अथाष्टाचत्वारिंशो ऽध्यायः
athāṣṭācatvāriṃśo 'dhyāyaḥ
चतुर्विंशतिमूर्तिस्तोत्रकथनं
caturviṃśatimūrtistotrakathanaṃ
भगवानुवाच
bhagavānuvāca
ओंरूपः केशवः पद्मशङ्खचक्रगदाधरः
oṃrūpaḥ keśavaḥ padmaśaṅkhacakragadādharaḥ
नारायणः शङ्खपद्मगदाचक्री प्रदक्षिणं
nārāyaṇaḥ śaṅkhapadmagadācakrī pradakṣiṇaṃ
ततो गदो माधवोरिशङ्खपद्मी नमामि तं
tato gado mādhavoriśaṅkhapadmī namāmi taṃ
चक्रकौमोदकीपद्मशङ्खी गोविन्द ऊर्जितः
cakrakaumodakīpadmaśaṅkhī govinda ūrjitaḥ
भोक्षदः श्रीगदी पद्मी शङ्खी विष्णुश् च चक्रधृक्
bhokṣadaḥ śrīgadī padmī śaṅkhī viṣṇuś ca cakradhṛk
शङ्खचक्राब्जगदिनं मधुसूदनमानमे
śaṅkhacakrābjagadinaṃ madhusūdanamāname
भक्त्या त्रिविक्रमः पद्मगदी चक्री च शङ्ख्यपि
bhaktyā trivikramaḥ padmagadī cakrī ca śaṅkhyapi
शङ्खचक्रगदापद्मी वामनः पातु मां सदा
śaṅkhacakragadāpadmī vāmanaḥ pātu māṃ sadā
गदितः श्रीधरः पद्मी चक्रशार्ङ्गी च शङ्ख्यपि
gaditaḥ śrīdharaḥ padmī cakraśārṅgī ca śaṅkhyapi
हृषीकेशो गदाचक्री पद्मी चक्रशङ्खी च पातु नः
hṛṣīkeśo gadācakrī padmī cakraśaṅkhī ca pātu naḥ
वरदः पद्मनाभस्तु शङ्खाब्जारिगदाधरः
varadaḥ padmanābhastu śaṅkhābjārigadādharaḥ
दामोदरः पद्मशङ्खगदाचक्री नमामि तं
dāmodaraḥ padmaśaṅkhagadācakrī namāmi taṃ
तेने गदी शङ्खचक्री वासुदेवोब्जभृज्जगत्
tene gadī śaṅkhacakrī vāsudevobjabhṛjjagat
सङ्कर्षणो गदी शङ्खी पद्मी चक्री च पातु वः
saṅkarṣaṇo gadī śaṅkhī padmī cakrī ca pātu vaḥ
गदी चक्री शङ्खगदी प्रद्युम्नः पद्मभृत् प्रभुः
gadī cakrī śaṅkhagadī pradyumnaḥ padmabhṛt prabhuḥ
अनिरुद्धश् चक्रगदी शङ्खी पद्मी च पातु नः
aniruddhaś cakragadī śaṅkhī padmī ca pātu naḥ
सुरेशोर्यब्जशङ्खाढ्यः श्रीगदी पुरुषोत्तमः
sureśoryabjaśaṅkhāḍhyaḥ śrīgadī puruṣottamaḥ
अधोक्षजः पद्मगदी शङ्खी चक्री च पातु वः
adhokṣajaḥ padmagadī śaṅkhī cakrī ca pātu vaḥ
देवो नृसिंहश् चक्राब्जगदाशङ्खी नमामि तम्
devo nṛsiṃhaś cakrābjagadāśaṅkhī namāmi tam
अच्युतः श्रीगदी पद्मी चक्री शङ्खी च पातु वः
acyutaḥ śrīgadī padmī cakrī śaṅkhī ca pātu vaḥ
बालरूपी शङ्खगदी उपेन्द्रश् चक्रपद्म्यपि
bālarūpī śaṅkhagadī upendraś cakrapadmyapi
जनार्दनः पद्मचक्री शङ्खधारी गदाधरः
janārdanaḥ padmacakrī śaṅkhadhārī gadādharaḥ
शङ्खी पद्मी च चक्री च हरिः कौमोदकीधरः
śaṅkhī padmī ca cakrī ca hariḥ kaumodakīdharaḥ
कृष्णः शङ्खी गदी पद्मी चक्री मे भुक्तिमुक्तिदः
kṛṣṇaḥ śaṅkhī gadī padmī cakrī me bhuktimuktidaḥ
आदिमूत्तिर्वासुदेवस्तस्मात् सङ्कर्षणोभवत्
ādimūttirvāsudevastasmāt saṅkarṣaṇobhavat
सङ्कर्षणाच्च प्रद्युम्नः प्रद्युम्नादनिरुद्धकः
saṅkarṣaṇācca pradyumnaḥ pradyumnādaniruddhakaḥ
केशवादिप्रभेदेन ऐकैकस्य त्रिधा क्रमात्
keśavādiprabhedena aikaikasya tridhā kramāt
द्वादशाक्षरकं स्तोत्रं चतुर्विंशतिमूर्तिमत्
dvādaśākṣarakaṃ stotraṃ caturviṃśatimūrtimat
यः पठेच्छृणुयाद्वापि निर्मलः सर्वमाप्नुयात्
yaḥ paṭhecchṛṇuyādvāpi nirmalaḥ sarvamāpnuyāt
इत्य् आदिमहापुराणे आग्नेये चतुर्विंशतिमूर्तिस्तोत्रं नाम अष्टाचत्वारिंशो ऽध्यायः ॥
ity ādimahāpurāṇe āgneye caturviṃśatimūrtistotraṃ nāma aṣṭācatvāriṃśo 'dhyāyaḥ ||