Chapter 139

षष्ट्यब्दानां प्रवक्ष्यामि शुभाशुभमतः शृणु

ṣaṣṭyabdānāṃ pravakṣyāmi śubhāśubhamataḥ śṛṇu

प्रभवे यज्ञकर्माणि विभवे सुखिनो जनाः

prabhave yajñakarmāṇi vibhave sukhino janāḥ

शुक्ले च सर्वशस्यानि प्रमोदेन प्रमोदिताः

śukle ca sarvaśasyāni pramodena pramoditāḥ

प्रजापतौ प्रवृद्धिः स्यादङ्गिरा भोगवर्धनः

prajāpatau pravṛddhiḥ syādaṅgirā bhogavardhanaḥ

श्रीमुखे वर्धते लोको भावे भावः प्रवर्धते

śrīmukhe vardhate loko bhāve bhāvaḥ pravardhate

पूरणो पूरते शक्रो धाता सर्वौषधीकरः

pūraṇo pūrate śakro dhātā sarvauṣadhīkaraḥ

ईश्वरः क्षेम आरोग्यबहुधान्यसुभिक्षदः

īśvaraḥ kṣema ārogyabahudhānyasubhikṣadaḥ

प्रमाथी मध्यवर्षस्तु विक्रमे शस्यसम्पदः

pramāthī madhyavarṣastu vikrame śasyasampadaḥ

वृषो वृष्यति सर्वांश् च चित्रभानुश् च चित्रतां

vṛṣo vṛṣyati sarvāṃś ca citrabhānuś ca citratāṃ

स्वर्भानुः क्षेममारोग्यं तारणे जलदाः शुभाः

svarbhānuḥ kṣemamārogyaṃ tāraṇe jaladāḥ śubhāḥ

पार्थिवे शस्यसम्पत्तिरतिवृष्टिस् तथा जयः

pārthive śasyasampattirativṛṣṭis tathā jayaḥ

सर्वजित्युत्तमा वृष्टिः सर्वधारी सुभिक्षदः

sarvajityuttamā vṛṣṭiḥ sarvadhārī subhikṣadaḥ

विरोधी जलदान् हन्ति विकृतश् च भयङ्करः

virodhī jaladān hanti vikṛtaś ca bhayaṅkaraḥ

खरे भवेत् पुमान् वीरो नन्दने नन्दते प्रजा

khare bhavet pumān vīro nandane nandate prajā

विषयः शत्रुहन्ता च शत्रुरोगादि मर्दयेत्

viṣayaḥ śatruhantā ca śatrurogādi mardayet

ज्वरार्तो मन्मथे लोको दुष्करे दुष्करा प्रजाः

jvarārto manmathe loko duṣkare duṣkarā prajāḥ

दुर्मुखे दुर्मुखो लोको हेमलम्बे न सम्पदः

durmukhe durmukho loko hemalambe na sampadaḥ

संवत्सरो महादेवि विलम्बस्तु सुभिक्षदः

saṃvatsaro mahādevi vilambastu subhikṣadaḥ

विकारी शत्रुकोपाय विजये सर्वदा क्वचित्

vikārī śatrukopāya vijaye sarvadā kvacit

प्लवे प्लवन्ति तोयानि शोभने शुभकृत्प्रजा

plave plavanti toyāni śobhane śubhakṛtprajā

राक्षसे निष्ठुरो लोको विविधन्धान्यमानने

rākṣase niṣṭhuro loko vividhandhānyamānane

सुवृष्टिः पिङ्गले क्वापि काले ह्य् उक्तो धनक्षयः

suvṛṣṭiḥ piṅgale kvāpi kāle hy ukto dhanakṣayaḥ

सिद्धार्थे सिद्ध्यते सर्वं रौद्रे रौद्रं प्रवर्तते

siddhārthe siddhyate sarvaṃ raudre raudraṃ pravartate

दुर्मतौ मध्यमा वृष्टिर्दुन्दुभिः क्षेमधान्यकृत्

durmatau madhyamā vṛṣṭirdundubhiḥ kṣemadhānyakṛt

स्रवन्ते रुधिरोद्गारी रक्ताक्षः क्रोधने जयः

sravante rudhirodgārī raktākṣaḥ krodhane jayaḥ

क्षये क्षीणधनो लोकः षष्टिसंवत्सराणि तु

kṣaye kṣīṇadhano lokaḥ ṣaṣṭisaṃvatsarāṇi tu