃ paraṃ
अनेन देवा ह्य् असुराः सश्रियो निरुजो ऽभवत्
anena devā hy asurāḥ saśriyo nirujo 'bhavat
भूतानामुपकारश् च तथा धर्मो महौषधम्
bhūtānāmupakāraś ca tathā dharmo mahauṣadham
धर्मः सद्धर्मकृद्धर्मी एतैर् धर्मैश् च निर्मलः
dharmaḥ saddharmakṛddharmī etair dharmaiś ca nirmalaḥ
श्रीदः श्रीषः श्रीनिवासः श्रीधरःश्रीनिकेतनः
śrīdaḥ śrīṣaḥ śrīnivāsaḥ śrīdharaḥśrīniketanaḥ
श्रियः पतिः श्रीपरम एतैः श्रियमवाप्नुयात्
śriyaḥ patiḥ śrīparama etaiḥ śriyamavāpnuyāt
कामी कामप्रदः कामः कामपालस् तथा हरिः
kāmī kāmapradaḥ kāmaḥ kāmapālas tathā hariḥ
आनन्दो माधवश् चैव नाम कामाय वै हरेः
ānando mādhavaś caiva nāma kāmāya vai hareḥ
रामः परशुरामश् च नृसिंहो विष्णुरेव च
rāmaḥ paraśurāmaś ca nṛsiṃho viṣṇureva ca
त्रिविक्रमश् च नामानि जप्तव्यानि जिगीषुभिः
trivikramaś ca nāmāni japtavyāni jigīṣubhiḥ
विद्यामभ्यस्यतां नित्यं जप्तव्यः पुरुषोत्तमः
vidyāmabhyasyatāṃ nityaṃ japtavyaḥ puruṣottamaḥ
दामोदरो बन्धहरः पुष्कराक्षो ऽक्षिरोगनुत्
dāmodaro bandhaharaḥ puṣkarākṣo 'kṣiroganut
हृषीकेशो भयहरो जपेदौषधकर्मणि
hṛṣīkeśo bhayaharo japedauṣadhakarmaṇi
अच्युतञ्चामृतं मन्त्रं सङ्ग्रामे चापराजितः
acyutañcāmṛtaṃ mantraṃ saṅgrāme cāparājitaḥ
जलतारे नारसिंहं पूर्वादौ क्षेमकामवान्
jalatāre nārasiṃhaṃ pūrvādau kṣemakāmavān
चक्रिणङ्गदिनञ्चैव शार्ङ्गिणं खड्गिनं स्मरेत्
cakriṇaṅgadinañcaiva śārṅgiṇaṃ khaḍginaṃ smaret
नारायणं सर्वकाले नृसिंहो ऽखिलभीतिनुत्
nārāyaṇaṃ sarvakāle nṛsiṃho 'khilabhītinut
गरुडध्वजश् च विषहृत् वासुदेवं सदाजपेत्
garuḍadhvajaś ca viṣahṛt vāsudevaṃ sadājapet
धान्यादिस्थापने स्वप्ने अनन्ताच्युतमीरयेत्
dhānyādisthāpane svapne anantācyutamīrayet
नारायणञ्च दुःस्वप्ने दाहादौ जलशायिनं
nārāyaṇañca duḥsvapne dāhādau jalaśāyinaṃ
हयग्रीवञ्च विद्यार्थी जगत्सूतिं सुताप्तये
hayagrīvañca vidyārthī jagatsūtiṃ sutāptaye
बलभद्रं शौरकार्ये एकं नामार्थसाधकम्
balabhadraṃ śaurakārye ekaṃ nāmārthasādhakam
इत्य् आग्नेये महापुराणे मन्त्ररूपौषधकथनं नाम त्र्यशीत्यधिकद्विशततमो ऽध्यायः
ity āgneye mahāpurāṇe mantrarūpauṣadhakathanaṃ nāma tryaśītyadhikadviśatatamo 'dhyāyaḥ