॥ इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे वासवेश्वरतीर्थमाहात्म्यवर्णनं नाम त्रयोविंशत्यधिकद्विशततमो ऽध्यायः ॥ RKV अध्याय 224 मार्कण्डेय उवाच: ततः क्रोशान्तरे पार्थ तीर्थं कोटीश्वरं परम् । यत्र स्नानं च दानं च जपहोमार्चनादिकम् । भक्त्या कृतं नरैस्तत्र सर्वं कोटिगुणं भवेत्
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe vāsaveśvaratīrthamāhātmyavarṇanaṃ nāma trayoviṃśatyadhikadviśatatamo 'dhyāyaḥ || RKV adhyāya 224 mārkaṇḍeya uvāca: tataḥ krośāntare pārtha tīrthaṃ koṭīśvaraṃ param / yatra snānaṃ ca dānaṃ ca japahomārcanādikam / bhaktyā kṛtaṃ naraistatra sarvaṃ koṭiguṇaṃ bhavet
तत्र देवाः सगन्धर्वा ऋषयः सिद्धचारणाः । जलधिं प्रतिगच्छन्ति नर्मदां वीक्षितुं किल
tatra devāḥ sagandharvā ṛṣayaḥ siddhacāraṇāḥ / jaladhiṃ pratigacchanti narmadāṃ vīkṣituṃ kila
मिलिताः कोटिशो राजन्रेवासागरसङ्गमे । विनोदमतुलं दृष्ट्वा रेवार्णवसमागमे
militāḥ koṭiśo rājanrevāsāgarasaṅgame / vinodamatulaṃ dṛṣṭvā revārṇavasamāgame
स्नात्वा शिवं च संस्थाप्य पूजयित्वा महेश्वरम् । कोटीश्वराभिधानं तु स्वस्वभक्त्या विधानतः
snātvā śivaṃ ca saṃsthāpya pūjayitvā maheśvaram / koṭīśvarābhidhānaṃ tu svasvabhaktyā vidhānataḥ
कोटीतीर्थे परां सिद्धिं सम्प्राप्ताः सर्वतोषणात् । तेन तत्पुण्यमतुलं सर्वतीर्थेषु चोत्तमम्
koṭītīrthe parāṃ siddhiṃ samprāptāḥ sarvatoṣaṇāt / tena tatpuṇyamatulaṃ sarvatīrtheṣu cottamam
तत्र तीर्थे तु यत्किंचिच्छुभं वा यदि वाशुभम् । क्रियते नृपशार्दूल सर्वं कोटिगुणं भवेत्
tatra tīrthe tu yatkiṃcicchubhaṃ vā yadi vāśubham / kriyate nṛpaśārdūla sarvaṃ koṭiguṇaṃ bhavet
तत्र तीर्थे तु मार्गस्था ये केचिदृषिसत्तमाः । सिद्धामृतपदं यान्ति पितृलोकं तथोत्तमम्
tatra tīrthe tu mārgasthā ye kecidṛṣisattamāḥ / siddhāmṛtapadaṃ yānti pitṛlokaṃ tathottamam
उत्तरे नर्मदातीरे दक्षिणे चाश्रिताश्च ये । देवलोकं गतास् तत्र इति मे निश्चिता मतिः
uttare narmadātīre dakṣiṇe cāśritāśca ye / devalokaṃ gatās tatra iti me niścitā matiḥ
बिल्वार्कपुष्पैर् धत्तूरकुशकाशप्रसूनकैः । ऋतूद्भवैस्तथान्यैश्च पूजयित्वा महेश्वरम्
bilvārkapuṣpair dhattūrakuśakāśaprasūnakaiḥ / ṛtūdbhavaistathānyaiśca pūjayitvā maheśvaram
नानोपचारैर् विधिवन् मन्त्रपूर्वं युधिष्ठिर । धूपदीपार्धनैवेद्यैस्तोषयित्वा च धूर्जटिम्
nānopacārair vidhivan mantrapūrvaṃ yudhiṣṭhira / dhūpadīpārdhanaivedyaistoṣayitvā ca dhūrjaṭim
शिवलोकमवाप्नोति यावदिन्द्राश्चतुर्दश । पौषकृष्णाष्टमीयोगे विशेषः पूजने स्मृतः
śivalokamavāpnoti yāvadindrāścaturdaśa / pauṣakṛṣṇāṣṭamīyoge viśeṣaḥ pūjane smṛtaḥ
नित्यं च नृपतिश्रेष्ठ चतुर्दश्यष्टमीषु च । शिवमभ्यर्च्य विप्रांश्च भोजयेद् भक्तितो वरान्
nityaṃ ca nṛpatiśreṣṭha caturdaśyaṣṭamīṣu ca / śivamabhyarcya viprāṃśca bhojayed bhaktito varān