Chapter 32

निर्वाणादिषु दीक्षासु चत्त्वारिंशत्तथाष्ट च

nirvāṇādiṣu dīkṣāsu cattvāriṃśattathāṣṭa ca

संस्कारान् कारयेद्धीमान् शृणुतान्यैः सुरो भवेत्

saṃskārān kārayeddhīmān śṛṇutānyaiḥ suro bhavet

गर्भाधानन्तु योन्यां वै ततः पुंसवनञ्चरेत्

garbhādhānantu yonyāṃ vai tataḥ puṃsavanañcaret

सीमन्तोन्नयनञ्चैव जातकर्म च नाम च

sīmantonnayanañcaiva jātakarma ca nāma ca

अन्नाशनं ततश्चूडा ब्रह्मचर्यव्रतानि च

annāśanaṃ tataścūḍā brahmacaryavratāni ca

चत्वारि वैष्णवी पार्थी भौतिकी श्रोत्रिकी तथा

catvāri vaiṣṇavī pārthī bhautikī śrotrikī tathā

गोदानं सूतकत्वञ्च पाकयज्ञाश् च सप्त ते

godānaṃ sūtakatvañca pākayajñāś ca sapta te

अष्टका पार्वणश्राद्धं श्रावण्यग्रायणीति च

aṣṭakā pārvaṇaśrāddhaṃ śrāvaṇyagrāyaṇīti ca

चैत्री चाश्वयुजी सप्त हविर्यज्ञांश् च तान् शृणु

caitrī cāśvayujī sapta haviryajñāṃś ca tān śṛṇu

आधानञ्चाग्निहोत्रञ्च दर्शो वै पौर्णमासकः

ādhānañcāgnihotrañca darśo vai paurṇamāsakaḥ

चातुर्मास्यं पशुबन्धः सौत्रामणिरथापरः

cāturmāsyaṃ paśubandhaḥ sautrāmaṇirathāparaḥ

सोमसंस्थाः सप्त शृणु अग्निष्टोमः क्रतूत्तमः

somasaṃsthāḥ sapta śṛṇu agniṣṭomaḥ kratūttamaḥ

अत्यग्निष्टोम उक्थश् च षोडशो वाजपेयकः

atyagniṣṭoma ukthaś ca ṣoḍaśo vājapeyakaḥ

अतिरात्राप्तोर्यामश् च सहस्रेशाः सवा इमे

atirātrāptoryāmaś ca sahasreśāḥ savā ime

हिरण्याङ्घ्रिर्हिरण्याक्षो हिरण्यमित्र इत्य् अतः

hiraṇyāṅghrirhiraṇyākṣo hiraṇyamitra ity ataḥ

हिरण्यपाणिर्हेमाक्षो हेमाङ्गो हेमसूत्रकः

hiraṇyapāṇirhemākṣo hemāṅgo hemasūtrakaḥ

हिरण्यास्यो हिरण्याङ्गो हेमजिह्वो हिरण्यवान्

hiraṇyāsyo hiraṇyāṅgo hemajihvo hiraṇyavān

अश्वमेधो हि सर्वेशो गुणाश्चाष्टाथ तान् शृणु

aśvamedho hi sarveśo guṇāścāṣṭātha tān śṛṇu

दया च सर्वभूतेषु क्षान्तिश् चैव तथार्जवम्

dayā ca sarvabhūteṣu kṣāntiś caiva tathārjavam

शौचं चैवमनायासो मङ्गलं चापरो गुणः

śaucaṃ caivamanāyāso maṅgalaṃ cāparo guṇaḥ

अकार्पण्यञ्चास्पृहा च मूलेन जुहुयाच्छतम्

akārpaṇyañcāspṛhā ca mūlena juhuyācchatam

सौरशाक्तेयविष्ण्वीशदीक्षास्त्वेते समाः स्मृताः

sauraśākteyaviṣṇvīśadīkṣāstvete samāḥ smṛtāḥ

संस्कारैः संस्कृतश् चैतैर् भुक्तिमुक्तिमवाप्नुयात्

saṃskāraiḥ saṃskṛtaś caitair bhuktimuktimavāpnuyāt

सर्वरोगाद्विनिर्मुक्तो देववद्वर्तते नरः

sarvarogādvinirmukto devavadvartate naraḥ

जप्याद्धोमात्पूजनाच्च ध्यानाद्देवस्य चेष्टभाक्

japyāddhomātpūjanācca dhyānāddevasya ceṣṭabhāk