Chapter 46

शालग्रामादिमूर्तेश् च वक्ष्येहं भुक्तिमुक्तिदाः

śālagrāmādimūrteś ca vakṣyehaṃ bhuktimuktidāḥ

वासुदेवो ऽसितो द्वारे शालग्रामद्विचक्रकः

vāsudevo 'sito dvāre śālagrāmadvicakrakaḥ

ज्ञेयः सङ्कर्षणो लग्नद्विचक्रो रक्त उत्तमः

jñeyaḥ saṅkarṣaṇo lagnadvicakro rakta uttamaḥ

सूक्ष्मचक्रो बहुच्छिद्रः प्रद्युम्नो नीलदीघवः

sūkṣmacakro bahucchidraḥ pradyumno nīladīghavaḥ

पीतो निरुद्धः पद्माङ्गो वर्तुलो द्वित्रिरेखवान्

pīto niruddhaḥ padmāṅgo vartulo dvitrirekhavān

कृष्णो नारायणो नाभ्युन्नतः शुषिरदीर्घवान्

kṛṣṇo nārāyaṇo nābhyunnataḥ śuṣiradīrghavān

परमेष्ठो साब्जचक्रः पृष्ठच्छिद्रकश् च विन्दुमान्

parameṣṭho sābjacakraḥ pṛṣṭhacchidrakaś ca vindumān

स्थूलचक्रो ऽसितो विष्णुर्मध्ये रेखा गदाकृतिः

sthūlacakro 'sito viṣṇurmadhye rekhā gadākṛtiḥ

नृसिंहः कपिकः स्थूलवक्रः स्यात् पञ्चविन्दुकः

nṛsiṃhaḥ kapikaḥ sthūlavakraḥ syāt pañcavindukaḥ

वराहः शक्तिलिङ्गः स्यात् तच्चक्रौ विषमौ सृतौ

varāhaḥ śaktiliṅgaḥ syāt taccakrau viṣamau sṛtau

इन्द्रनीलनिभः स्थूलस्त्रिरेखालाञ्छितः शुभः

indranīlanibhaḥ sthūlastrirekhālāñchitaḥ śubhaḥ

कूर्मस्तथोन्नतः पृष्ठे वर्तुलावर्तको ऽसितः

kūrmastathonnataḥ pṛṣṭhe vartulāvartako 'sitaḥ

हयग्रीवोङ्कुशावाररेखो नीलः सविन्दुकः

hayagrīvoṅkuśāvārarekho nīlaḥ savindukaḥ

वैकुण्ठः एकचक्रो ऽब्जी मणिभिः पुच्छरेखकः

vaikuṇṭhaḥ ekacakro 'bjī maṇibhiḥ puccharekhakaḥ

मत्स्यो दीर्घस्त्रिविन्दुः स्यात् काचवर्णस्तु पूरितः

matsyo dīrghastrivinduḥ syāt kācavarṇastu pūritaḥ

श्रीधरो वनमालाङ्कः पञ्जरेखस्तु वर्तुलः

śrīdharo vanamālāṅkaḥ pañjarekhastu vartulaḥ

वामनो वर्तुलश्चातिह्रस्वो नीलः सविन्दुकः

vāmano vartulaścātihrasvo nīlaḥ savindukaḥ

श्यामस्त्रिविक्रमो दक्षरेखो वामेन विन्दुकः

śyāmastrivikramo dakṣarekho vāmena vindukaḥ

अनन्तो नागभोगाङ्गो नैकाभो नैकमूर्तिमान्

ananto nāgabhogāṅgo naikābho naikamūrtimān

स्थूलो दामोदरो मध्यचक्रो द्वाःसूक्ष्मविन्दुकः

sthūlo dāmodaro madhyacakro dvāḥsūkṣmavindukaḥ

सुदर्शनस्त्वेकचक्रो लक्ष्मीनारायणो द्वयात्

sudarśanastvekacakro lakṣmīnārāyaṇo dvayāt

त्रिचक्रश्चाच्युतो देवस्त्रिचक्रको वा त्रिविक्रमः

tricakraścācyuto devastricakrako vā trivikramaḥ

जनार्दनश् चतुश् चक्रो वासुदेवश् च पञ्चभिः

janārdanaś catuś cakro vāsudevaś ca pañcabhiḥ

षट्वक्रश् चैव प्रद्युम्नः सङ्कर्षणञ्च सप्तभिः

ṣaṭvakraś caiva pradyumnaḥ saṅkarṣaṇañca saptabhiḥ

पुरुषोत्तमोष्टचक्रो नवव्यूहो नवाङ्कितः

puruṣottamoṣṭacakro navavyūho navāṅkitaḥ

दशावतारो दशभिर्दशैकेनानिरुद्धकः

daśāvatāro daśabhirdaśaikenāniruddhakaḥ

द्वादशात्मा द्वादशभिरत ऊर्ध्वमनन्तकः

dvādaśātmā dvādaśabhirata ūrdhvamanantakaḥ