॥ इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे स्कन्दतीर्थमाहात्म्यवर्णनं नामैकादशोत्तरशततमो ऽध्यायः ॥ RKV अध्याय 112 श्रीमार्कण्डेय उवाच: ततो गच्छेत्तु राजेन्द्र तीर्थमाङ्गिरसस्य तु । उत्तरे नर्मदाकूले सर्वपापविनाशनम्
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe skandatīrthamāhātmyavarṇanaṃ nāmaikādaśottaraśatatamo 'dhyāyaḥ || RKV adhyāya 112 śrīmārkaṇḍeya uvāca: tato gacchettu rājendra tīrthamāṅgirasasya tu / uttare narmadākūle sarvapāpavināśanam
पुरासीदङ्गिरानाम ब्राह्मणो वेदपारगः । पुत्रहेतोर् युगस्यादौ चचार विपुलं तपः
purāsīdaṅgirānāma brāhmaṇo vedapāragaḥ / putrahetor yugasyādau cacāra vipulaṃ tapaḥ
नित्यं त्रिषवणस्नायी जपन्देवं सनातनम् । पूजयंश्च महादेवं कृच्छ्रचान्द्रायणादिभिः
nityaṃ triṣavaṇasnāyī japandevaṃ sanātanam / pūjayaṃśca mahādevaṃ kṛcchracāndrāyaṇādibhiḥ
द्वादशाब्दे ततः पूर्णे तुतोष परमेश्वरः । वरेण छन्दयामास द्विजम् आङ्गिरसं वरम्
dvādaśābde tataḥ pūrṇe tutoṣa parameśvaraḥ / vareṇa chandayāmāsa dvijam āṅgirasaṃ varam
वव्रे स तु महादेवं पुत्रं पुत्रवतां वरम् । वेदविद्याव्रतस्नातं सर्वशास्त्रविशारदम्
vavre sa tu mahādevaṃ putraṃ putravatāṃ varam / vedavidyāvratasnātaṃ sarvaśāstraviśāradam
देवानां मन्त्रिणं राजन् सर्वलोकेषु पूजितम् । ब्रह्मलक्ष्म्याः सदावासम् अक्षयं चाव्ययं सुतम्
devānāṃ mantriṇaṃ rājan sarvalokeṣu pūjitam / brahmalakṣmyāḥ sadāvāsam akṣayaṃ cāvyayaṃ sutam
तथाभिलषितः पुत्रः सर्वविद्याविशारदः । भविष्यति न सन्देहश्चैवमुक्त्वा ययौ हरः
tathābhilaṣitaḥ putraḥ sarvavidyāviśāradaḥ / bhaviṣyati na sandehaścaivamuktvā yayau haraḥ
वरैर् अङ्गिरसश्चापि बृहस्पतिरजायत । यथाभिलषितः पुत्रो वेदवेदाङ्गपारगः
varair aṅgirasaścāpi bṛhaspatirajāyata / yathābhilaṣitaḥ putro vedavedāṅgapāragaḥ
जाते पुत्रेऽङ्गिरास् तत्र स्थापयामास शङ्करम् । हृष्टतुष्टमना भूत्वा जगामोत्तरपर्वतम्
jāte putre'ṅgirās tatra sthāpayāmāsa śaṅkaram / hṛṣṭatuṣṭamanā bhūtvā jagāmottaraparvatam
तत्र चाङ्गिरसे तीर्थे यः स्नात्वा पूजयेच्छिवम् । सर्वपापविनिर्मुक्तो रुद्रलोकं स गच्छति
tatra cāṅgirase tīrthe yaḥ snātvā pūjayecchivam / sarvapāpavinirmukto rudralokaṃ sa gacchati
अपुत्रो लभते पुत्रमधनो धनमाप्नुयात् । इच्छते यश्च यं कामं स तं लभति मानवः
aputro labhate putramadhano dhanamāpnuyāt / icchate yaśca yaṃ kāmaṃ sa taṃ labhati mānavaḥ