इति श्रीरेवाखण्डे आदिकल्पकथनं द्वितीयो ऽध्यायः ॥ RKS अध्याय 3 युधिष्ठिर उवाच: रेवा ऽवतरणं पुण्यं सङ्गमं लिङ्गमर्चितम् । तीर्थयात्राप्रमाणश् च युगमन्वन्ताराणि च
iti śrīrevākhaṇḍe ādikalpakathanaṃ dvitīyo 'dhyāyaḥ || RKS adhyāya 3 yudhiṣṭhira uvāca: revā 'vataraṇaṃ puṇyaṃ saṅgamaṃ liṅgamarcitam / tīrthayātrāpramāṇaś ca yugamanvantārāṇi ca
पर्वतस्यतु माहात्म्यं तत्र नद्यां यथोचितम् । पर्वकालस्तु देवानां तीर्थे तीर्थे विशेषतः
parvatasyatu māhātmyaṃ tatra nadyāṃ yathocitam / parvakālastu devānāṃ tīrthe tīrthe viśeṣataḥ
पत्तनस्य तु माहात्म्यं तत्र वासं यथोचितम् । भृगोस् तु कीर्तनं पुण्यं ब्रह्महत्याविमोचनम्
pattanasya tu māhātmyaṃ tatra vāsaṃ yathocitam / bhṛgos tu kīrtanaṃ puṇyaṃ brahmahatyāvimocanam
केना ऽवतीर्य कार्येण जम्बूद्वीपे सरिद्वरा । शिवलोकं गता सा तु तन् मे वद महामुने
kenā 'vatīrya kāryeṇa jambūdvīpe saridvarā / śivalokaṃ gatā sā tu tan me vada mahāmune
उक्तानुक्ताश्च यत् किंचित् कथयस्व प्रसादतः । मार्कण्डेय उवाच: श्रूयतां राजराजेन्द्र कथ्यमानं निबोध मे
uktānuktāśca yat kiṃcit kathayasva prasādataḥ / mārkaṇḍeya uvāca: śrūyatāṃ rājarājendra kathyamānaṃ nibodha me
हिरण्यकशिपुश्चासीद् युगे चाद्ये महा ऽसुरः । शिवप्रसादसम्पन्नो ह्यलं मातृबलोत्कटः
hiraṇyakaśipuścāsīd yuge cādye mahā 'suraḥ / śivaprasādasampanno hyalaṃ mātṛbalotkaṭaḥ
निर्जिता देवतास् तेन पलायनपरायणाः । जग्मुः शरणमुद्विग्ना भयार्ता भयविह्वलः
nirjitā devatās tena palāyanaparāyaṇāḥ / jagmuḥ śaraṇamudvignā bhayārtā bhayavihvalaḥ
शङ्खचक्रधरं देवं ससारार्णवतारणम् । शरणश्च प्रपन्नाः स्मो माधवं मधुसूदन
śaṅkhacakradharaṃ devaṃ sasārārṇavatāraṇam / śaraṇaśca prapannāḥ smo mādhavaṃ madhusūdana
अग्निहोत्राश् च वेदाश्च न देवानां च याजनम् । न स्वाध्यायो न यज्ञाश्च न हुतं पितृतर्पणम्
agnihotrāś ca vedāśca na devānāṃ ca yājanam / na svādhyāyo na yajñāśca na hutaṃ pitṛtarpaṇam
व्यावितं दानवैर् दुष्टैर् धर्मकर्म च नाशितम् । एतस्मिन्नन्तरे राजन् विष्णुना प्रभविष्णुना
vyāvitaṃ dānavair duṣṭair dharmakarma ca nāśitam / etasminnantare rājan viṣṇunā prabhaviṣṇunā
दैत्याश्च निहतास् सर्वे नृसिंहवपुषा तु ते । पुनःप्रवर्तते धर्मो देवब्राह्मणयाजनम्
daityāśca nihatās sarve nṛsiṃhavapuṣā tu te / punaḥpravartate dharmo devabrāhmaṇayājanam
क्षयिता दानवास् सर्वे पापकर्म्मरता ऽधमाः । गता तेनैव कार्येण नर्मदा लोकधारिणी
kṣayitā dānavās sarve pāpakarmmaratā 'dhamāḥ / gatā tenaiva kāryeṇa narmadā lokadhāriṇī
स्वारोचिषे ऽन्तरे प्राप्ते आदिकल्पे कृते युगे । अवतारं पुनर्मर्त्ये देवी त्रिदशपूजिता
svārociṣe 'ntare prāpte ādikalpe kṛte yuge / avatāraṃ punarmartye devī tridaśapūjitā
करिष्यति नरश्रेष्ठलोकानां हितकाम्यया । धर्मकर्मरतं ज्ञात्वा मर्त्यं सुरगणार्चितः
kariṣyati naraśreṣṭhalokānāṃ hitakāmyayā / dharmakarmarataṃ jñātvā martyaṃ suragaṇārcitaḥ
मार्कण्डेय उवाच: आसीत्पुरा चक्रवर्ती सोमवंशे पुरूरवाः । शशास पृथिवीं सर्वां यथाशक्रस्त्रिविष्टपम्
mārkaṇḍeya uvāca: āsītpurā cakravartī somavaṃśe purūravāḥ / śaśāsa pṛthivīṃ sarvāṃ yathāśakrastriviṣṭapam
एकदा स नृपश्रेष्ठः सभामध्ये पुरूरवाः । पप्रच्छ ब्राह्मणान् वृद्धान् वृद्धसेवी धृतव्रतः
ekadā sa nṛpaśreṣṭhaḥ sabhāmadhye purūravāḥ / papraccha brāhmaṇān vṛddhān vṛddhasevī dhṛtavrataḥ
यज्ञादिभिर्विना केन मानवाः पापमोहिताः । स्वर्गं प्रापुरुपायेन तन्मे वद यथातथम्
yajñādibhirvinā kena mānavāḥ pāpamohitāḥ / svargaṃ prāpurupāyena tanme vada yathātatham
ब्राह्मणा ऊचुः: आस्ते स्वर्गे महाराज नर्मदा लोकपावनी । अवतारयतां स्वर्गाल्लोकानां पापहारिणीम्
brāhmaṇā ūcuḥ: āste svarge mahārāja narmadā lokapāvanī / avatārayatāṃ svargāllokānāṃ pāpahāriṇīm
तेषां तद्वचनं श्रुत्वा द्विजानां विधृतामनाम् । आराधयामास देवमयुतं साग्रमेव च
teṣāṃ tadvacanaṃ śrutvā dvijānāṃ vidhṛtāmanām / ārādhayāmāsa devamayutaṃ sāgrameva ca
कन्दमूलफलैः शाकैर्जलाहारैस् तथापि सः । शिवभक्तिपरो नित्यं विशुद्धेनान्तरात्मना
kandamūlaphalaiḥ śākairjalāhārais tathāpi saḥ / śivabhaktiparo nityaṃ viśuddhenāntarātmanā
ततस्तुष्टो महादेवो वरं वरय पुत्रक । ददामि ते न सन्देहो यथेष्टं मनसेप्सितम्
tatastuṣṭo mahādevo varaṃ varaya putraka / dadāmi te na sandeho yatheṣṭaṃ manasepsitam
पुरूरवा उवाच: यदि तुष्टो महादेव वरं दातुं ममेच्छसि । हिताय सर्वलोकानाम् अवतारय नर्मदाम्
purūravā uvāca: yadi tuṣṭo mahādeva varaṃ dātuṃ mamecchasi / hitāya sarvalokānām avatāraya narmadām
नवखण्डास् सप्तद्वीपास् त्व् आपगास् सरितः तथा । निमग्नं नरके घोरे जगत्सर्वं मया श्रुतम्
navakhaṇḍās saptadvīpās tv āpagās saritaḥ tathā / nimagnaṃ narake ghore jagatsarvaṃ mayā śrutam
लक्षयोजनपर्य्यन्तं जम्बूद्वीपं निराश्रयम् । न देवास्तृप्तिमायान्ति न मातृपितृमानुषाः
lakṣayojanaparyyantaṃ jambūdvīpaṃ nirāśrayam / na devāstṛptimāyānti na mātṛpitṛmānuṣāḥ
एतच्छ्रुत्वा महादेवो नरदेवस्य भाषितम् । हर उवाच: उवाच दुर्लभं देवैरयाच्यं याच्यते नृप
etacchrutvā mahādevo naradevasya bhāṣitam / hara uvāca: uvāca durlabhaṃ devairayācyaṃ yācyate nṛpa
वरमन्यं प्रयच्छामि वर्जयित्वा तु नर्मदाम् । पुरूरवा उवाच: नान्यं वरं महादेव प्राणत्यागे ऽपि प्रार्थये
varamanyaṃ prayacchāmi varjayitvā tu narmadām / purūravā uvāca: nānyaṃ varaṃ mahādeva prāṇatyāge 'pi prārthaye
ज्ञात्वा तु निश्चयं राज्ञस्तपसोग्रेण साधनम् । आज्ञापिता मेकला सा ऽवतर त्वं सुरेश्वरि
jñātvā tu niścayaṃ rājñastapasogreṇa sādhanam / ājñāpitā mekalā sā 'vatara tvaṃ sureśvari
पुरूरवाविपाकेन मर्त्यलोकहितं कुरु । आज्ञापितागता सा च शिवस्याग्रे व्यवस्थिता
purūravāvipākena martyalokahitaṃ kuru / ājñāpitāgatā sā ca śivasyāgre vyavasthitā
कृताञ्जलिपुटा भूत्वा ममादेशो ऽद्य दीयताम् । हर उवाच: स्वर्गात् प्रयाहि रेवे त्वं मर्त्यलोकं ममाज्ञया
kṛtāñjalipuṭā bhūtvā mamādeśo 'dya dīyatām / hara uvāca: svargāt prayāhi reve tvaṃ martyalokaṃ mamājñayā
पुरूरवस् तपः सत्यं कुरु कल्याणि साम्प्रतम् । नर्मदोवाच: कथमीश निराधारा स्वर्गाद् यास्याम्यहं धराम्
purūravas tapaḥ satyaṃ kuru kalyāṇi sāmpratam / narmadovāca: kathamīśa nirādhārā svargād yāsyāmyahaṃ dharām
ततस्तद्वचनं श्रुत्वा देवदेव उमापतिः । आवाहयामास सर्वानष्टौ कुलनगोत्तमान्
tatastadvacanaṃ śrutvā devadeva umāpatiḥ / āvāhayāmāsa sarvānaṣṭau kulanagottamān
उवाच पर्वतान् देवः कः सरिद्धारणे क्षमः । पर्वता ऊचुः: शतधा भेदम् आयान्ति जलाघातान् महाद्रयः
uvāca parvatān devaḥ kaḥ sariddhāraṇe kṣamaḥ / parvatā ūcuḥ: śatadhā bhedam āyānti jalāghātān mahādrayaḥ
अभाषत ततो विन्ध्यो धर्तुमुत्सहते नदीम् । मम पुत्रः सुरेशाग्र्य त्वत्प्रसादान् न संशयः
abhāṣata tato vindhyo dhartumutsahate nadīm / mama putraḥ sureśāgrya tvatprasādān na saṃśayaḥ
पर्यङ्क इति विख्यातः कन्दर्पदृढविक्रमः । ज्येष्ठः सर्वगणैर् युक्तो मान्यः सर्वमहीभृताम्
paryaṅka iti vikhyātaḥ kandarpadṛḍhavikramaḥ / jyeṣṭhaḥ sarvagaṇair yukto mānyaḥ sarvamahībhṛtām
देवैरपि च दुर्ज्ञेयः शिवायाश् चर्चने रतः । सन्त्येव पर्वतास् सर्वे यद्यपीह महेश्वर
devairapi ca durjñeyaḥ śivāyāś carcane rataḥ / santyeva parvatās sarve yadyapīha maheśvara
तथापि धारणे शक्तः स एवेह न संशयः । अशक्ता विकला वृद्धास् सर्व एव महीधराः
tathāpi dhāraṇe śaktaḥ sa eveha na saṃśayaḥ / aśaktā vikalā vṛddhās sarva eva mahīdharāḥ
अनुज्ञां देहि पर्यङ्कः क्षमस् तां धर्तुम् आपगाम् । अनुज्ञातश् च देवेन पर्यङ्कः स नगोत्तमः
anujñāṃ dehi paryaṅkaḥ kṣamas tāṃ dhartum āpagām / anujñātaś ca devena paryaṅkaḥ sa nagottamaḥ
उवाच धारयिष्ये ऽहं त्वत् प्रसादान् महेश्वर । ततः प्रचलिता देवी मूर्ध्नि पर्यङ्कभूभृत
uvāca dhārayiṣye 'haṃ tvat prasādān maheśvara / tataḥ pracalitā devī mūrdhni paryaṅkabhūbhṛta
जलौघवेगभ्रमणात् सशैलवनकानना । प्लाविता वसुधा सर्वा अकालकलितं जगत्
jalaughavegabhramaṇāt saśailavanakānanā / plāvitā vasudhā sarvā akālakalitaṃ jagat
स्तुता देवगणैः सर्वैस् तदा मेकलकन्यका । मर्यादां वह कल्याणि लोकानां हितकारिणी
stutā devagaṇaiḥ sarvais tadā mekalakanyakā / maryādāṃ vaha kalyāṇi lokānāṃ hitakāriṇī
त्वया व्याप्तम् इदं सर्व त्रैलोक्यं सचराचरम् । ततः संवृतरूपेण शिवाज्ञातश् च मेकला
tvayā vyāptam idaṃ sarva trailokyaṃ sacarācaram / tataḥ saṃvṛtarūpeṇa śivājñātaś ca mekalā
प्रमाणतो योजनानां सहस्राण्येकविंशति । रसातलं सा विविशे तर्पयित्वा पितामहान्
pramāṇato yojanānāṃ sahasrāṇyekaviṃśati / rasātalaṃ sā viviśe tarpayitvā pitāmahān
स्पृश मां त्वं स्वहस्तेन इत्युक्तः स पुरूरवाः । पीत्वा च सलिलं दत्ते पितृभ्यश् च तिलोदकम्
spṛśa māṃ tvaṃ svahastena ityuktaḥ sa purūravāḥ / pītvā ca salilaṃ datte pitṛbhyaś ca tilodakam
अगमन् परमं स्थानं यत् सुरैर् अपि दुर्लभम् । पवित्रं परितस् सर्वं त्रैलोक्यं सचराचरम्
agaman paramaṃ sthānaṃ yat surair api durlabham / pavitraṃ paritas sarvaṃ trailokyaṃ sacarācaram
सेव्यते तेन कार्य्येण नर्मदा सप्तकल्पगा । एतत् ते कथितं राजन्न् आख्यानं च शिवोदितम्
sevyate tena kāryyeṇa narmadā saptakalpagā / etat te kathitaṃ rājann ākhyānaṃ ca śivoditam
वैवस्वतम् इदानीं तु द्वापरान्ते समुद्यते । त्वं राजा भ्रातृभिः सार्द्धं सत्यसंधो दृढव्रतः
vaivasvatam idānīṃ tu dvāparānte samudyate / tvaṃ rājā bhrātṛbhiḥ sārddhaṃ satyasaṃdho dṛḍhavrataḥ
त्रेतायाः प्रथमे पादे गङ्गा भागीरथी स्मृता । अदहत् कपिलश् चास्य पितॄणाम् अयुतानि षट्
tretāyāḥ prathame pāde gaṅgā bhāgīrathī smṛtā / adahat kapilaś cāsya pitṝṇām ayutāni ṣaṭ
मोहिताम् आयया विष्णोर् गता सप्तरसातलम् । एव मन्दाकिनी नाम त्वन्या गङ्गा सरिद्वरा
mohitām āyayā viṣṇor gatā saptarasātalam / eva mandākinī nāma tvanyā gaṅgā saridvarā
मेकलातोयसम्पूर्णास् सागरास् सप्तयन्त्रिताः । तृतीये च तथा पादे अवतीर्णा सरस्वती
mekalātoyasampūrṇās sāgarās saptayantritāḥ / tṛtīye ca tathā pāde avatīrṇā sarasvatī
स्थानेश्वरगता सा तु पुनर्गङ्गा समागमे । गङ्गाकनखले पुण्या गङ्गासागरसङ्गमे
sthāneśvaragatā sā tu punargaṅgā samāgame / gaṅgākanakhale puṇyā gaṅgāsāgarasaṅgame
ऊर्ध्वतीर्थे प्रयागे च वाराणस्यां विशेषतः । प्राची सरस्वती यत्र कुरुक्षेत्रे च पुण्यदा
ūrdhvatīrthe prayāge ca vārāṇasyāṃ viśeṣataḥ / prācī sarasvatī yatra kurukṣetre ca puṇyadā
प्रणष्टे द्वावशादित्ये प्रलये समुपस्थिते । सप्तकल्पक्षये वृत्ते न मृता तेन नर्मदा
praṇaṣṭe dvāvaśāditye pralaye samupasthite / saptakalpakṣaye vṛtte na mṛtā tena narmadā
सरितश् च क्षयं यान्ति गङ्गाद्याश् च सहस्रशः । नर्मदा तिष्ठते देवी सप्तकल्पानुगामिनी
saritaś ca kṣayaṃ yānti gaṅgādyāś ca sahasraśaḥ / narmadā tiṣṭhate devī saptakalpānugāminī
ब्राह्मी सरस्वती मूर्तिवैष्णवी त्रिपथा स्मृता । नर्मदा शाङ्करी मूर्तिर् नद्यस् तिस्रस्त्रिदेवताः
brāhmī sarasvatī mūrtivaiṣṇavī tripathā smṛtā / narmadā śāṅkarī mūrtir nadyas tisrastridevatāḥ
गङ्गा च यमुना चैव सरयूश् च सरस्वती । शतभागा चन्द्रभागा रम्या सिन्धुर् महानदी
gaṅgā ca yamunā caiva sarayūś ca sarasvatī / śatabhāgā candrabhāgā ramyā sindhur mahānadī
इरावती च कपिला नर्मदा सवितस्तिका । दण्डकी गण्डकी चैव घर्घरा च महानदी
irāvatī ca kapilā narmadā savitastikā / daṇḍakī gaṇḍakī caiva ghargharā ca mahānadī
शोणो महानदश् चैव वेदिका च तरङ्गिणी । ब्रह्मवाहा विष्णुवाहा सारङ्गा गौतमी तथा
śoṇo mahānadaś caiva vedikā ca taraṅgiṇī / brahmavāhā viṣṇuvāhā sāraṅgā gautamī tathā
विश्ववाहा धेनुमती अपारा अपरा तथा । वेत्रवती च कुमुदा महातापी पयोष्णिका
viśvavāhā dhenumatī apārā aparā tathā / vetravatī ca kumudā mahātāpī payoṣṇikā
वेणा च दुग्धिका शिप्रा ऽजहासा ऽभ्रमती तथा । कृष्णा भीमरथी चैव तुङ्गभद्रा महानदी
veṇā ca dugdhikā śiprā 'jahāsā 'bhramatī tathā / kṛṣṇā bhīmarathī caiva tuṅgabhadrā mahānadī
गोदावरीति विख्याता गङ्गा सा दक्षिणा स्मृता । नद्यश् चैव तथा चान्यास् सर्वतीर्थानि सागराः
godāvarīti vikhyātā gaṅgā sā dakṣiṇā smṛtā / nadyaś caiva tathā cānyās sarvatīrthāni sāgarāḥ
सर्वास्ताः प्रलयं यान्ति वर्जयित्वा तु कल्पगाम् । गङ्गा किं वर्ण्यते देवी हरेण शिरसा धृता
sarvāstāḥ pralayaṃ yānti varjayitvā tu kalpagām / gaṅgā kiṃ varṇyate devī hareṇa śirasā dhṛtā
गौरी वार्द्धशरीरस्था शिवस्य परमेष्ठिनः । नर्मदा वर्ण्यते देवी सप्तकल्पानुगामिनी
gaurī vārddhaśarīrasthā śivasya parameṣṭhinaḥ / narmadā varṇyate devī saptakalpānugāminī
ते देशाः पर्वताः पुण्यास्ते ग्रामास्ते ऽपि चाश्रमाः । यत्र याता सरिच्छ्रेष्ठा नर्मदा सप्तकल्पगा
te deśāḥ parvatāḥ puṇyāste grāmāste 'pi cāśramāḥ / yatra yātā saricchreṣṭhā narmadā saptakalpagā
त्रिभिः सारस्वतं पुण्यं सप्ताहेन तु यामुनम् । सद्यः पुनाति गाङ्गेयं दर्शनाद् एव नर्मदा
tribhiḥ sārasvataṃ puṇyaṃ saptāhena tu yāmunam / sadyaḥ punāti gāṅgeyaṃ darśanād eva narmadā
रेवातटेषु ये वृक्षाः पतिताः कालपर्यये । नर्मदातोयसंस्पृष्टास् ते ऽपि यान्ति पराङ्गतिम्
revātaṭeṣu ye vṛkṣāḥ patitāḥ kālaparyaye / narmadātoyasaṃspṛṣṭās te 'pi yānti parāṅgatim
रेवाया यत्र कुत्रापि सङ्गमे भरतर्षभ । स्नानं दानं जपो होमः स्वाध्यायः पितृपूजनम्
revāyā yatra kutrāpi saṅgame bharatarṣabha / snānaṃ dānaṃ japo homaḥ svādhyāyaḥ pitṛpūjanam
देवताराधनं दीक्षा न्यासो देहविसर्जनम् । यत् किंचित् क्रियते मर्त्यैस् तद् अनन्तफलं स्मृतम्
devatārādhanaṃ dīkṣā nyāso dehavisarjanam / yat kiṃcit kriyate martyais tad anantaphalaṃ smṛtam
गोसहस्रशतं धेनु महादानानि कृत्स्नशः । वैशाख्याम् अथवा माध्यां कार्त्तिक्यां ग्रहणायने
gosahasraśataṃ dhenu mahādānāni kṛtsnaśaḥ / vaiśākhyām athavā mādhyāṃ kārttikyāṃ grahaṇāyane
विषुवे संक्रमे भानोर् व्यतीपाते च वैधृतौ । दर्शे दिनक्षये वृद्धौ मन्वादिषु युगादिषु
viṣuve saṃkrame bhānor vyatīpāte ca vaidhṛtau / darśe dinakṣaye vṛddhau manvādiṣu yugādiṣu
कल्पादौ च युगादौ च मातापित्रोः क्षये ऽहनि । ओंकारे वा भृगौ क्षेत्रे विशेषाद् उपसङ्गमे
kalpādau ca yugādau ca mātāpitroḥ kṣaye 'hani / oṃkāre vā bhṛgau kṣetre viśeṣād upasaṅgame
रेवायां स्नानदानानि जपहोमार्चनादिकम् । यः कुर्यान् मनुजश्रेष्ठः सो ऽश्वमेधफलं लभेत्
revāyāṃ snānadānāni japahomārcanādikam / yaḥ kuryān manujaśreṣṭhaḥ so 'śvamedhaphalaṃ labhet
ब्रह्महत्यादिभिः पापैर् मुच्यते ना ऽत्र संशय । कुलानां शतम् आगामि समतीतं तथा शतम्
brahmahatyādibhiḥ pāpair mucyate nā 'tra saṃśaya / kulānāṃ śatam āgāmi samatītaṃ tathā śatam
उद्धरेदात्मना सार्द्धं रेवातीर्थावगाहनात् । ग्रामार्द्धं ग्रामम् एकं वा यो दद्यान् नर्मदातटे
uddharedātmanā sārddhaṃ revātīrthāvagāhanāt / grāmārddhaṃ grāmam ekaṃ vā yo dadyān narmadātaṭe
स लभेद् विपुलां लक्ष्मीमत्यन्तफलम् अश्नुते । नर्मदातीरसम्भूतां मृदं मूर्ध्नि बिभर्ति यः
sa labhed vipulāṃ lakṣmīmatyantaphalam aśnute / narmadātīrasambhūtāṃ mṛdaṃ mūrdhni bibharti yaḥ
बिभर्ति मूर्तिम् अर्कस्यतमोनाशाय केवलम् । यत्र यत्र नरः स्नायात् नर्मदाया युधिष्ठिर
bibharti mūrtim arkasyatamonāśāya kevalam / yatra yatra naraḥ snāyāt narmadāyā yudhiṣṭhira
प्राप्नुयाद् अश्वमेधस्य फलम् एतच् छिवोदितम् । नर्मदातोयपानस्य स्नानस्य प्रेक्षणस्य च
prāpnuyād aśvamedhasya phalam etac chivoditam / narmadātoyapānasya snānasya prekṣaṇasya ca
अपि चान्द्रायणशत तुल्यं भवति वा न वा । नर्मदा कीर्तयेद् यस् तु प्रातर् उत्थाय मानवः
api cāndrāyaṇaśata tulyaṃ bhavati vā na vā / narmadā kīrtayed yas tu prātar utthāya mānavaḥ
सप्तजन्मकृतं पापं तत्क्षणाद् एव नश्यति । सङ्गमेन समायुक्ता नर्मदालिङ्गसङ्गता । हयमेधफलं तत्र स्नात्वा शिवपुरं व्रजेत्
saptajanmakṛtaṃ pāpaṃ tatkṣaṇād eva naśyati / saṅgamena samāyuktā narmadāliṅgasaṅgatā / hayamedhaphalaṃ tatra snātvā śivapuraṃ vrajet