Chapter 47

शालग्रामादिचक्राङ्कपूजाः सिद्ध्यै वदामि ते

śālagrāmādicakrāṅkapūjāḥ siddhyai vadāmi te

त्रिविधा स्याद्धरेः पूजा काम्याकाम्योभयात्मिका

trividhā syāddhareḥ pūjā kāmyākāmyobhayātmikā

मीनादीनान्तु पञ्चानां काम्याथो वोभयात्मिका

mīnādīnāntu pañcānāṃ kāmyātho vobhayātmikā

वराहस्य नृसिंहस्य वामनस्य च मुक्तये

varāhasya nṛsiṃhasya vāmanasya ca muktaye

चक्रादीनां त्रयाणान्तु शालग्रामार्चनं शृणु

cakrādīnāṃ trayāṇāntu śālagrāmārcanaṃ śṛṇu

उत्तमा निष्फला पूजा कनिष्ठा सफलार्चना

uttamā niṣphalā pūjā kaniṣṭhā saphalārcanā

मध्यमा मूर्तिपूजा स्याच्चक्राब्जे चतुरस्रके

madhyamā mūrtipūjā syāccakrābje caturasrake

प्रणवं हृदि विन्यस्य षडङ्गङ्करदेहयोः

praṇavaṃ hṛdi vinyasya ṣaḍaṅgaṅkaradehayoḥ

कृतमुद्रात्रयश् चक्राद् वहिः पूवे गुरुं यजेत्

kṛtamudrātrayaś cakrād vahiḥ pūve guruṃ yajet

आप्ये गणं वायवे च धातारं नैरृते यजेत्

āpye gaṇaṃ vāyave ca dhātāraṃ nairṛte yajet

विधातारञ्च कर्तारं हर्तारं दक्षसौम्ययोः

vidhātārañca kartāraṃ hartāraṃ dakṣasaumyayoḥ

विश्वक्सेनं यजेदीशे आग्नेये क्षेत्रपालकम्

viśvaksenaṃ yajedīśe āgneye kṣetrapālakam

ऋगादिवेदान् प्रागादौ आधारानन्तकं भुवं

ṛgādivedān prāgādau ādhārānantakaṃ bhuvaṃ

पीठं पद्मं चार्कचन्द्रवह्न्याख्यं मण्डलत्रयं

pīṭhaṃ padmaṃ cārkacandravahnyākhyaṃ maṇḍalatrayaṃ

आसनं द्वादशार्णेन तत्र स्थाप्य शिलां यजेत्

āsanaṃ dvādaśārṇena tatra sthāpya śilāṃ yajet

अस्तेन च समस्तेन स्ववीजेन यजेत् क्रमात्

astena ca samastena svavījena yajet kramāt

पूर्वादावथ वेदाद्यैर् गायत्रीभ्यां जितादिना

pūrvādāvatha vedādyair gāyatrībhyāṃ jitādinā

प्रणवेनार्चयेत् पञ्चान्मुद्रास्तिस्रः प्रदर्शयेत्

praṇavenārcayet pañcānmudrāstisraḥ pradarśayet

विश्वक्सेनस्य चक्रस्य क्षेत्रपालस्य दर्शयेत्

viśvaksenasya cakrasya kṣetrapālasya darśayet

शालग्रामस्य प्रथमा पूजार्थो निष्फलोच्यते

śālagrāmasya prathamā pūjārtho niṣphalocyate

पूर्ववत् षोडशारञ्च सपद्मं मण्डलं लिखेत्

pūrvavat ṣoḍaśārañca sapadmaṃ maṇḍalaṃ likhet

शङ्खचक्रगदाखड्गैर् गुर्वाद्यं पूर्ववद्यजेत्

śaṅkhacakragadākhaḍgair gurvādyaṃ pūrvavadyajet

पूर्वे सौम्ये धनुर्वाणान् वेदाद्यैर् आसनं ददेत्

pūrve saumye dhanurvāṇān vedādyair āsanaṃ dadet

शिलां न्यसेद् द्वादशार्णैस्तृतीयं पूजनं शृणु

śilāṃ nyased dvādaśārṇaistṛtīyaṃ pūjanaṃ śṛṇu

अष्टारमब्जं विलिखेत् गुर्वाद्यं पूर्ववद्यजयेत्

aṣṭāramabjaṃ vilikhet gurvādyaṃ pūrvavadyajayet

अष्टार्णेनासनं दत्वा तेनैव च शिलां न्यसेत्

aṣṭārṇenāsanaṃ datvā tenaiva ca śilāṃ nyaset