25 ॥ इति श्रीबृहन्नारदीयपुराणोत्तरभागे मोहिनीसंमोहनं नाम त्रयोदशो ऽध्यायः वसिष्ठ उवाच संप्रस्थितावुभौ राजन्गिरिशीर्षाद्धरातलम् । पश्यमानौ बहून्भावान्गिरिजातान्मनोहरमनोहरान्
25 // iti śrībṛhannāradīyapurāṇottarabhāge mohinīsaṃmohanaṃ nāma trayodaśo 'dhyāyaḥ vasiṣṭha uvāca saṃprasthitāvubhau rājangiriśīrṣāddharātalam / paśyamānau bahūnbhāvāngirijātānmanoharamanoharān
1 ॥ केचिद्विद्रुमसंकाशाः केचिद्रजतसन्निभाः । केचिन्नीलसमप्रख्याः केचित्काञ्चनसत्विषः
1 // kecidvidrumasaṃkāśāḥ kecidrajatasannibhāḥ / kecinnīlasamaprakhyāḥ kecitkāñcanasatviṣaḥ
2 ॥ केचित्स्फाटिकवर्णाभा हरितालनिभाः परे । अन्योन्यश्लेषतां प्राप्तौ सकलैः स्थावरैरिव
2 // kecitsphāṭikavarṇābhā haritālanibhāḥ pare / anyonyaśleṣatāṃ prāptau sakalaiḥ sthāvarairiva
3 ॥ सप्राप्य वसुधां भूपो ह्यपश्यद्वाजिनां वरम् । खन्यमानं खुरेणोर्वी कुलिशाभेन वेगिना
3 // saprāpya vasudhāṃ bhūpo hyapaśyadvājināṃ varam / khanyamānaṃ khureṇorvī kuliśābhena veginā
4 ॥ तस्य दारयतः पृथ्वीं सुतीक्ष्णेन खुरेण हि । गृहगोधाभवत्तस्मिन् भूभागान्तर्गता किल
4 // tasya dārayataḥ pṛthvīṃ sutīkṣṇena khureṇa hi / gṛhagodhābhavattasmin bhūbhāgāntargatā kila
5 ॥ निर्गच्छमाना नृपते खुरेण विदलीकृता । विदीर्यमाणां नृपतिरपश्यत्स दयापरः
5 // nirgacchamānā nṛpate khureṇa vidalīkṛtā / vidīryamāṇāṃ nṛpatirapaśyatsa dayāparaḥ
6 ॥ अभ्यधावत वेगेन हा हतेति प्रियां वदन् । ततः स वृक्षपत्रेण कोमलेन महीपतिः
6 // abhyadhāvata vegena hā hateti priyāṃ vadan / tataḥ sa vṛkṣapatreṇa komalena mahīpatiḥ
7 ॥ उत्सार्य तां खुरादाशु प्राक्षिपत्तृणशाद्वले । ततस्तु मोहिनीं प्राह प्रेक्ष्य मूर्च्छागतां हि ताम्
7 // utsārya tāṃ khurādāśu prākṣipattṛṇaśādvale / tatastu mohinīṃ prāha prekṣya mūrcchāgatāṃ hi tām
8 ॥ शीघ्रमाहर चार्वङ्गिजलं जलजलोचने । येन मूर्च्छागतां सिंचे गृहगोधां विमर्द्दिताम्
8 // śīghramāhara cārvaṅgijalaṃ jalajalocane / yena mūrcchāgatāṃ siṃce gṛhagodhāṃ vimardditām
9 ॥ सा भर्तुर्वचनाच्छीघ्रमानयच्छीतलं जलम् । तेनाभ्यषिं चन्नृपतिर्गृहगोधां विमूर्च्छिताम्
9 // sā bharturvacanācchīghramānayacchītalaṃ jalam / tenābhyaṣiṃ cannṛpatirgṛhagodhāṃ vimūrcchitām
10 ॥ अवाप चेतनां राजन् शीतलाज्जलसेचनात् । अभिघातेषु सर्वेषु शस्तं वारिप्रसेचनम्
10 // avāpa cetanāṃ rājan śītalājjalasecanāt / abhighāteṣu sarveṣu śastaṃ vāriprasecanam
11 ॥ अथवा क्लिन्नवस्त्रेण सहसा बन्धनं हितम् । संप्राप्तचेतना भूप गोधा वचनमब्रवीत्
11 // athavā klinnavastreṇa sahasā bandhanaṃ hitam / saṃprāptacetanā bhūpa godhā vacanamabravīt
12 ॥ राजानमग्रतो वीक्ष्य वेदनार्ता शनैः शनैः । रुक्माङ्गद महाबाहो निबोध मम चेष्टितम्
12 // rājānamagrato vīkṣya vedanārtā śanaiḥ śanaiḥ / rukmāṅgada mahābāho nibodha mama ceṣṭitam
13 ॥ शाकले नगरे रम्ये भार्याहं ह्यग्रजन्मनः । रूपयौवनसंपन्ना तस्य नातिप्रिया विभो
13 // śākale nagare ramye bhāryāhaṃ hyagrajanmanaḥ / rūpayauvanasaṃpannā tasya nātipriyā vibho
14 ॥ सदा विद्वेषसंयुक्तो मयि निष्ठुरजल्पकः । नान्यस्य कस्यचिद्द्वेष्टा स तु मे नृपते पतिः
14 // sadā vidveṣasaṃyukto mayi niṣṭhurajalpakaḥ / nānyasya kasyaciddveṣṭā sa tu me nṛpate patiḥ
15 ॥ ततो ऽह क्रोधसंयुक्ता वशीकरणलंभनात् । अपृच्छं प्रमदा राजन्यास्त्यक्ताः पतिभिः किल
15 // tato 'ha krodhasaṃyuktā vaśīkaraṇalaṃbhanāt / apṛcchaṃ pramadā rājanyāstyaktāḥ patibhiḥ kila
16 ॥ ताभिरुक्ता ह्यहं भूप वश्यो भर्ता भविष्यति । अस्माकं प्रत्ययो जातो भर्तृत्यागावमाननात्
16 // tābhiruktā hyahaṃ bhūpa vaśyo bhartā bhaviṣyati / asmākaṃ pratyayo jāto bhartṛtyāgāvamānanāt
17 ॥ प्रव्रज्याभेषजैर्वश्या जाता हि पतयस्तु नः । त्वं पृच्छ तां वरारोहे दास्यते भेषजं शुभम्
17 // pravrajyābheṣajairvaśyā jātā hi patayastu naḥ / tvaṃ pṛccha tāṃ varārohe dāsyate bheṣajaṃ śubham
18 ॥ न विकल्पस्त्वया कार्यो भविता दासवत्पतिः । ततो ऽहं त्वरितं गत्वा तासां वाक्येन भूपते
18 // na vikalpastvayā kāryo bhavitā dāsavatpatiḥ / tato 'haṃ tvaritaṃ gatvā tāsāṃ vākyena bhūpate
19 ॥ प्रासादः कथितस्तस्याः पृच्छन्त्या मम मानवैः । शतस्तंभसमायुक्तः कान्तिमत्सुधया युतः
19 // prāsādaḥ kathitastasyāḥ pṛcchantyā mama mānavaiḥ / śatastaṃbhasamāyuktaḥ kāntimatsudhayā yutaḥ
20 ॥ प्रविश्य तं सुतेजस्कामपश्यं ब्रह्यचारिणीम् । प्रावृतां दीर्घवस्त्रेण सन्ध्यारागसवर्णिनीम्
20 // praviśya taṃ sutejaskāmapaśyaṃ brahyacāriṇīm / prāvṛtāṃ dīrghavastreṇa sandhyārāgasavarṇinīm
21 ॥ दीर्घाभिः सा जटाभिस्तु संवृता दीप्तिसयुता । परिचारकैस्तु संयुक्ता वीज्यमाना शनैः शनैः
21 // dīrghābhiḥ sā jaṭābhistu saṃvṛtā dīptisayutā / paricārakaistu saṃyuktā vījyamānā śanaiḥ śanaiḥ
22 ॥ अक्षसूत्रकरा सा तु जपन्ती भगमालिनी । सर्ववश्यकरं मन्त्रं क्षोभकं प्रत्ययावहम्
22 // akṣasūtrakarā sā tu japantī bhagamālinī / sarvavaśyakaraṃ mantraṃ kṣobhakaṃ pratyayāvaham
23 ॥ ततो ऽहं प्रणता भूत्वा पद्भ्यां न्यस्याङ्गलीयकम् । मृदुकाञ्चनसंभूतं अतिरिक्तप्रभान्वितम्
23 // tato 'haṃ praṇatā bhūtvā padbhyāṃ nyasyāṅgalīyakam / mṛdukāñcanasaṃbhūtaṃ atiriktaprabhānvitam
24 ॥ ततो हृष्टाभवद्दृष्ट्वा पदस्थं चाङ्गुलीयकम् । अपृष्टया तया ज्ञातं मम भर्त्तुर्विमाननम्
24 // tato hṛṣṭābhavaddṛṣṭvā padasthaṃ cāṅgulīyakam / apṛṣṭayā tayā jñātaṃ mama bhartturvimānanam
25 ॥ तयोक्ताहं ततो भूप तापस्या प्रणता स्थिता । चूर्णो रक्षान्वितो ह्येष सर्वभूतवशानुगः
25 // tayoktāhaṃ tato bhūpa tāpasyā praṇatā sthitā / cūrṇo rakṣānvito hyeṣa sarvabhūtavaśānugaḥ
26 ॥ त्वया भर्तरि संयोज्यो रक्ष्यं ग्रीवाशयाङ्कुरम् । भविष्यति पतिर्वश्यो नान्यां यास्यति सुन्दरीम्
26 // tvayā bhartari saṃyojyo rakṣyaṃ grīvāśayāṅkuram / bhaviṣyati patirvaśyo nānyāṃ yāsyati sundarīm
27 ॥ चूर्णरक्षां गृहीत्वाहं प्राप्ताभर्तृगृहं पुनः । प्रदोषे पयसा युक्तश्चूर्णो भर्तरि योजितः
27 // cūrṇarakṣāṃ gṛhītvāhaṃ prāptābhartṛgṛhaṃ punaḥ / pradoṣe payasā yuktaścūrṇo bhartari yojitaḥ
28 ॥ ग्रीवायां हि कृता रक्षा न विचारो मया कृतः । यदा स पीतचूर्णस्तु भर्ता नृपवरोत्तमा
28 // grīvāyāṃ hi kṛtā rakṣā na vicāro mayā kṛtaḥ / yadā sa pītacūrṇastu bhartā nṛpavarottamā
29 ॥ तदहः क्षयरोगो ऽभूत्पतिः क्षीणो दिने दिने । गुह्ये तु क्रिमयो जाताः क्षतदुष्टव्रणोद्भवाः
29 // tadahaḥ kṣayarogo 'bhūtpatiḥ kṣīṇo dine dine / guhye tu krimayo jātāḥ kṣataduṣṭavraṇodbhavāḥ
30 ॥ दिनैः कतिपयैर्जातैर्दीपवद्रविदर्शनात् । हततेजास्तथा भर्त्ता मामुवाचाकुलेन्द्रियः
30 // dinaiḥ katipayairjātairdīpavadravidarśanāt / hatatejāstathā bharttā māmuvācākulendriyaḥ
31 ॥ क्रन्दमानो दिवा रात्रौ दासो ऽस्मि तव शोभने । त्राहि मां शरणं प्राप्तं न गच्छेयं परिस्त्रियम्
31 // krandamāno divā rātrau dāso 'smi tava śobhane / trāhi māṃ śaraṇaṃ prāptaṃ na gaccheyaṃ paristriyam
32 ॥ तत्तस्य रुदितं श्रुत्वा भयभीता महीपते । तस्यां निवेदितं सर्वं कथं भर्ता भवेत्सुखी
32 // tattasya ruditaṃ śrutvā bhayabhītā mahīpate / tasyāṃ niveditaṃ sarvaṃ kathaṃ bhartā bhavetsukhī
33 ॥ तयापि भेषजं दत्तं द्वितीयं दाहशान्तये । दत्ते तु भेषजे तस्मिन्सुस्थो ऽभूत्तत्क्षणात्पतिः
33 // tayāpi bheṣajaṃ dattaṃ dvitīyaṃ dāhaśāntaye / datte tu bheṣaje tasminsustho 'bhūttatkṣaṇātpatiḥ
34 ॥ पूर्वचूर्णोद्भवो दाहः शान्तस्तेनौषधेन ह । ततः प्रभृति मे भर्ता वश्यो ऽभूद्वचने स्थितः
34 // pūrvacūrṇodbhavo dāhaḥ śāntastenauṣadhena ha / tataḥ prabhṛti me bhartā vaśyo 'bhūdvacane sthitaḥ
35 ॥ कालेन पञ्चतां प्राप्ता गता नरकयातनाम् । ताम्रभ्राष्ट्रे ह्यहं दग्धा युगानि दश पञ्च च
35 // kālena pañcatāṃ prāptā gatā narakayātanām / tāmrabhrāṣṭre hyahaṃ dagdhā yugāni daśa pañca ca
36 ॥ सूक्ष्माणि तिलमात्राणि कृत्वा खण्डान्यनेकशः । किञ्चित्पातकशेषेण धरायामवतारिता
36 // sūkṣmāṇi tilamātrāṇi kṛtvā khaṇḍānyanekaśaḥ / kiñcitpātakaśeṣeṇa dharāyāmavatāritā
37 ॥ गृहगोधामयं रूपं कृतं भास्करजेन मे । साहमत्र स्थिता भूप वर्षाणामयुतं पुरा
37 // gṛhagodhāmayaṃ rūpaṃ kṛtaṃ bhāskarajena me / sāhamatra sthitā bhūpa varṣāṇāmayutaṃ purā
38 ॥ यान्यापि युवतिर्भूप भर्तुर्वश्यं समाचरेत् । वृथाधर्मा दुराचारा दह्यते ताम्रभ्राष्ट्रके
38 // yānyāpi yuvatirbhūpa bharturvaśyaṃ samācaret / vṛthādharmā durācārā dahyate tāmrabhrāṣṭrake
39 ॥ भर्ता नाथो गतिर्भर्ता दैवतं गुरुरेव च । तस्य वश्यं चरेद्या तु सा कथं सुखमाप्नुयात्
39 // bhartā nātho gatirbhartā daivataṃ gurureva ca / tasya vaśyaṃ caredyā tu sā kathaṃ sukhamāpnuyāt
40 ॥ तिर्यग्योनिशतं याति क्रिमिकुष्ठसमन्विता । तस्माद्भूपाल कर्तव्यं स्त्रीभिर्भर्तृवचः सदा
40 // tiryagyoniśataṃ yāti krimikuṣṭhasamanvitā / tasmādbhūpāla kartavyaṃ strībhirbhartṛvacaḥ sadā
41 ॥ साहं यास्ये पुनर्योनिं कुत्सितां पातकान्विताम् । यदि नोद्धरसे राजन्नद्य मां शरणागताम्
41 // sāhaṃ yāsye punaryoniṃ kutsitāṃ pātakānvitām / yadi noddharase rājannadya māṃ śaraṇāgatām
42 ॥ सुकृतस्य प्रदानेन विजयाजनितेन हि । या त्वया संगमे पुण्ये कृता श्रवणद्वादशी
42 // sukṛtasya pradānena vijayājanitena hi / yā tvayā saṃgame puṇye kṛtā śravaṇadvādaśī
43 ॥ सरय्वाश्चैव गङ्गायाः पापनाशविधायके । प्रेतनिर्यातनी पुण्या मानसेप्सितदायिनी
43 // sarayvāścaiva gaṅgāyāḥ pāpanāśavidhāyake / pretaniryātanī puṇyā mānasepsitadāyinī
44 ॥ यस्यां गृहे ऽपि भूपाल संस्मृतो मनुजैर्हरिः । सर्वतीर्थफलावाप्तिं कुरुते नात्र संशयः
44 // yasyāṃ gṛhe 'pi bhūpāla saṃsmṛto manujairhariḥ / sarvatīrthaphalāvāptiṃ kurute nātra saṃśayaḥ
45 ॥ दत्तं जप्तं हुतं यच्च कृतं देवार्चनादिकम् । सर्वं तदक्षयं भूप यत्कृतं विजयादिने
45 // dattaṃ japtaṃ hutaṃ yacca kṛtaṃ devārcanādikam / sarvaṃ tadakṣayaṃ bhūpa yatkṛtaṃ vijayādine
46 ॥ एवंविधं फलं यस्यास्तद्देहि सुकृतं मम । द्वादश्यामुपवासेन त्रयोदश्यां तु पारणे
46 // evaṃvidhaṃ phalaṃ yasyāstaddehi sukṛtaṃ mama / dvādaśyāmupavāsena trayodaśyāṃ tu pāraṇe
47 ॥ द्वादशाब्दोपवासस्य फलं प्राप्तोत्युपोषणे । दयां कृत्वा महीपाल धर्ममूर्तिर्भवान् क्षितौ
47 // dvādaśābdopavāsasya phalaṃ prāptotyupoṣaṇe / dayāṃ kṛtvā mahīpāla dharmamūrtirbhavān kṣitau
48 ॥ वैवस्वतपथध्वंसी परित्राहि सुदुःखिताम् । गृहगोधावचः श्रुत्वा मोहिनी वाक्यमब्रवीत्
48 // vaivasvatapathadhvaṃsī paritrāhi suduḥkhitām / gṛhagodhāvacaḥ śrutvā mohinī vākyamabravīt
49 ॥ स्वकृतं तु जनो ऽश्नाति सुखदुःखात्मकं बिभो । तस्मात्किमनया कार्यं पापया भर्तुदुष्टया
49 // svakṛtaṃ tu jano 'śnāti sukhaduḥkhātmakaṃ bibho / tasmātkimanayā kāryaṃ pāpayā bhartuduṣṭayā
50 ॥ यया भर्ता वशं नीतो रक्षाचूर्णादिभिर्नृप । साधुभ्यो यत्कृतं राजन्यशःस्वर्गकरं भवेत्
50 // yayā bhartā vaśaṃ nīto rakṣācūrṇādibhirnṛpa / sādhubhyo yatkṛtaṃ rājanyaśaḥsvargakaraṃ bhavet
51 ॥ उभयोर्भ्रं शतामेति पापेभ्यो यत्कृतं भवेत् । शर्करामिश्रितं क्षीरं काद्रवेये नियोजितम्
51 // ubhayorbhraṃ śatāmeti pāpebhyo yatkṛtaṃ bhavet / śarkarāmiśritaṃ kṣīraṃ kādraveye niyojitam
52 ॥ विषवृद्धिं करोत्येव तद्वत्पापकृतं भवेत् । परित्यजेमां त्वं पापां गच्छावो नगराय वै
52 // viṣavṛddhiṃ karotyeva tadvatpāpakṛtaṃ bhavet / parityajemāṃ tvaṃ pāpāṃ gacchāvo nagarāya vai
53 ॥ जन्मव्यापारसक्तानामात्मसौख्यं विनश्यति । रुक्माङ्गद उवाच ब्रह्मात्मजे कथं वाक्यमीदृशं व्याहृतदं त्वया । न साधूनामिदं वृत्तं भवतीति वरानने
53 // janmavyāpārasaktānāmātmasaukhyaṃ vinaśyati / rukmāṅgada uvāca brahmātmaje kathaṃ vākyamīdṛśaṃ vyāhṛtadaṃ tvayā / na sādhūnāmidaṃ vṛttaṃ bhavatīti varānane
54 ॥ आत्मसौख्यकराः पापा भवन्ति परतापिनः । विप्रपन्ना वरारोहे परोपकरणाय वै
54 // ātmasaukhyakarāḥ pāpā bhavanti paratāpinaḥ / viprapannā varārohe paropakaraṇāya vai
55 ॥ शशी सूर्यो ऽथ पर्जन्यो मेदिनी हुतभुग्जलम् । चन्दनं पादपाः संतः परोपकरणाय वै
55 // śaśī sūryo 'tha parjanyo medinī hutabhugjalam / candanaṃ pādapāḥ saṃtaḥ paropakaraṇāya vai
56 ॥ श्रूयते किल राजासीद्धरिश्चन्द्रो वरानने । चाण्डालमन्दिरावासी भार्यातनयविक्रयी
56 // śrūyate kila rājāsīddhariścandro varānane / cāṇḍālamandirāvāsī bhāryātanayavikrayī
57 ॥ असत्यवचनाद्भीतो दुःखाद्दुःखतरं गतः । तस्य सत्येन संतुष्टादेवाः शक्रपुरोगमाः
57 // asatyavacanādbhīto duḥkhādduḥkhataraṃ gataḥ / tasya satyena saṃtuṣṭādevāḥ śakrapurogamāḥ
58 ॥ वरेण छन्दयाञ्चक्रुर्हरिश्चन्द्रं महीपतिम् । तेन सत्यवता चोक्ता देवा ब्रह्मपुरोगमाः । यदि तुष्टा हि विबुधा वरं मे दातुमर्हथ
58 // vareṇa chandayāñcakrurhariścandraṃ mahīpatim / tena satyavatā coktā devā brahmapurogamāḥ / yadi tuṣṭā hi vibudhā varaṃ me dātumarhatha
59 ॥ एषा हि नगरी सर्वा सद्रुमा ससरीसृपा । सबालवृद्धतरुणा सनारी सचतुष्पदा
59 // eṣā hi nagarī sarvā sadrumā sasarīsṛpā / sabālavṛddhataruṇā sanārī sacatuṣpadā
60 ॥ प्रयातु कृतपापापिस्वर्गतिं नगरी मम । अयोध्यापातकं गृह्य गन्ताहं नरकं ध्रुवम्
60 // prayātu kṛtapāpāpisvargatiṃ nagarī mama / ayodhyāpātakaṃ gṛhya gantāhaṃ narakaṃ dhruvam
61 ॥ एकाकी नहि गच्छामि परित्यज्य जनं क्षितौ । स्वर्गं विबुधशार्दूलाः सत्यमेतन्मयेरितम्
61 // ekākī nahi gacchāmi parityajya janaṃ kṣitau / svargaṃ vibudhaśārdūlāḥ satyametanmayeritam
62 ॥ तस्य तां स्थिरतां ज्ञात्वा सह तेनैव सा पुरी । जगाम स्वर्गलोकं च इन्द्रादीनामनुज्ञया
62 // tasya tāṃ sthiratāṃ jñātvā saha tenaiva sā purī / jagāma svargalokaṃ ca indrādīnāmanujñayā
63 ॥ सो ऽपि स्वर्गे स्थितो राजा स्वपुरेण समन्वितः । कामगेन विमानेन पूज्यमानो ऽमरैरपि
63 // so 'pi svarge sthito rājā svapureṇa samanvitaḥ / kāmagena vimānena pūjyamāno 'marairapi
64 ॥ अस्थिदानं कृतं देवि कृपया हि दधीचिना । देवानामुपकारार्थं श्रुत्वा दैत्यैः पराजितान्
64 // asthidānaṃ kṛtaṃ devi kṛpayā hi dadhīcinā / devānāmupakārārthaṃ śrutvā daityaiḥ parājitān
65 ॥ कपोतार्थं स्वमांसानि शिबिना भूभुजा पुरा । प्रदत्तानि वरारोहे श्येनाय क्षुधिताय वै
65 // kapotārthaṃ svamāṃsāni śibinā bhūbhujā purā / pradattāni varārohe śyenāya kṣudhitāya vai
66 ॥ जीमूतवाहनो राजा पुरासीत्क्षितिमण्डले । तेनापि जीवितं दत्तं पन्नगाय वरानने
66 // jīmūtavāhano rājā purāsītkṣitimaṇḍale / tenāpi jīvitaṃ dattaṃ pannagāya varānane
67 ॥ तस्माद्दयालुना देवि भवितव्यं महीभुजा । शुचावमेध्ये ऽपि शुभे समं वर्षति वारिदः
67 // tasmāddayālunā devi bhavitavyaṃ mahībhujā / śucāvamedhye 'pi śubhe samaṃ varṣati vāridaḥ
68 ॥ चाण्डालपतितौ चन्द्रो ह्लादयेच्च निजैः करैः । तस्मादिमां वरारोहे गृह गोधां सुदुःखिताम्
68 // cāṇḍālapatitau candro hlādayecca nijaiḥ karaiḥ / tasmādimāṃ varārohe gṛha godhāṃ suduḥkhitām
69 ॥ उद्धरिष्ये निजैः पुण्यैर्दैहित्रैर्नाहुषो यथा । विमोहिनीं तिरस्कृत्य गृहगोधामुवाच ह
69 // uddhariṣye nijaiḥ puṇyairdaihitrairnāhuṣo yathā / vimohinīṃ tiraskṛtya gṛhagodhāmuvāca ha
70 ॥ दत्तं दत्तं मया पुण्यं विजयासंभवं तव । गच्छ विष्णुगतांल्लोकान्विधूताशेषकल्मषा
70 // dattaṃ dattaṃ mayā puṇyaṃ vijayāsaṃbhavaṃ tava / gaccha viṣṇugatāṃllokānvidhūtāśeṣakalmaṣā
71 ॥ तद्वाक्यात्सहसा भूप दिव्याभरणभूषिता । विमुच्य देहं तज्जीर्णं गृहगोधासमुद्भवम्
71 // tadvākyātsahasā bhūpa divyābharaṇabhūṣitā / vimucya dehaṃ tajjīrṇaṃ gṛhagodhāsamudbhavam
72 ॥ जगामामन्त्र्य तं भूपं द्योतयन्ती दिशो दश । सीमन्तमिव कुर्वाणा वैष्णवं पदमुद्भुतम्
72 // jagāmāmantrya taṃ bhūpaṃ dyotayantī diśo daśa / sīmantamiva kurvāṇā vaiṣṇavaṃ padamudbhutam
73 ॥ यद्योगिगम्यं हुतभुक्प्रकाशं वरं वरेण्यं परमात्मभूतम् । तम्मादियं चैव शिखिप्रदीपा जगत्प्रकाशाय नृपप्रसूता
73 // yadyogigamyaṃ hutabhukprakāśaṃ varaṃ vareṇyaṃ paramātmabhūtam / tammādiyaṃ caiva śikhipradīpā jagatprakāśāya nṛpaprasūtā