तस्यां स नृपतिः पूर्वं कुर्वन् राज्यम् अनुत्तमम् पालयाम् आस मतिमान् प्रजाः पुत्रान् इवौरसान् ॥
tasyāṃ sa nṛpatiḥ pūrvaṃ kurvan rājyam anuttamam pālayām āsa matimān prajāḥ putrān ivaurasān //
सत्यवादी महाप्राज्ञः शूरः सर्वगुणाकरः मतिमान् धर्मसंपन्नः सर्वशस्त्रभृतां वरः ॥
satyavādī mahāprājñaḥ śūraḥ sarvaguṇākaraḥ matimān dharmasaṃpannaḥ sarvaśastrabhṛtāṃ varaḥ //
सत्यवाञ् शीलवान् दान्तः श्रीमान् परपुरंजयः आदित्य इव तेजोभी रूपैर् आश्विनयोर् इव ॥
satyavāñ śīlavān dāntaḥ śrīmān parapuraṃjayaḥ āditya iva tejobhī rūpair āśvinayor iva //
वर्धमानसुराश्चर्यः शक्रतुल्यपराक्रमः शारदेन्दुर् इवाभाति लक्षणैः समलंकृतः ॥
vardhamānasurāścaryaḥ śakratulyaparākramaḥ śāradendur ivābhāti lakṣaṇaiḥ samalaṃkṛtaḥ //
आहर्ता सर्वयज्ञानां हयमेधादिकृत् तथा दानैर् यज्ञैस् तपोभिश् च तत्तुल्यो नास्ति भूपतिः ॥
āhartā sarvayajñānāṃ hayamedhādikṛt tathā dānair yajñais tapobhiś ca tattulyo nāsti bhūpatiḥ //
सुवर्णमणिमुक्तानां गजाश्वानां च भूपतिः प्रददौ विप्रमुख्येभ्यो यागे यागे महाधनम् ॥
suvarṇamaṇimuktānāṃ gajāśvānāṃ ca bhūpatiḥ pradadau vipramukhyebhyo yāge yāge mahādhanam //
हस्त्यश्वरथमुख्यानां कम्बलाजिनवाससाम् रत्नानां धनधान्यानाम् अन्तस् तस्य न विद्यते ॥
hastyaśvarathamukhyānāṃ kambalājinavāsasām ratnānāṃ dhanadhānyānām antas tasya na vidyate //
एवं सर्वधनैर् युक्तो गुणैः सर्वैर् अलंकृतः सर्वकामसमृद्धात्मा कुर्वन् राज्यम् अकण्टकम् ॥
evaṃ sarvadhanair yukto guṇaiḥ sarvair alaṃkṛtaḥ sarvakāmasamṛddhātmā kurvan rājyam akaṇṭakam //
तस्येयं मतिर् उत्पन्ना सर्वयोगेश्वरं हरिम् कथम् आराधयिष्यामि भुक्तिमुक्तिप्रदं प्रभुम् ॥
tasyeyaṃ matir utpannā sarvayogeśvaraṃ harim katham ārādhayiṣyāmi bhuktimuktipradaṃ prabhum //
विचार्य सर्वशास्त्राणि तन्त्राण्य् आगमविस्तरम् इतिहासपुराणानि वेदाङ्गानि च सर्वशः ॥
vicārya sarvaśāstrāṇi tantrāṇy āgamavistaram itihāsapurāṇāni vedāṅgāni ca sarvaśaḥ //
धर्मशास्त्राणि सर्वाणि नियमान् ऋषिभाषितान् वेदाङ्गानि च शास्त्राणि विद्यास्थानानि यानि च ॥
dharmaśāstrāṇi sarvāṇi niyamān ṛṣibhāṣitān vedāṅgāni ca śāstrāṇi vidyāsthānāni yāni ca //
गुरुं संसेव्य यत्नेन ब्राह्मणान् वेदपारगान् आधाय परमां काष्ठां कृतकृत्यो ऽभवत् तदा ॥
guruṃ saṃsevya yatnena brāhmaṇān vedapāragān ādhāya paramāṃ kāṣṭhāṃ kṛtakṛtyo 'bhavat tadā //
संप्राप्य परमं तत्त्वं वासुदेवाख्यम् अव्ययम् भ्रान्तिज्ञानाद् अतीतस् तु मुमुक्षुः संयतेन्द्रियः ॥
saṃprāpya paramaṃ tattvaṃ vāsudevākhyam avyayam bhrāntijñānād atītas tu mumukṣuḥ saṃyatendriyaḥ //
कथम् आराधयिष्यामि देवदेवं सनातनम् पीतवस्त्रं चतुर्बाहुं शङ्खचक्रगदाधरम् ॥
katham ārādhayiṣyāmi devadevaṃ sanātanam pītavastraṃ caturbāhuṃ śaṅkhacakragadādharam //
वनमालावृतोरस्कं पद्मपत्त्रायतेक्षणम् श्रीवत्सोरःसमायुक्तं मुकुटाङ्गदशोभितम् ॥
vanamālāvṛtoraskaṃ padmapattrāyatekṣaṇam śrīvatsoraḥsamāyuktaṃ mukuṭāṅgadaśobhitam //
स्वपुरात् स तु निष्क्रान्त उज्जयिन्याः प्रजापतिः बलेन महता युक्तः सभृत्यः सपुरोहितः ॥
svapurāt sa tu niṣkrānta ujjayinyāḥ prajāpatiḥ balena mahatā yuktaḥ sabhṛtyaḥ sapurohitaḥ //
अनुजग्मुस् तु तं सर्वे रथिनः शस्त्रपाणयः रथैर् विमानसंकाशैः पताकाध्वजसेवितैः ॥
anujagmus tu taṃ sarve rathinaḥ śastrapāṇayaḥ rathair vimānasaṃkāśaiḥ patākādhvajasevitaiḥ //
सादिनश् च तथा सर्वे प्रासतोमरपाणयः अश्वैः पवनसंकाशैर् अनुजग्मुस् तु तं नृपम् ॥
sādinaś ca tathā sarve prāsatomarapāṇayaḥ aśvaiḥ pavanasaṃkāśair anujagmus tu taṃ nṛpam //
हिमवत्संभवैर् मत्तैर् वारणैः पर्वतोपमैः ईषादन्तैः सदा मत्तैः प्रचण्डैः षष्टिहायनैः ॥
himavatsaṃbhavair mattair vāraṇaiḥ parvatopamaiḥ īṣādantaiḥ sadā mattaiḥ pracaṇḍaiḥ ṣaṣṭihāyanaiḥ //
हेमकक्षैः सपताकैर् घण्टारवविभूषितैः अनुजग्मुश् च तं सर्वे गजयुद्धविशारदाः ॥
hemakakṣaiḥ sapatākair ghaṇṭāravavibhūṣitaiḥ anujagmuś ca taṃ sarve gajayuddhaviśāradāḥ //
असंख्येयाश् च पादाता धनुष्प्रासासिपाणयः दिव्यमाल्याम्बरधरा दिव्यगन्धानुलेपनाः ॥
asaṃkhyeyāś ca pādātā dhanuṣprāsāsipāṇayaḥ divyamālyāmbaradharā divyagandhānulepanāḥ //
अनुजग्मुश् च तं सर्वे युवानो मृष्टकुण्डलाः सर्वास्त्रकुशलाः शूराः सदा संग्रामलालसाः ॥
anujagmuś ca taṃ sarve yuvāno mṛṣṭakuṇḍalāḥ sarvāstrakuśalāḥ śūrāḥ sadā saṃgrāmalālasāḥ //
अन्तःपुरनिवासिन्यः स्त्रियः सर्वाः स्वलंकृताः बिम्बौष्ठचारुदशनाः सर्वाभरणभूषिताः ॥
antaḥpuranivāsinyaḥ striyaḥ sarvāḥ svalaṃkṛtāḥ bimbauṣṭhacārudaśanāḥ sarvābharaṇabhūṣitāḥ //
दिव्यवस्त्रधराः सर्वा दिव्यमाल्यविभूषिताः दिव्यगन्धानुलिप्ताङ्गाः शरच्चन्द्रनिभाननाः ॥
divyavastradharāḥ sarvā divyamālyavibhūṣitāḥ divyagandhānuliptāṅgāḥ śaraccandranibhānanāḥ //
सुमध्यमाश् चारुवेषाश् चारुकर्णालकाञ्चिताः ताम्बूलरञ्जितमुखा रक्षिभिश् च सुरक्षिताः ॥
sumadhyamāś cāruveṣāś cārukarṇālakāñcitāḥ tāmbūlarañjitamukhā rakṣibhiś ca surakṣitāḥ //
यानैर् उच्चावचैः शुभ्रैर् मणिकाञ्चनभूषितैः उपगीयमानास् ताः सर्वा गायनैः स्तुतिपाठकैः ॥
yānair uccāvacaiḥ śubhrair maṇikāñcanabhūṣitaiḥ upagīyamānās tāḥ sarvā gāyanaiḥ stutipāṭhakaiḥ //
वेष्टिताः शस्त्रहस्तैश् च पद्मपत्त्रायतेक्षणाः ब्राह्मणाः क्षत्रिया वैश्या अनुजग्मुश् च तं नृपम् ॥
veṣṭitāḥ śastrahastaiś ca padmapattrāyatekṣaṇāḥ brāhmaṇāḥ kṣatriyā vaiśyā anujagmuś ca taṃ nṛpam //
वणिग्ग्रामगणाः सर्वे नानापुरनिवासिनः धनै रत्नैः सुवर्णैश् च सदाराः सपरिच्छदाः ॥
vaṇiggrāmagaṇāḥ sarve nānāpuranivāsinaḥ dhanai ratnaiḥ suvarṇaiś ca sadārāḥ saparicchadāḥ //
अस्त्रविक्रयकाश् चैव ताम्बूलपण्यजीविनः तृणविक्रयकाश् चैव काष्ठविक्रयकारकाः ॥
astravikrayakāś caiva tāmbūlapaṇyajīvinaḥ tṛṇavikrayakāś caiva kāṣṭhavikrayakārakāḥ //
रङ्गोपजीविनः सर्वे मांसविक्रयिणस् तथा तैलविक्रयकाश् चैव वस्त्रविक्रयकास् तथा ॥
raṅgopajīvinaḥ sarve māṃsavikrayiṇas tathā tailavikrayakāś caiva vastravikrayakās tathā //
फलविक्रयिणश् चैव पत्त्रविक्रयिणस् तथा तथा जवसहाराश् च रजकाश् च सहस्रशः ॥
phalavikrayiṇaś caiva pattravikrayiṇas tathā tathā javasahārāś ca rajakāś ca sahasraśaḥ //
गोपाला नापिताश् चैव तथान्ये वस्त्रसूचकाः मेषपालाश् चाजपाला मृगपालाश् च हंसकाः ॥
gopālā nāpitāś caiva tathānye vastrasūcakāḥ meṣapālāś cājapālā mṛgapālāś ca haṃsakāḥ //
धान्यविक्रयिणश् चैव सक्तुविक्रयिणश् च ये गुडविक्रयिकाश् चैव तथा लवणजीविनः ॥
dhānyavikrayiṇaś caiva saktuvikrayiṇaś ca ye guḍavikrayikāś caiva tathā lavaṇajīvinaḥ //
गायना नर्तकाश् चैव तथा मङ्गलपाठकाः शैलूषाः कथकाश् चैव पुराणार्थविशारदाः ॥
gāyanā nartakāś caiva tathā maṅgalapāṭhakāḥ śailūṣāḥ kathakāś caiva purāṇārthaviśāradāḥ //
कवयः काव्यकर्तारो नानाकाव्यविशारदाः विषघ्ना गारुडाश् चैव नानारत्नपरीक्षकाः ॥
kavayaḥ kāvyakartāro nānākāvyaviśāradāḥ viṣaghnā gāruḍāś caiva nānāratnaparīkṣakāḥ //
व्योकारास् ताम्रकाराश् च कांस्यकाराश् च रूठकाः कौषकाराश् चित्रकाराः कुन्दकाराश् च पावकाः ॥
vyokārās tāmrakārāś ca kāṃsyakārāś ca rūṭhakāḥ kauṣakārāś citrakārāḥ kundakārāś ca pāvakāḥ //
दण्डकाराश् चासिकाराः सुराधूतोपजीविनः मल्ला दूताश् च कायस्था ये चान्ये कर्मकारिणः ॥
daṇḍakārāś cāsikārāḥ surādhūtopajīvinaḥ mallā dūtāś ca kāyasthā ye cānye karmakāriṇaḥ //
तन्तुवाया रूपकारा वार्तिकास् तैलपाठकाः लावजीवास् तैत्तिरिका मृगपक्ष्युपजीविनः ॥
tantuvāyā rūpakārā vārtikās tailapāṭhakāḥ lāvajīvās taittirikā mṛgapakṣyupajīvinaḥ //
गजवैद्याश् च वैद्याश् च नरवैद्याश् च ये नराः वृक्षवैद्याश् च गोवैद्या ये चान्ये छेददाहकाः ॥
gajavaidyāś ca vaidyāś ca naravaidyāś ca ye narāḥ vṛkṣavaidyāś ca govaidyā ye cānye chedadāhakāḥ //
एते नागरकाः सर्वे ये चान्ये नानुकीर्तिताः अनुजग्मुस् तु राजानं समस्तपुरवासिनः ॥
ete nāgarakāḥ sarve ye cānye nānukīrtitāḥ anujagmus tu rājānaṃ samastapuravāsinaḥ //
यथा व्रजन्तं पितरं ग्रामान्तरं समुत्सुकाः अनुयान्ति यथा पुत्रास् तथा तं ते ऽपि नागराः ॥
yathā vrajantaṃ pitaraṃ grāmāntaraṃ samutsukāḥ anuyānti yathā putrās tathā taṃ te 'pi nāgarāḥ //
एवं स नृपतिः श्रीमान् वृतः सर्वैर् महाजनैः हस्त्यश्वरथपादातैर् जगाम च शनैः शनैः ॥
evaṃ sa nṛpatiḥ śrīmān vṛtaḥ sarvair mahājanaiḥ hastyaśvarathapādātair jagāma ca śanaiḥ śanaiḥ //
एवं गत्वा स नृपतिर् दक्षिणस्योदधेस् तटम् सर्वैस् तैर् दीर्घकालेन बलैर् अनुगतः प्रभुः ॥
evaṃ gatvā sa nṛpatir dakṣiṇasyodadhes taṭam sarvais tair dīrghakālena balair anugataḥ prabhuḥ //
ददर्श सागरं रम्यं नृत्यन्तम् इव च स्थितम् अनेकशतसाहस्रैर् ऊर्मिभिश् च समाकुलम् ॥
dadarśa sāgaraṃ ramyaṃ nṛtyantam iva ca sthitam anekaśatasāhasrair ūrmibhiś ca samākulam //
नानारत्नालयं पूर्णं नानाप्राणिसमाकुलम् वीचीतरङ्गबहुलं महाश्चर्यसमन्वितम् ॥
nānāratnālayaṃ pūrṇaṃ nānāprāṇisamākulam vīcītaraṅgabahulaṃ mahāścaryasamanvitam //
तीर्थराजं महाशब्दम् अपारं सुभयंकरम् मेघवृन्दप्रतीकाशम् अगाधं मकरालयम् ॥
tīrtharājaṃ mahāśabdam apāraṃ subhayaṃkaram meghavṛndapratīkāśam agādhaṃ makarālayam //
मत्स्यैः कूर्मैश् च शङ्खैश् च शुक्तिकानक्रशङ्कुभिः शिंशुमारैः कर्कटैश् च वृतं सर्पैर् महाविषैः ॥
matsyaiḥ kūrmaiś ca śaṅkhaiś ca śuktikānakraśaṅkubhiḥ śiṃśumāraiḥ karkaṭaiś ca vṛtaṃ sarpair mahāviṣaiḥ //
लवणोदं हरेः स्थानं शयनस्य नदीपतिम् सर्वपापहरं पुण्यं सर्ववाञ्छाफलप्रदम् ॥
lavaṇodaṃ hareḥ sthānaṃ śayanasya nadīpatim sarvapāpaharaṃ puṇyaṃ sarvavāñchāphalapradam //
अनेकावर्तगम्भीरं दानवानां समाश्रयम् अमृतस्यारणिं दिव्यं देवयोनिम् अपां पतिम् ॥
anekāvartagambhīraṃ dānavānāṃ samāśrayam amṛtasyāraṇiṃ divyaṃ devayonim apāṃ patim //
विशिष्टं सर्वभूतानां प्राणिनां जीवधारणम् सुपवित्रं पवित्राणां मङ्गलानां च मङ्गलम् ॥
viśiṣṭaṃ sarvabhūtānāṃ prāṇināṃ jīvadhāraṇam supavitraṃ pavitrāṇāṃ maṅgalānāṃ ca maṅgalam //
तीर्थानाम् उत्तमं तीर्थम् अव्ययं यादसां पतिम् चन्द्रवृद्धिक्षयस्येव यस्य मानं प्रतिष्ठितम् ॥
tīrthānām uttamaṃ tīrtham avyayaṃ yādasāṃ patim candravṛddhikṣayasyeva yasya mānaṃ pratiṣṭhitam //
अभेद्यं सर्वभूतानां देवानाम् अमृतालयम् उत्पत्तिस्थितिसंहारहेतुभूतं सनातनम् ॥
abhedyaṃ sarvabhūtānāṃ devānām amṛtālayam utpattisthitisaṃhārahetubhūtaṃ sanātanam //
उपजीव्यं च सर्वेषां पुण्यं नदनदीपतिम् दृष्ट्वा तं नृपतिश्रेष्ठो विस्मयं परमं गतः ॥
upajīvyaṃ ca sarveṣāṃ puṇyaṃ nadanadīpatim dṛṣṭvā taṃ nṛpatiśreṣṭho vismayaṃ paramaṃ gataḥ //
निवासम् अकरोत् तत्र वेलाम् असाद्य सागरीम् पुण्ये मनोहरे देशे सर्वभूमिगुणैर् युते ॥
nivāsam akarot tatra velām asādya sāgarīm puṇye manohare deśe sarvabhūmiguṇair yute //
वृतं शालैः कदम्बैश् च पुंनागैः सरलद्रुमैः पनसैर् नारिकेलैश् च बकुलैर् नागकेसरैः ॥
vṛtaṃ śālaiḥ kadambaiś ca puṃnāgaiḥ saraladrumaiḥ panasair nārikelaiś ca bakulair nāgakesaraiḥ //
तालैः पिप्पलैः खर्जूरैर् नारङ्गैर् बीजपूरकैः शालैर् आम्रातकैर् लोध्रैर् बकुलैर् बहुवारकैः ॥
tālaiḥ pippalaiḥ kharjūrair nāraṅgair bījapūrakaiḥ śālair āmrātakair lodhrair bakulair bahuvārakaiḥ //
कपित्थैः कर्णिकारैश् च पाटलाशोकचम्पकैः दाडिमैश् च तमालैश् च पारिजातैस् तथार्जुनैः ॥
kapitthaiḥ karṇikāraiś ca pāṭalāśokacampakaiḥ dāḍimaiś ca tamālaiś ca pārijātais tathārjunaiḥ //
प्राचीनामलकैर् बिल्वैः प्रियङ्गुवटखादिरैः इङ्गुदीसप्तपर्णैश् च अश्वत्थागस्त्यजम्बुकैः ॥
prācīnāmalakair bilvaiḥ priyaṅguvaṭakhādiraiḥ iṅgudīsaptaparṇaiś ca aśvatthāgastyajambukaiḥ //
मधुकैः कर्णिकारैश् च बहुवारैः सतिन्दुकैः पलाशबदरैर् नीपैः सिद्धनिम्बशुभाञ्जनैः ॥
madhukaiḥ karṇikāraiś ca bahuvāraiḥ satindukaiḥ palāśabadarair nīpaiḥ siddhanimbaśubhāñjanaiḥ //
वारकैः कोविदारैश् च भल्लातामलकैस् तथा इति हिन्तालकाङ्कोलैः करञ्जैः सविभीतकैः ॥
vārakaiḥ kovidāraiś ca bhallātāmalakais tathā iti hintālakāṅkolaiḥ karañjaiḥ savibhītakaiḥ //
ससर्जमधुकाश्मर्यैः शाल्मलीदेवदारुभिः शाखोठकैर् निम्बवटैः कुम्भीकौष्ठहरीतकैः ॥
sasarjamadhukāśmaryaiḥ śālmalīdevadārubhiḥ śākhoṭhakair nimbavaṭaiḥ kumbhīkauṣṭhaharītakaiḥ //
गुग्गुलैश् चन्दनैर् वृक्षैस् तथैवागुरुपाटलैः जम्बीरकरुणैर् वृक्षैस् तिन्तिडीरक्तचन्दनैः ॥
guggulaiś candanair vṛkṣais tathaivāgurupāṭalaiḥ jambīrakaruṇair vṛkṣais tintiḍīraktacandanaiḥ //
एवं नानाविधैर् वृक्षैस् तथान्यैर् बहुपादपैः कल्पद्रुमैर् नित्यफलैः सर्वर्तुकुसुमोत्करैः ॥
evaṃ nānāvidhair vṛkṣais tathānyair bahupādapaiḥ kalpadrumair nityaphalaiḥ sarvartukusumotkaraiḥ //
नानापक्षिरुतैर् दिव्यैर् मत्तकोकिलनादितैः मयूरवरसंघुष्टैः शुकसारिकसंकुलैः ॥
nānāpakṣirutair divyair mattakokilanāditaiḥ mayūravarasaṃghuṣṭaiḥ śukasārikasaṃkulaiḥ //
हारीतैर् भृङ्गराजैश् च चातकैर् बहुपुत्रकैः जीवंजीवककाकोलैः कलविङ्कैः कपोतकैः ॥
hārītair bhṛṅgarājaiś ca cātakair bahuputrakaiḥ jīvaṃjīvakakākolaiḥ kalaviṅkaiḥ kapotakaiḥ //
खगैर् नानाविधैश् चान्यैः श्रोत्ररम्यैर् मनोहरैः पुष्पिताग्रेषु वृक्षेषु कूजद्भिश् चार्वधिष्ठितैः ॥
khagair nānāvidhaiś cānyaiḥ śrotraramyair manoharaiḥ puṣpitāgreṣu vṛkṣeṣu kūjadbhiś cārvadhiṣṭhitaiḥ //
केतकीवनखण्डैश् च सदा पुष्पधरैः सितैः मल्लिकाकुन्दकुसुमैर् यूथिकातगरैस् तथा ॥
ketakīvanakhaṇḍaiś ca sadā puṣpadharaiḥ sitaiḥ mallikākundakusumair yūthikātagarais tathā //
कुटजैर् बाणपुष्पैश् च अतिमुक्तैः सकुब्जकैः मालतीकरवीरैश् च तथा कदलकाञ्चनैः ॥
kuṭajair bāṇapuṣpaiś ca atimuktaiḥ sakubjakaiḥ mālatīkaravīraiś ca tathā kadalakāñcanaiḥ //
अन्यैर् नानाविधैः पुष्पैः सुगन्धैश् चारुदर्शनैः वनोद्यानोपवनजैर् नानावर्णैः सुगन्धिभिः ॥
anyair nānāvidhaiḥ puṣpaiḥ sugandhaiś cārudarśanaiḥ vanodyānopavanajair nānāvarṇaiḥ sugandhibhiḥ //
विद्याधरगणाकीर्णैः सिद्धचारणसेवितैः गन्धर्वोरगरक्षोभिर् भूताप्सरसकिंनरैः ॥
vidyādharagaṇākīrṇaiḥ siddhacāraṇasevitaiḥ gandharvoragarakṣobhir bhūtāpsarasakiṃnaraiḥ //
मुनियक्षगणाकीर्णैर् नानासत्त्वनिषेवितैः मृगैः शाखामृगैः सिंहैर् वराहमहिषाकुलैः ॥
muniyakṣagaṇākīrṇair nānāsattvaniṣevitaiḥ mṛgaiḥ śākhāmṛgaiḥ siṃhair varāhamahiṣākulaiḥ //
तथान्यैः कृष्णसाराद्यैर् मृगैः सर्वत्र शोभितैः शार्दूलैर् दीप्तमातङ्गैस् तथान्यैर् वनचारिभिः ॥
tathānyaiḥ kṛṣṇasārādyair mṛgaiḥ sarvatra śobhitaiḥ śārdūlair dīptamātaṅgais tathānyair vanacāribhiḥ //
एवं नानाविधैर् वृक्षैर् उद्यानैर् नन्दनोपमैः लतागुल्मवितानैश् च विविधैश् च जलाशयैः ॥
evaṃ nānāvidhair vṛkṣair udyānair nandanopamaiḥ latāgulmavitānaiś ca vividhaiś ca jalāśayaiḥ //
हंसकारण्डवाकीर्णैः पद्मिनीखण्डमण्डितैः कादम्बैश् च प्लवैर् हंसैश् चक्रवाकोपशोभितैः ॥
haṃsakāraṇḍavākīrṇaiḥ padminīkhaṇḍamaṇḍitaiḥ kādambaiś ca plavair haṃsaiś cakravākopaśobhitaiḥ //
कमलैः शतपत्त्रैश् च कह्लारैः कुमुदोत्पलैः खगैर् जलचरैश् चान्यैः पुष्पैर् जलसमुद्भवैः ॥
kamalaiḥ śatapattraiś ca kahlāraiḥ kumudotpalaiḥ khagair jalacaraiś cānyaiḥ puṣpair jalasamudbhavaiḥ //
पर्वतैर् दीप्तशिखरैश् चारुकन्दरमण्डितैः नानावृक्षसमाकीर्णैर् नानाधातुविभूषितैः ॥
parvatair dīptaśikharaiś cārukandaramaṇḍitaiḥ nānāvṛkṣasamākīrṇair nānādhātuvibhūṣitaiḥ //
सर्वाश्चर्यमयैः शृङ्गैः सर्वभूतालयैः शुभैः सर्वौषधिसमायुक्तैर् विपुलैश् चित्रसानुभिः ॥
sarvāścaryamayaiḥ śṛṅgaiḥ sarvabhūtālayaiḥ śubhaiḥ sarvauṣadhisamāyuktair vipulaiś citrasānubhiḥ //
एवं सर्वैः समुदितैः शोभितं सुमनोहरैः ददर्श स महीपालः स्थानं त्रैलोक्यपूजितम् ॥
evaṃ sarvaiḥ samuditaiḥ śobhitaṃ sumanoharaiḥ dadarśa sa mahīpālaḥ sthānaṃ trailokyapūjitam //
दशयोजनविस्तीर्णं पञ्चयोजनम् आयतम् नानाश्चर्यसमायुक्तं क्षेत्रं परमदुर्लभम् ॥
daśayojanavistīrṇaṃ pañcayojanam āyatam nānāścaryasamāyuktaṃ kṣetraṃ paramadurlabham //