40 ॥ इति श्रीकूर्मपुराणे षट्साहस्त्र्यां संहितायामुपरिविभागे अष्टात्रिशो ऽध्यायः मार्कण्डेय उवाच नर्मदा सरितां श्रेष्ठा सर्वपापविनाशिनी । मुनिभिः कथिता पूर्वमीश्वरेण स्वयंभुवा
40 // iti śrīkūrmapurāṇe ṣaṭsāhastryāṃ saṃhitāyāmuparivibhāge aṣṭātriśo 'dhyāyaḥ mārkaṇḍeya uvāca narmadā saritāṃ śreṣṭhā sarvapāpavināśinī / munibhiḥ kathitā pūrvamīśvareṇa svayaṃbhuvā
1 ॥ मुनिभिः संस्तुता ह्येषा नर्मदा प्रवरा नदी । रुद्रगात्राद् विनिष्क्रान्ता लोकानां हितकाम्यया
1 // munibhiḥ saṃstutā hyeṣā narmadā pravarā nadī / rudragātrād viniṣkrāntā lokānāṃ hitakāmyayā
2 ॥ सर्वपापहरा नित्यं सर्वदेवनमस्कृता । संस्तुता देवगन्धर्वैरप्यरोभिस्तथैव च
2 // sarvapāpaharā nityaṃ sarvadevanamaskṛtā / saṃstutā devagandharvairapyarobhistathaiva ca
3 ॥ उत्तरे चैव तत्कूले तीर्थं त्रैलोक्यविश्रुतम् । नाम्ना भद्रेश्वरं पुण्यं सर्वपापहरं शुभम् । तत्र स्नात्वा नरो राजन् दैवतैः सह मोहते
3 // uttare caiva tatkūle tīrthaṃ trailokyaviśrutam / nāmnā bhadreśvaraṃ puṇyaṃ sarvapāpaharaṃ śubham / tatra snātvā naro rājan daivataiḥ saha mohate
4 ॥ ततो गच्छेत राजेन्द्र तीर्थमाम्रातकेश्वरम् । तत्र स्नात्वा नरो राजन् गोसहस्रफलं लभेत्
4 // tato gaccheta rājendra tīrthamāmrātakeśvaram / tatra snātvā naro rājan gosahasraphalaṃ labhet
5 ॥ ततो ऽङ्गारेश्वरं गच्छेन्नियतो नियताशनः । सर्वपापविशुद्धात्मा रुद्रलोके महीयते
5 // tato 'ṅgāreśvaraṃ gacchenniyato niyatāśanaḥ / sarvapāpaviśuddhātmā rudraloke mahīyate
6 ॥ ततो गच्छेत राजेन्द्र केदारं नाम पुण्यदम् । तत्र स्नात्वोदकं कृत्वा सर्वान् कामानवाप्नुयात्
6 // tato gaccheta rājendra kedāraṃ nāma puṇyadam / tatra snātvodakaṃ kṛtvā sarvān kāmānavāpnuyāt
7 ॥ पिप्पलेशं ततो गच्छेत् सर्वपापविनाशनम् । तत्र स्नात्वा महाराज रुद्रलोके महीयते
7 // pippaleśaṃ tato gacchet sarvapāpavināśanam / tatra snātvā mahārāja rudraloke mahīyate
8 ॥ ततो गच्छेत राजेन्द्र विमलेश्वरमुत्तमम् । तत्र प्राणान् परित्यज्य रुद्रलोकमवाप्नुयात्
8 // tato gaccheta rājendra vimaleśvaramuttamam / tatra prāṇān parityajya rudralokamavāpnuyāt
9 ॥ ततः पुष्करिणीं गच्छेत् स्नानं तत्र समाचरेत् । स्नातमात्रो नरस्तत्र इन्द्रस्यार्धासनं लभेत्
9 // tataḥ puṣkariṇīṃ gacchet snānaṃ tatra samācaret / snātamātro narastatra indrasyārdhāsanaṃ labhet
10 ॥ ततो गच्छेत राजेन्द्र शूलभेदमिति श्रुतम् । तत्र स्नात्वार्चयेद् देवं गोसहस्रफलं लभेत्
10 // tato gaccheta rājendra śūlabhedamiti śrutam / tatra snātvārcayed devaṃ gosahasraphalaṃ labhet
11 ॥ ततो गच्छेत राजेन्द्र बलितीर्थमनुत्तम् । तत्र स्नात्वा नरो राजन् सिहासनपतिर्भवेत्
11 // tato gaccheta rājendra balitīrthamanuttam / tatra snātvā naro rājan sihāsanapatirbhavet
12 ॥ शक्रतीर्थं ततो गच्छेत् कूले चैव तु दक्षिणे । उपोष्य रजनीमेकां स्नानं कृत्वा यथाविधि
12 // śakratīrthaṃ tato gacchet kūle caiva tu dakṣiṇe / upoṣya rajanīmekāṃ snānaṃ kṛtvā yathāvidhi
13 ॥ आराधयेन्महायोगं देवं नारायणं हरिम् । गोसहस्रफलं प्राप्य विष्णुलोकं स गच्छति
13 // ārādhayenmahāyogaṃ devaṃ nārāyaṇaṃ harim / gosahasraphalaṃ prāpya viṣṇulokaṃ sa gacchati
14 ॥ ऋषितीर्थं ततो गत्वा सर्वपापहरं नृणाम् । स्नातमात्रो नरस्तत्र शिवलोके महीयते
14 // ṛṣitīrthaṃ tato gatvā sarvapāpaharaṃ nṛṇām / snātamātro narastatra śivaloke mahīyate
15 ॥ नारदस्य तु तत्रैव तीर्थं परमशोभनम् । स्नातमात्रो नरस्तत्र गोसहस्रफलं लभेत्
15 // nāradasya tu tatraiva tīrthaṃ paramaśobhanam / snātamātro narastatra gosahasraphalaṃ labhet
16 ॥ यत्र तप्तं तपः पूर्वं नारदेन सुरर्षिणा । प्रतीस्तस्य ददौ योगं देवदेवो महेश्वरः
16 // yatra taptaṃ tapaḥ pūrvaṃ nāradena surarṣiṇā / pratīstasya dadau yogaṃ devadevo maheśvaraḥ
17 ॥ ब्रह्मणा निर्मितं लिङ्गं ब्रह्मेश्वरमिति श्रुतम् । यत्र स्नात्वा नरो राजन् ब्रह्मलोके महीयते
17 // brahmaṇā nirmitaṃ liṅgaṃ brahmeśvaramiti śrutam / yatra snātvā naro rājan brahmaloke mahīyate
18 ॥ ऋणतीर्थं ततो गच्छेत् स ऋणान्मुच्यते ध्रुवम् । महेश्वरं ततो गच्छेत् पर्याप्तं जन्मनः फलम्
18 // ṛṇatīrthaṃ tato gacchet sa ṛṇānmucyate dhruvam / maheśvaraṃ tato gacchet paryāptaṃ janmanaḥ phalam
19 ॥ भीमेश्वरं ततो गच्छेत् सर्वव्याधिविनाशनम् । स्नातमात्रो नरस्तत्र सर्वदुःखैः प्रमुच्यते
19 // bhīmeśvaraṃ tato gacchet sarvavyādhivināśanam / snātamātro narastatra sarvaduḥkhaiḥ pramucyate
20 ॥ ततो गच्छेत राजेन्द्र पिङ्गलेश्वरमुत्तमम् । अहोरात्रोपवासेन त्रिरात्रफलमाप्नुयात्
20 // tato gaccheta rājendra piṅgaleśvaramuttamam / ahorātropavāsena trirātraphalamāpnuyāt
21 ॥ तस्मिंमस्तीर्थे तु राजेन्द्र कपिलां यः प्रयच्छति । यावन्ति तस्या रोमाणि तत्प्रसूतिकुलेषु च । तावद् वर्षसहस्राणि रुद्रलोके महीयते
21 // tasmiṃmastīrthe tu rājendra kapilāṃ yaḥ prayacchati / yāvanti tasyā romāṇi tatprasūtikuleṣu ca / tāvad varṣasahasrāṇi rudraloke mahīyate
22 ॥ यस्तु प्राणपरित्यागं कुर्यात् तत्र नराधिप । अक्षयं मोदते कालं यावच्चन्द्रदिवाकरौ
22 // yastu prāṇaparityāgaṃ kuryāt tatra narādhipa / akṣayaṃ modate kālaṃ yāvaccandradivākarau
23 ॥ नर्मदातटमाश्रित्य तिष्ठन्ते ये तु मानवाः । ते मृताः स्वर्गमायान्ति सन्तः सुकृतिनो यथा
23 // narmadātaṭamāśritya tiṣṭhante ye tu mānavāḥ / te mṛtāḥ svargamāyānti santaḥ sukṛtino yathā
24 ॥ ततो दीप्तेश्वरं गच्छेद् व्यासतीर्थं तपोवनम् । निवर्तिता पुरा तत्र व्यासभीता महानदी । हुङ्कारिता तु व्यासेन दक्षिणेन ततो गता
24 // tato dīpteśvaraṃ gacched vyāsatīrthaṃ tapovanam / nivartitā purā tatra vyāsabhītā mahānadī / huṅkāritā tu vyāsena dakṣiṇena tato gatā
25 ॥ प्रदक्षिणं तु यः कुर्यात् तस्मिंस्तीर्थे युधिष्ठिर । प्रीतस्तस्य भवेद् व्यासो वाञ्छितं लभते फलम्
25 // pradakṣiṇaṃ tu yaḥ kuryāt tasmiṃstīrthe yudhiṣṭhira / prītastasya bhaved vyāso vāñchitaṃ labhate phalam
26 ॥ ततो गच्छेत राजेन्द्र इक्षुनद्यास्तु संगमम् । त्रैलोक्यविश्रुतं पुण्यं तत्र सन्निहितः शिवः । तत्र स्तनात्वा नरो राजन् गाणपत्यमवाप्नुयात्
26 // tato gaccheta rājendra ikṣunadyāstu saṃgamam / trailokyaviśrutaṃ puṇyaṃ tatra sannihitaḥ śivaḥ / tatra stanātvā naro rājan gāṇapatyamavāpnuyāt
27 ॥ स्कन्दतीर्थं ततो गच्छेत् सर्वपापप्रणाशनम् । आजन्मनः कृतं पापं स्नातस्तीव्रं व्यपोहति
27 // skandatīrthaṃ tato gacchet sarvapāpapraṇāśanam / ājanmanaḥ kṛtaṃ pāpaṃ snātastīvraṃ vyapohati
28 ॥ तत्र देवाः सगन्धर्वा भवात्मजमनुत्तमम् । उपासते महात्मानं स्कन्दं शक्तिधिरं प्रभुम्
28 // tatra devāḥ sagandharvā bhavātmajamanuttamam / upāsate mahātmānaṃ skandaṃ śaktidhiraṃ prabhum
29 ॥ ततो गच्छेदाङ्गिरसं स्नानं तत्र समाचरेत् । गोसहस्रफलं प्राप्य रुद्रलोकं स गच्छति
29 // tato gacchedāṅgirasaṃ snānaṃ tatra samācaret / gosahasraphalaṃ prāpya rudralokaṃ sa gacchati
30 ॥ अङ्गिरा यत्र देवेशं ब्रह्मपुत्रो वृषध्वजम् । तपसाराध्य विश्वेशं लब्धवान् योगमुत्तमम्
30 // aṅgirā yatra deveśaṃ brahmaputro vṛṣadhvajam / tapasārādhya viśveśaṃ labdhavān yogamuttamam
31 ॥ कुशतीर्थं ततो गच्छेत् सर्वपापप्रणाशनम् । स्नानं तत्र प्रकुर्वोत अश्वमेधफलं लभेत्
31 // kuśatīrthaṃ tato gacchet sarvapāpapraṇāśanam / snānaṃ tatra prakurvota aśvamedhaphalaṃ labhet
32 ॥ कोटितीर्थं ततो गच्छेत् सर्वपापप्रणाशनम् । तत्र स्त्रात्वा नरो राज्यं लभते नात्र संशयः
32 // koṭitīrthaṃ tato gacchet sarvapāpapraṇāśanam / tatra strātvā naro rājyaṃ labhate nātra saṃśayaḥ
33 ॥ चन्द्रभागां ततो गच्छेत् स्नानं तत्र समाचरेत् । स्नातमात्रो नरस्तत्र सोमलोके महीयते
33 // candrabhāgāṃ tato gacchet snānaṃ tatra samācaret / snātamātro narastatra somaloke mahīyate
34 ॥ नर्मदादक्षिणे कूले संगमेश्वरमुत्तमम् । तत्र स्नात्वा नरो राजन् सर्वयज्ञफलं लभेत्
34 // narmadādakṣiṇe kūle saṃgameśvaramuttamam / tatra snātvā naro rājan sarvayajñaphalaṃ labhet
35 ॥ नर्मदायोत्तरे कूले तीर्थं परमशोभनम् । आदित्यायतनं रम्यमीश्वरेण तु भाषितम्
35 // narmadāyottare kūle tīrthaṃ paramaśobhanam / ādityāyatanaṃ ramyamīśvareṇa tu bhāṣitam
36 ॥ तत्र स्नात्वा तु राजेन्द्र दत्त्वा दानं तु शक्तितः । तस्य तीर्थप्रभावेण लभते चाक्षयं फलम्
36 // tatra snātvā tu rājendra dattvā dānaṃ tu śaktitaḥ / tasya tīrthaprabhāveṇa labhate cākṣayaṃ phalam
37 ॥ दरिद्रा व्याधिता ये तु ये च दुष्कृतकारिणः । मुच्यन्ते सर्वपापेभ्यः सूर्यलोकं प्रयान्ति च
37 // daridrā vyādhitā ye tu ye ca duṣkṛtakāriṇaḥ / mucyante sarvapāpebhyaḥ sūryalokaṃ prayānti ca
38 ॥ मार्गेश्वरं ततो गच्छेत् स्नानं तत्र समाचरेत् । स्नातमात्रो नरस्तत्र स्वर्गलोकमवाप्नुयात्
38 // mārgeśvaraṃ tato gacchet snānaṃ tatra samācaret / snātamātro narastatra svargalokamavāpnuyāt
39 ॥ ततः पश्चिमतो गच्छेन्मरुदालयमुत्तमम् । तत्र स्नात्वा तु राजेन्द्र शुचिर्भूत्वा प्रयत्नतः
39 // tataḥ paścimato gacchenmarudālayamuttamam / tatra snātvā tu rājendra śucirbhūtvā prayatnataḥ
40 ॥ काञ्चनं तु द्विजो दद्याद् यथाविभवविस्तरम् । पुष्पकेण विमानेन वायुलोकं स गच्छति
40 // kāñcanaṃ tu dvijo dadyād yathāvibhavavistaram / puṣpakeṇa vimānena vāyulokaṃ sa gacchati
41 ॥ ततो गच्छेत राजेन्द्र अहल्यातीर्थमुत्तमम् । स्नानमात्रादप्सरोभिर्मोदते कालमक्षयम्
41 // tato gaccheta rājendra ahalyātīrthamuttamam / snānamātrādapsarobhirmodate kālamakṣayam
42 ॥ चैत्रमासे तु संप्राप्ते शुक्लपक्षे त्रयोदशी । कामदेवदिने तस्मिन्नहल्यां यस्तु पूजयेत्
42 // caitramāse tu saṃprāpte śuklapakṣe trayodaśī / kāmadevadine tasminnahalyāṃ yastu pūjayet
43 ॥ यत्र तत्र नरोत्पन्नो वरस्तत्र प्रियो भवेत् । स्त्रीवल्लभो भवेच्छ्रीमान् कामदेव इवापरः
43 // yatra tatra narotpanno varastatra priyo bhavet / strīvallabho bhavecchrīmān kāmadeva ivāparaḥ
44 ॥ अयोध्यां तु समासाद्य तीर्थं शक्रस्य विश्रुतम् । स्नातमात्रो नरस्तत्र गोसहस्रफलं लभेत्
44 // ayodhyāṃ tu samāsādya tīrthaṃ śakrasya viśrutam / snātamātro narastatra gosahasraphalaṃ labhet
45 ॥ सोमतीर्थं ततो गच्छेत् स्नानं तत्र समाचरेत् । स्नातमात्रो नरस्तत्र सर्वपापैः प्रमुच्यते
45 // somatīrthaṃ tato gacchet snānaṃ tatra samācaret / snātamātro narastatra sarvapāpaiḥ pramucyate
46 ॥ सोमग्रहे तु राजेन्द्र पापक्षयकरं भवेत् । त्रैलोक्यविश्रुतं राजन् सोमतीर्थं महाफलम्
46 // somagrahe tu rājendra pāpakṣayakaraṃ bhavet / trailokyaviśrutaṃ rājan somatīrthaṃ mahāphalam
47 ॥ यस्तु चान्द्रायणं कुर्यात् तत्र तीर्थे समाहितः । सर्वपापविशुद्धात्मा सोमलोकं स गच्छति
47 // yastu cāndrāyaṇaṃ kuryāt tatra tīrthe samāhitaḥ / sarvapāpaviśuddhātmā somalokaṃ sa gacchati
48 ॥ अग्निप्रवेशं यः कुर्यात् सोमतीर्थे नराधिप । जले चानशनं वापि नासौ मर्त्यो ऽभिजायते
48 // agnipraveśaṃ yaḥ kuryāt somatīrthe narādhipa / jale cānaśanaṃ vāpi nāsau martyo 'bhijāyate
49 ॥ स्तम्भतीर्थं ततो गच्छेत् स्नानं तत्र समाचरेत् । स्नातमात्रो नरस्तत्र सोमलोके महीयते
49 // stambhatīrthaṃ tato gacchet snānaṃ tatra samācaret / snātamātro narastatra somaloke mahīyate
50 ॥ ततो गच्छेत राजेन्द्र विष्णुतीर्थमनुत्तमम् । योधनीपुरमाख्यातं विष्णोः स्थानमनुत्तमम्
50 // tato gaccheta rājendra viṣṇutīrthamanuttamam / yodhanīpuramākhyātaṃ viṣṇoḥ sthānamanuttamam
51 ॥ असुरा योधितास्तत्र वासुदेवेन कोटिशः । तत्र तीर्थं समुत्पन्नं विष्णुश्रीको भवेदिह । अहोरात्रोपवासेन ब्रह्महत्यां व्यपोहति
51 // asurā yodhitāstatra vāsudevena koṭiśaḥ / tatra tīrthaṃ samutpannaṃ viṣṇuśrīko bhavediha / ahorātropavāsena brahmahatyāṃ vyapohati
52 ॥ नर्मदादक्षिणे कूले तीर्थं परमशोभनम् । कामतीर्थमिति ख्यातं यत्र कामोर्ऽचयद् भवम्
52 // narmadādakṣiṇe kūle tīrthaṃ paramaśobhanam / kāmatīrthamiti khyātaṃ yatra kāmor'cayad bhavam
53 ॥ तस्मिंस्तीर्थे नरः स्नात्वा उपवासपरायणः । कुसुमायुधरूपेण रुद्रोलोके महीयते
53 // tasmiṃstīrthe naraḥ snātvā upavāsaparāyaṇaḥ / kusumāyudharūpeṇa rudroloke mahīyate
54 ॥ ततो गच्छेत राजेन्द्र ब्रह्मतीर्थमनुत्तमम् । उमाहकमिति ख्यातं तत्र संतर्पयेत् पितॄन्
54 // tato gaccheta rājendra brahmatīrthamanuttamam / umāhakamiti khyātaṃ tatra saṃtarpayet pitṝn
55 ॥ पौर्णमास्याममावास्यां श्र्धं कुर्याद् यथाविधि । गजरूपा शिला तत्र तोयमध्ये व्यवस्थिता
55 // paurṇamāsyāmamāvāsyāṃ śrdhaṃ kuryād yathāvidhi / gajarūpā śilā tatra toyamadhye vyavasthitā
56 ॥ तस्मिंस्तु दापयेत् पिण्डान् वैशाख्यान्तु विशेषतः । स्नात्वा समाहितमना दम्भमात्सर्यवर्जितः । तृप्यन्ति पितरस्तस्य यावत् तिष्ठति मेदिनी
56 // tasmiṃstu dāpayet piṇḍān vaiśākhyāntu viśeṣataḥ / snātvā samāhitamanā dambhamātsaryavarjitaḥ / tṛpyanti pitarastasya yāvat tiṣṭhati medinī
57 ॥ सिद्धेश्वरं ततो गच्छेत् स्नानं तत्र समाचरेत् । स्नातमात्रो नरस्तत्र गाणपत्यपदं लभेत्
57 // siddheśvaraṃ tato gacchet snānaṃ tatra samācaret / snātamātro narastatra gāṇapatyapadaṃ labhet
58 ॥ ततो गच्छेत राजेन्द्र लिङ्गो यत्र जनार्दनः । तत्र स्नात्वा तु राजेन्द्र विष्णुलोके महीयते
58 // tato gaccheta rājendra liṅgo yatra janārdanaḥ / tatra snātvā tu rājendra viṣṇuloke mahīyate
59 ॥ यत्र नारायणो देवो मुनोनां भावितात्मनाम् । स्वात्मानं दर्शयामास लिङ्गं तत् परमं पदम्
59 // yatra nārāyaṇo devo munonāṃ bhāvitātmanām / svātmānaṃ darśayāmāsa liṅgaṃ tat paramaṃ padam
60 ॥ अङ्कोलं तु ततो गच्छेत् सर्वपापविनाशनम् । स्नानं दानं च तत्रैव ब्राह्मणानां च भोजनम् । पिण्डप्रिदानं च कृतं प्रेत्यानन्तफलप्रदम्
60 // aṅkolaṃ tu tato gacchet sarvapāpavināśanam / snānaṃ dānaṃ ca tatraiva brāhmaṇānāṃ ca bhojanam / piṇḍapridānaṃ ca kṛtaṃ pretyānantaphalapradam
61 ॥ त्रैयम्बकेन तोयेन यश्चरुं श्रपयेत् ततः । अङ्कोलमूले दद्याच्च पिण्डांश्चैव यथाविधि । तारिताः पितरस्तेन तृप्यन्त्याचन्द्रतारकम्
61 // traiyambakena toyena yaścaruṃ śrapayet tataḥ / aṅkolamūle dadyācca piṇḍāṃścaiva yathāvidhi / tāritāḥ pitarastena tṛpyantyācandratārakam
62 ॥ ततो गच्छेत राजेन्द्र तापसेश्वरमुत्तमम् । तत्र स्नात्वा तु राजेन्द्र प्राप्नुयात् तपसः फलम्
62 // tato gaccheta rājendra tāpaseśvaramuttamam / tatra snātvā tu rājendra prāpnuyāt tapasaḥ phalam
63 ॥ शुक्लतीर्थं ततो गच्छेत् सर्वपापविनाशनम् । नास्ति तेन सम तीर्थं नर्मदायां युधिष्ठिर
63 // śuklatīrthaṃ tato gacchet sarvapāpavināśanam / nāsti tena sama tīrthaṃ narmadāyāṃ yudhiṣṭhira
64 ॥ दर्शनात् स्पर्शनात् तस्य स्नानदानतपोजपात् । होमाच्चैवोपवासाच्च शुक्लतीर्थे महत् फलम्
64 // darśanāt sparśanāt tasya snānadānatapojapāt / homāccaivopavāsācca śuklatīrthe mahat phalam
65 ॥ योजनं तत् स्मृतं क्षेत्रं देवगन्धर्वसेवितम् । शुक्लतीर्थमिति ख्यातं सर्वपापविनाशनम्
65 // yojanaṃ tat smṛtaṃ kṣetraṃ devagandharvasevitam / śuklatīrthamiti khyātaṃ sarvapāpavināśanam
66 ॥ पादपाग्रेण दृष्टेन ब्रह्महत्यां व्यपोहति । देव्या सह सदा भर्गस्तत्र तिष्ठति शङ्करः
66 // pādapāgreṇa dṛṣṭena brahmahatyāṃ vyapohati / devyā saha sadā bhargastatra tiṣṭhati śaṅkaraḥ
67 ॥ कृष्णपक्षे चतुर्दश्यां वैशाखे मासि सुव्रत । कैलासाच्चाभिनिष्क्रम्य तत्र सन्निहितो हरः
67 // kṛṣṇapakṣe caturdaśyāṃ vaiśākhe māsi suvrata / kailāsāccābhiniṣkramya tatra sannihito haraḥ
68 ॥ देवदानवगन्धर्वाः सिद्धविद्याधरास्तथा । गणाश्चाप्सरसां नागास्तत्र तिष्ठन्ति पुङ्गव
68 // devadānavagandharvāḥ siddhavidyādharāstathā / gaṇāścāpsarasāṃ nāgāstatra tiṣṭhanti puṅgava
69 ॥ रजकेन यथा वस्त्रं शुक्लं भवति वारिणा । आजन्मनि कृतं पापं शुक्लतीर्थे व्यपोहति । स्नानं दानं तपः श्राद्धमनन्तं तत्र दृश्यते
69 // rajakena yathā vastraṃ śuklaṃ bhavati vāriṇā / ājanmani kṛtaṃ pāpaṃ śuklatīrthe vyapohati / snānaṃ dānaṃ tapaḥ śrāddhamanantaṃ tatra dṛśyate
70 ॥ शुक्लतीर्थात् परं तीर्थं न भूतं न भविष्यति । पूर्वे वयसि कर्माणि कृत्वा पापानि मानवः । अहोरात्रोपवासेन शुक्लतीर्थे व्यपोहति
70 // śuklatīrthāt paraṃ tīrthaṃ na bhūtaṃ na bhaviṣyati / pūrve vayasi karmāṇi kṛtvā pāpāni mānavaḥ / ahorātropavāsena śuklatīrthe vyapohati
71 ॥ कार्तिकस्य तु मासस्य कृष्णपक्षे चतुर्दशी । घृतेन स्नापयेद् देवमुपोष्य परमेश्वरम् । एकविंशत्कुलोपेतो न च्यवेदैश्वरात् पदात्
71 // kārtikasya tu māsasya kṛṣṇapakṣe caturdaśī / ghṛtena snāpayed devamupoṣya parameśvaram / ekaviṃśatkulopeto na cyavedaiśvarāt padāt
72 ॥ तपसा ब्रह्मचर्येण यज्ञदानेन वा पुनः । न तां गतिमवाप्नोति शुक्लतीर्थे तु यां लभेत्
72 // tapasā brahmacaryeṇa yajñadānena vā punaḥ / na tāṃ gatimavāpnoti śuklatīrthe tu yāṃ labhet
73 ॥ शुक्लतीर्थं महातीर्थमृषिसिद्धनिषेवितम् । तत्र स्नात्वा नरो राजन् पुनर्जन्म न विन्दति
73 // śuklatīrthaṃ mahātīrthamṛṣisiddhaniṣevitam / tatra snātvā naro rājan punarjanma na vindati
74 ॥ अयने वा चतुर्दश्यां संक्रान्तौ विषुवे तथा । स्नात्वा तु सोपवासः सन् विजितात्मा समाहितः
74 // ayane vā caturdaśyāṃ saṃkrāntau viṣuve tathā / snātvā tu sopavāsaḥ san vijitātmā samāhitaḥ
75 ॥ दानं दद्याद् यथाशक्ति प्रीयेतां हरिशङ्करौ । एतत् तीर्थप्रभावेण सर्वं भवति चाक्षयम्
75 // dānaṃ dadyād yathāśakti prīyetāṃ hariśaṅkarau / etat tīrthaprabhāveṇa sarvaṃ bhavati cākṣayam
76 ॥ अनाथं दुर्गतं विप्रं नाथवन्तमथापि वा । उद्वादयति यस्तीर्थे तस्य पुण्यफलं शृणु
76 // anāthaṃ durgataṃ vipraṃ nāthavantamathāpi vā / udvādayati yastīrthe tasya puṇyaphalaṃ śṛṇu
77 ॥ यावत् तद्रोमसंख्या तु तत्प्रसूतिकुलेषु च । तावद् वर्षसहस्राणि रुद्रलोके महीयते
77 // yāvat tadromasaṃkhyā tu tatprasūtikuleṣu ca / tāvad varṣasahasrāṇi rudraloke mahīyate
78 ॥ ततो गच्छेत राजेन्द्र यमतीर्थ मनुत्तमम् । कृष्णपक्षे चतुर्दश्यां माघमासे युधिष्ठिर । स्नानं कृत्वा नक्तभीजी न पश्येद् योनिसङ्कटम्
78 // tato gaccheta rājendra yamatīrtha manuttamam / kṛṣṇapakṣe caturdaśyāṃ māghamāse yudhiṣṭhira / snānaṃ kṛtvā naktabhījī na paśyed yonisaṅkaṭam
79 ॥ ततो गच्छेत राजेन्द्र एरण्डीतीर्थमुत्तमम् । संगमे तु नरः स्नायादुपवासपरायणः । ब्राह्मणं भोजयेदेकं कोटिर्भवति भोजिताः
79 // tato gaccheta rājendra eraṇḍītīrthamuttamam / saṃgame tu naraḥ snāyādupavāsaparāyaṇaḥ / brāhmaṇaṃ bhojayedekaṃ koṭirbhavati bhojitāḥ
80 ॥ एरण्डीसंगमे स्नात्वा भक्तिभावात् तुरञ्जितः । मृत्तिकां शिरसि स्थाप्य अवगाह्य च तज्जलम् । नर्मदोदकसंमिश्रं मुच्यते सर्वकिल्बिषैः
80 // eraṇḍīsaṃgame snātvā bhaktibhāvāt turañjitaḥ / mṛttikāṃ śirasi sthāpya avagāhya ca tajjalam / narmadodakasaṃmiśraṃ mucyate sarvakilbiṣaiḥ
81 ॥ ततो गच्छेत राजेन्द्र तीर्थं कार्णाटिकेश्वरम् । गङ्गावतरते तत्र दिने पुण्ये न संशयः
81 // tato gaccheta rājendra tīrthaṃ kārṇāṭikeśvaram / gaṅgāvatarate tatra dine puṇye na saṃśayaḥ
82 ॥ तत्र स्नात्वा च पीत्वा च दत्त्वा चैव यथाविधि । सर्वपापविनिर्मुक्तो ब्रह्मलोके महीयते
82 // tatra snātvā ca pītvā ca dattvā caiva yathāvidhi / sarvapāpavinirmukto brahmaloke mahīyate
83 ॥ नन्दितीर्थं ततो गच्छेत् स्नानं तत्र समाचरेत् । प्रीयते तस्य नन्दीशः सोमलोके महीयते
83 // nanditīrthaṃ tato gacchet snānaṃ tatra samācaret / prīyate tasya nandīśaḥ somaloke mahīyate
84 ॥ ततो गच्छेत राजेन्द्र तीर्थं त्वनरकं शुभम् । तत्र स्नात्वा नरो राजन् नरकं नैव पश्यति
84 // tato gaccheta rājendra tīrthaṃ tvanarakaṃ śubham / tatra snātvā naro rājan narakaṃ naiva paśyati
85 ॥ तस्मिंस्तीर्थे तु राजेन्द्र स्वान्यस्थीनि विनिक्षिपेत् । रूपवान् जायते लोके धनभोगसमन्वितः
85 // tasmiṃstīrthe tu rājendra svānyasthīni vinikṣipet / rūpavān jāyate loke dhanabhogasamanvitaḥ
86 ॥ ततो गच्छेत राजेन्द्र कपिलातीर्थ मुत्तमम् । तत्र स्नात्वा नरो राजन् गोसहस्रफलं लभेत्
86 // tato gaccheta rājendra kapilātīrtha muttamam / tatra snātvā naro rājan gosahasraphalaṃ labhet
87 ॥ ज्येष्ठमासे तु संप्राप्ते चतुर्दश्यां विशेषतः । तत्रोपोष्य नरो भक्त्या दद्याद् दीपं घृतेन तु
87 // jyeṣṭhamāse tu saṃprāpte caturdaśyāṃ viśeṣataḥ / tatropoṣya naro bhaktyā dadyād dīpaṃ ghṛtena tu
88 ॥ घृतेन स्नापयेद् रुद्रं सघृतं श्रीफलं दहेत् । घण्टाभरणसंयुक्तां कपिलां वै प्रदापयेत्
88 // ghṛtena snāpayed rudraṃ saghṛtaṃ śrīphalaṃ dahet / ghaṇṭābharaṇasaṃyuktāṃ kapilāṃ vai pradāpayet
89 ॥ सर्वाभरणसंयुक्तः सर्वदेवनमस्कृतः । शिवतुल्यबलो भूत्वा शिववत् क्रीडते चिरम्
89 // sarvābharaṇasaṃyuktaḥ sarvadevanamaskṛtaḥ / śivatulyabalo bhūtvā śivavat krīḍate ciram
90 ॥ अङ्गारकदिने प्राप्ते चतुर्थ्यां तु विशेषतः । स्नापयित्वा शिवं दद्याद् ब्राह्मणेभ्यस्तु भोजनम्
90 // aṅgārakadine prāpte caturthyāṃ tu viśeṣataḥ / snāpayitvā śivaṃ dadyād brāhmaṇebhyastu bhojanam
91 ॥ सर्वभोगसमायुक्तो विमानैः सार्वकामिकैः । गत्वा शक्रस्य भवनं शक्रेण सह मोदते
91 // sarvabhogasamāyukto vimānaiḥ sārvakāmikaiḥ / gatvā śakrasya bhavanaṃ śakreṇa saha modate
92 ॥ ततः स्वर्गात् परिभ्रष्टो धनवान् भोगवान् भवेत् । अङ्गारकनवम्यां तु अमावास्यां तथैव च । स्नापयेत् तत्र यत्नेन रूपवान् सुभगो भवेत्
92 // tataḥ svargāt paribhraṣṭo dhanavān bhogavān bhavet / aṅgārakanavamyāṃ tu amāvāsyāṃ tathaiva ca / snāpayet tatra yatnena rūpavān subhago bhavet
93 ॥ ततो गच्छेत राजेन्द्र गणेश्वरमनुत्तमम् । श्रावणे मासी संप्राप्ते कृष्णपक्षे चतुर्दशी
93 // tato gaccheta rājendra gaṇeśvaramanuttamam / śrāvaṇe māsī saṃprāpte kṛṣṇapakṣe caturdaśī
94 ॥ स्नातमात्रो नरस्तत्र रुद्रलोके महीयते । पितॄणां तर्पणं कृत्वा मुच्यते ऽसावॄणत्रयात्
94 // snātamātro narastatra rudraloke mahīyate / pitṝṇāṃ tarpaṇaṃ kṛtvā mucyate 'sāvṝṇatrayāt
95 ॥ गङ्गेश्वरसमीपे तु गङ्गावदनमुत्तमम् । अकामो वा सकामो वा तत्र स्नात्वा तु मानवः । आजन्मजनितैः पापैर्मुच्यते नात्र संशयः
95 // gaṅgeśvarasamīpe tu gaṅgāvadanamuttamam / akāmo vā sakāmo vā tatra snātvā tu mānavaḥ / ājanmajanitaiḥ pāpairmucyate nātra saṃśayaḥ
96 ॥ तस्य वै पश्चिमे देशे समीपे नातिदूरतः । दशाश्वमेधिकं तीर्थं त्रिषु लोकेषु विश्रुतम्
96 // tasya vai paścime deśe samīpe nātidūrataḥ / daśāśvamedhikaṃ tīrthaṃ triṣu lokeṣu viśrutam
97 ॥ उपोष्य रजनीमेकां मासि भाद्रपदे शुभे । अमावस्यां नरः स्नात्वा पूजयेद् वृषभध्वजम्
97 // upoṣya rajanīmekāṃ māsi bhādrapade śubhe / amāvasyāṃ naraḥ snātvā pūjayed vṛṣabhadhvajam
98 ॥ काञ्चनेन विमानेन किङ्किणीजालमालिना । गत्वा रुद्रपुरं रम्यं रुद्रेण सह मोदते
98 // kāñcanena vimānena kiṅkiṇījālamālinā / gatvā rudrapuraṃ ramyaṃ rudreṇa saha modate
99 ॥ सर्वत्र सर्वदिवसे स्नानं तत्र समाचरेत् । पितॄणां तर्पणं कुर्यादश्वमेधफलं लभेत्
99 // sarvatra sarvadivase snānaṃ tatra samācaret / pitṝṇāṃ tarpaṇaṃ kuryādaśvamedhaphalaṃ labhet