॥ इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे दधिस्कन्दमधुस्कन्दतीर्थमाहात्म्यवर्णनं नामैकोनाशीतितमो ऽध्यायः ॥ RKV अध्याय 80 श्रीमार्कण्डेय उवाच: ततो गच्छेत्तु राजेन्द्र नन्दिकेश्वरमुत्तमम् । यत्र सिद्धो महानन्दी तत्ते सर्वं वदाम्यहम्
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dadhiskandamadhuskandatīrthamāhātmyavarṇanaṃ nāmaikonāśītitamo 'dhyāyaḥ || RKV adhyāya 80 śrīmārkaṇḍeya uvāca: tato gacchettu rājendra nandikeśvaramuttamam / yatra siddho mahānandī tatte sarvaṃ vadāmyaham
रेवायां पुरतः कृत्वा पुरा नन्दी गणेश्वरः । तपस्तपञ्जयं कुर्वंस्तीर्थात्तीर्थं जगाम ह
revāyāṃ purataḥ kṛtvā purā nandī gaṇeśvaraḥ / tapastapañjayaṃ kurvaṃstīrthāttīrthaṃ jagāma ha
दधिस्कन्दं मधुस्कन्दं यावत्त्यक्त्वा तु गच्छति । तावत्तुष्टो महादेवो नन्दिनाथमुवाच ह
dadhiskandaṃ madhuskandaṃ yāvattyaktvā tu gacchati / tāvattuṣṭo mahādevo nandināthamuvāca ha
ईश्वर उवाच: भोभोः प्रसन्नो नन्दीश वरं वृणु यथेप्सितम् । तपसा तेन तुष्टो ऽहं तीर्थयात्राकृतेन ते
īśvara uvāca: bhobhoḥ prasanno nandīśa varaṃ vṛṇu yathepsitam / tapasā tena tuṣṭo 'haṃ tīrthayātrākṛtena te
नन्दीश्वर उवाच: न चाहं कामये वित्तं न चाहं कुलसन्ततिम् । मुक्त्वा न कामये कामं तव पादाम्बुजात्परम्
nandīśvara uvāca: na cāhaṃ kāmaye vittaṃ na cāhaṃ kulasantatim / muktvā na kāmaye kāmaṃ tava pādāmbujātparam
कृमिकीटपतङ्गेषु तिर्यग्योनिं गतस्य वा । जन्म जन्मान्तरे ऽप्यस्तु भक्तिस्त्वयि ममाचला
kṛmikīṭapataṅgeṣu tiryagyoniṃ gatasya vā / janma janmāntare 'pyastu bhaktistvayi mamācalā
तथेत्युक्त्वा महादेवः परया कृपया नृप । गृहीत्वा तं करे सिद्धं जगाम निलयं हरः
tathetyuktvā mahādevaḥ parayā kṛpayā nṛpa / gṛhītvā taṃ kare siddhaṃ jagāma nilayaṃ haraḥ
तस्मिंस्तीर्थे तु यः स्नात्वा भक्त्या त्र्यक्षं प्रपूजयेत् । अग्निष्टोमस्य यज्ञस्य फलं प्राप्नोति मानवः
tasmiṃstīrthe tu yaḥ snātvā bhaktyā tryakṣaṃ prapūjayet / agniṣṭomasya yajñasya phalaṃ prāpnoti mānavaḥ
तत्र तीर्थे तु यः स्नात्वा प्राणत्यागं करोति चेत् । शिवस्यानुचरो भूत्वा मोदते कल्पमक्षयम्
tatra tīrthe tu yaḥ snātvā prāṇatyāgaṃ karoti cet / śivasyānucaro bhūtvā modate kalpamakṣayam
ततः कालेन महता जायते विमले कुले । वेदवेदाङ्गतत्त्वज्ञो जीवेच्च शरदां शतम्
tataḥ kālena mahatā jāyate vimale kule / vedavedāṅgatattvajño jīvecca śaradāṃ śatam
एतत्ते कथितं तात तीर्थमाहात्म्यमुत्तमम् । दुर्लभं मर्त्यसंज्ञस्य सर्वपापक्षयंकरम्
etatte kathitaṃ tāta tīrthamāhātmyamuttamam / durlabhaṃ martyasaṃjñasya sarvapāpakṣayaṃkaram