इति श्रीस्कन्दपुराणे रेवाखण्डे शङ्खचूडतीर्थमहिमानुवर्णनो नाम नवनवतितमो ऽध्यायः ॥ RKS अध्याय 100 मार्कण्डेय उवाच: ततो गच्छेत् तु राजेन्द्र पराशरवरोत्तमम् । पराशरो महात्मा च नर्मदायास् तटे शुभे
iti śrīskandapurāṇe revākhaṇḍe śaṅkhacūḍatīrthamahimānuvarṇano nāma navanavatitamo 'dhyāyaḥ || RKS adhyāya 100 mārkaṇḍeya uvāca: tato gacchet tu rājendra parāśaravarottamam / parāśaro mahātmā ca narmadāyās taṭe śubhe
तपश् चचार विपुलं पुत्रार्थं पाण्डुनन्दन । हिमाचलसुता गौरी लक्ष्मीनारायणान्विता
tapaś cacāra vipulaṃ putrārthaṃ pāṇḍunandana / himācalasutā gaurī lakṣmīnārāyaṇānvitā
तोषिता परया भक्त्या नर्मदायोत्तरे तटे । पराशरेण ऋषिणा तस्य तुष्टा वरं ददौ
toṣitā parayā bhaktyā narmadāyottare taṭe / parāśareṇa ṛṣiṇā tasya tuṣṭā varaṃ dadau
देव्य् उवाच: भो भो ऋषिवरश्रेष्ठ तुष्टाहं तव भक्तितः । वरं याचस्व विप्रेन्द्र पराशरमहामते
devy uvāca: bho bho ṛṣivaraśreṣṭha tuṣṭāhaṃ tava bhaktitaḥ / varaṃ yācasva viprendra parāśaramahāmate
पराशर उवाच: यदि तुष्टासि मे देवि यदि देयो वरो मम । पुत्रो मे दीयतां शीघ्रं सर्वशास्त्रविशारदः
parāśara uvāca: yadi tuṣṭāsi me devi yadi deyo varo mama / putro me dīyatāṃ śīghraṃ sarvaśāstraviśāradaḥ
तीर्थं चात्र भवेद् देवि सन्निधानं वरेण तु । लोकोपकारहेत्व् अर्थं स्थीयतां गिरिनन्दिनि
tīrthaṃ cātra bhaved devi sannidhānaṃ vareṇa tu / lokopakārahetv arthaṃ sthīyatāṃ girinandini
पराशराभिधानेन नर्मदादक्षिणे तटे । पराशरवचः श्रुत्वा देवी हिमवतः सुता
parāśarābhidhānena narmadādakṣiṇe taṭe / parāśaravacaḥ śrutvā devī himavataḥ sutā
एवं भवतु ते विप्र इत्युक्त्वान्तरधीयत । पराशरो महात्मा च स्थापयामास पार्वतीम्
evaṃ bhavatu te vipra ityuktvāntaradhīyata / parāśaro mahātmā ca sthāpayāmāsa pārvatīm
शङ्करं स्थापयामास सुरासुरनमस्कृतम् । अर्चितं सर्वदेवानां दानवानां दुरासदम्
śaṅkaraṃ sthāpayāmāsa surāsuranamaskṛtam / arcitaṃ sarvadevānāṃ dānavānāṃ durāsadam
पराशरो महात्मा च कृतार्थो विगतज्वरः । तस्मिंस् तीर्थे तु यो भक्त्या शुचिः प्रयतमानसः
parāśaro mahātmā ca kṛtārtho vigatajvaraḥ / tasmiṃs tīrthe tu yo bhaktyā śuciḥ prayatamānasaḥ
मासे चैत्रे च विख्याते श्रावणे नृपनन्दन । मासि मार्गशिरे चैव शुक्लपक्षे तु सर्वदा
māse caitre ca vikhyāte śrāvaṇe nṛpanandana / māsi mārgaśire caiva śuklapakṣe tu sarvadā
शङ्करं पाण्डवश्रेष्ठ गिरिजां पूजयेत् तथा । अष्टम्यां च चतुर्दश्यां सूर्यपर्वणि सर्वदा
śaṅkaraṃ pāṇḍavaśreṣṭha girijāṃ pūjayet tathā / aṣṭamyāṃ ca caturdaśyāṃ sūryaparvaṇi sarvadā
स्त्रियो वा पुरुषा वापि कामक्रोधविवर्जिताः । तत्र गत्वा शूचौ स्थाने नर्मदादक्षिणे तटे
striyo vā puruṣā vāpi kāmakrodhavivarjitāḥ / tatra gatvā śūcau sthāne narmadādakṣiṇe taṭe
उपोष्य परया भक्त्या व्रतं कुर्युर् महामुने । रात्रौ जागरणं कृत्वा दीपदानं स्वशक्तितः
upoṣya parayā bhaktyā vrataṃ kuryur mahāmune / rātrau jāgaraṇaṃ kṛtvā dīpadānaṃ svaśaktitaḥ
सपत्नीकानुत्तमांश् च शीलश्रद्धासमन्वितान् । पूजयेद् ब्राह्मणान् पार्थ अन्नदानहिरण्मयैः
sapatnīkānuttamāṃś ca śīlaśraddhāsamanvitān / pūjayed brāhmaṇān pārtha annadānahiraṇmayaiḥ
वस्त्रेण च्छत्रदानेन शय्या ताम्बूलभोजनैः । श्राद्धं कार्यं नृपश्रेष्ठ आमश्राद्धं प्रशस्यते
vastreṇa cchatradānena śayyā tāmbūlabhojanaiḥ / śrāddhaṃ kāryaṃ nṛpaśreṣṭha āmaśrāddhaṃ praśasyate
आमं चतुर्गुणं प्रोक्तं ब्राह्मणानां युधिष्ठिर । वेदोक्तेन विधानेन द्विजाः पूज्याः प्रयत्नतः
āmaṃ caturguṇaṃ proktaṃ brāhmaṇānāṃ yudhiṣṭhira / vedoktena vidhānena dvijāḥ pūjyāḥ prayatnataḥ
हस्तमात्रकुशैश् चैव तिलैश् च वाञ्च्छितैर् नृप । विप्रं चोदङ्मुखं चैव आत्मानं दक्षिणामुखम्
hastamātrakuśaiś caiva tilaiś ca vāñcchitair nṛpa / vipraṃ codaṅmukhaṃ caiva ātmānaṃ dakṣiṇāmukham
आमं दर्भेषु निःक्षिप्य इत्युच्चार्य द्विजाग्रतः । प्रेता यान्तु परं लोकं तीर्थस्यास्य प्रभावतः
āmaṃ darbheṣu niḥkṣipya ityuccārya dvijāgrataḥ / pretā yāntu paraṃ lokaṃ tīrthasyāsya prabhāvataḥ
पापं मे प्रशमं यातु यातु वृद्धिः सदा शुभम् । वृद्धिं यातु सदा वंशो ज्ञातिवर्गो द्विजोत्तम
pāpaṃ me praśamaṃ yātu yātu vṛddhiḥ sadā śubham / vṛddhiṃ yātu sadā vaṃśo jñātivargo dvijottama
एवम् उच्चार्य विप्रेन्द्रं देयं पराशराश्रमे । गोभूनीलहिरण्यानि अन्नं वस्त्रं च शक्तितः
evam uccārya viprendraṃ deyaṃ parāśarāśrame / gobhūnīlahiraṇyāni annaṃ vastraṃ ca śaktitaḥ
दातव्यं पाण्डवश्रेष्ठ पराशरवराश्रमे । यः शृणोति नरो भक्त्या सो ऽपि पापैः प्रमुच्यते
dātavyaṃ pāṇḍavaśreṣṭha parāśaravarāśrame / yaḥ śṛṇoti naro bhaktyā so 'pi pāpaiḥ pramucyate