प्रद्युम्नाद्या हरेः पुत्रा रुक्मिण्यां कथिता द्विजाः भान्वादिकांश् च वै पुत्रान् सत्यभामा व्यजायत ॥
pradyumnādyā hareḥ putrā rukmiṇyāṃ kathitā dvijāḥ bhānvādikāṃś ca vai putrān satyabhāmā vyajāyata //
दीप्तिमन्तः प्रपक्षाद्या रोहिण्यास् तनया हरेः बभूवुर् जाम्बवत्याश् च साम्बाद्या बाहुशालिनः ॥
dīptimantaḥ prapakṣādyā rohiṇyās tanayā hareḥ babhūvur jāmbavatyāś ca sāmbādyā bāhuśālinaḥ //
तनया भद्रविन्दाद्या नाग्नजित्यां महाबलाः संग्रामजित्प्रधानास् तु शैब्यायां चाभवन् सुताः ॥
tanayā bhadravindādyā nāgnajityāṃ mahābalāḥ saṃgrāmajitpradhānās tu śaibyāyāṃ cābhavan sutāḥ //
वृकाद्यास् तु सुता माद्री गात्रवत्प्रमुखान् सुतान् अवाप लक्ष्मणा पुत्रान् कालिन्द्याश् च श्रुतादयः ॥
vṛkādyās tu sutā mādrī gātravatpramukhān sutān avāpa lakṣmaṇā putrān kālindyāś ca śrutādayaḥ //
अन्यासां चैव भार्याणां समुत्पन्नानि चक्रिणः अष्टायुतानि पुत्राणां सहस्राणि शतं तथा ॥
anyāsāṃ caiva bhāryāṇāṃ samutpannāni cakriṇaḥ aṣṭāyutāni putrāṇāṃ sahasrāṇi śataṃ tathā //
प्रद्युम्नः प्रमुखस् तेषां रुक्मिण्यास् तु सुतस् ततः प्रद्युम्नाद् अनिरुद्धो ऽभूद् वज्रस् तस्माद् अजायत ॥
pradyumnaḥ pramukhas teṣāṃ rukmiṇyās tu sutas tataḥ pradyumnād aniruddho 'bhūd vajras tasmād ajāyata //
अनिरुद्धो रणे रुद्धो बलेः पौत्रीं महाबलः बाणस्य तनयाम् ऊषाम् उपयेमे द्विजोत्तमाः ॥
aniruddho raṇe ruddho baleḥ pautrīṃ mahābalaḥ bāṇasya tanayām ūṣām upayeme dvijottamāḥ //
यत्र युद्धम् अभूद् घोरं हरिशंकरयोर् महत् छिन्नं सहस्रं बाहूनां यत्र बाणस्य चक्रिणा ॥
yatra yuddham abhūd ghoraṃ hariśaṃkarayor mahat chinnaṃ sahasraṃ bāhūnāṃ yatra bāṇasya cakriṇā //
कथं युद्धम् अभूद् ब्रह्मन्न् उषार्थे हरकृष्णयोः कथं क्षयं च बाणस्य बाहूनां कृतवान् हरिः ॥
kathaṃ yuddham abhūd brahmann uṣārthe harakṛṣṇayoḥ kathaṃ kṣayaṃ ca bāṇasya bāhūnāṃ kṛtavān hariḥ //
एतत् सर्वं महाभाग वक्तुम् अर्हसि नो ऽखिलम् महत् कौतूहलं जातं श्रोतुम् एतां कथां शुभाम् ॥
etat sarvaṃ mahābhāga vaktum arhasi no 'khilam mahat kautūhalaṃ jātaṃ śrotum etāṃ kathāṃ śubhām //
उषा बाणसुता विप्राः पार्वतीं शंभुना सह क्रीडन्तीम् उपलक्ष्योच्चैः स्पृहां चक्रे तदा स्वयम् ततः सकलचित्तज्ञा गौरी ताम् आह भामिनीम् ॥
uṣā bāṇasutā viprāḥ pārvatīṃ śaṃbhunā saha krīḍantīm upalakṣyoccaiḥ spṛhāṃ cakre tadā svayam tataḥ sakalacittajñā gaurī tām āha bhāminīm //
अलम् इत्य् अनुतापेन भर्त्रा त्वम् अपि रंस्यसे ॥
alam ity anutāpena bhartrā tvam api raṃsyase //
इत्य् उक्ता सा तदा चक्रे कदेति मतिम् आत्मनः को वा भर्ता ममेत्य् एनां पुनर् अप्य् आह पार्वती ॥
ity uktā sā tadā cakre kadeti matim ātmanaḥ ko vā bhartā mamety enāṃ punar apy āha pārvatī //
वैशाखे शुक्लद्वादश्यां स्वप्ने यो ऽभिभवं तव करिष्यति स ते भर्ता राजपुत्रि भविष्यति ॥
vaiśākhe śukladvādaśyāṃ svapne yo 'bhibhavaṃ tava kariṣyati sa te bhartā rājaputri bhaviṣyati //
तस्यां तिथौ पुमान् स्वप्ने यथा देव्या उदीरितः तथैवाभिभवं चक्रे रागं चक्रे च तत्र सा ततः प्रबुद्धा पुरुषम् अपश्यन्ती तम् उत्सुका ॥
tasyāṃ tithau pumān svapne yathā devyā udīritaḥ tathaivābhibhavaṃ cakre rāgaṃ cakre ca tatra sā tataḥ prabuddhā puruṣam apaśyantī tam utsukā //
क्व गतो ऽसीति निर्लज्जा द्विजाश् चोक्तवती सखीम् बाणस्य मन्त्री कुम्भाण्डश् चित्रलेखा तु तत्सुता ॥
kva gato 'sīti nirlajjā dvijāś coktavatī sakhīm bāṇasya mantrī kumbhāṇḍaś citralekhā tu tatsutā //
तस्याः सख्य् अभवत् सा च प्राह को ऽयं त्वयोच्यते यदा लज्जाकुला नास्य कथयाम् आस सा सखी ॥
tasyāḥ sakhy abhavat sā ca prāha ko 'yaṃ tvayocyate yadā lajjākulā nāsya kathayām āsa sā sakhī //
तदा विश्वासम् आनीय सर्वम् एवान्ववेदयत् विदितायां तु ताम् आह पुनर् ऊषा यथोदितम् देव्या तथैव तत्प्राप्तौ यो ऽभ्युपायः कुरुष्व तम् ॥
tadā viśvāsam ānīya sarvam evānvavedayat viditāyāṃ tu tām āha punar ūṣā yathoditam devyā tathaiva tatprāptau yo 'bhyupāyaḥ kuruṣva tam //
ततः पटे सुरान् दैत्यान् गन्धर्वांश् च प्रधानतः मनुष्यांश् चाभिलिख्यासौ चित्रलेखाप्य् अदर्शयत् ॥
tataḥ paṭe surān daityān gandharvāṃś ca pradhānataḥ manuṣyāṃś cābhilikhyāsau citralekhāpy adarśayat //
अपास्य सा तु गन्धर्वांस् तथोरगसुरासुरान् मनुष्येषु ददौ दृष्टिं तेष्व् अप्य् अन्धकवृष्णिषु ॥
apāsya sā tu gandharvāṃs tathoragasurāsurān manuṣyeṣu dadau dṛṣṭiṃ teṣv apy andhakavṛṣṇiṣu //
कृष्णरामौ विलोक्यासीत् सुभ्रूर् लज्जायतेक्षणा प्रद्युम्नदर्शने व्रीडादृष्टिं निन्ये ततो द्विजाः ॥
kṛṣṇarāmau vilokyāsīt subhrūr lajjāyatekṣaṇā pradyumnadarśane vrīḍādṛṣṭiṃ ninye tato dvijāḥ //
दृष्ट्वानिरुद्धं च ततो लज्जा क्वापि निराकृता सो ऽयं सो ऽयं ममेत्य् उक्ते तया सा योगगामिनी ययौ द्वारवतीम् ऊषां समाश्वास्य ततः सखी ॥
dṛṣṭvāniruddhaṃ ca tato lajjā kvāpi nirākṛtā so 'yaṃ so 'yaṃ mamety ukte tayā sā yogagāminī yayau dvāravatīm ūṣāṃ samāśvāsya tataḥ sakhī //