Chapter 265

विनायकोपसृष्टानां स्नानं सर्वकरं वदे

vināyakopasṛṣṭānāṃ snānaṃ sarvakaraṃ vade

विनायकः कर्मविघ्नसिद्ध्यर्थं विनियोजितः

vināyakaḥ karmavighnasiddhyarthaṃ viniyojitaḥ

गणानामाधिपत्ये च केशवेशपितामहैः

gaṇānāmādhipatye ca keśaveśapitāmahaiḥ

स्वप्नेवगाहते ऽत्यर्थं जलं मुण्डांश् च पश्यति

svapnevagāhate 'tyarthaṃ jalaṃ muṇḍāṃś ca paśyati

विनायकोपसृष्टस्तु क्रव्यादानधिरोहति

vināyakopasṛṣṭastu kravyādānadhirohati

व्रजमानस् तथात्मानं मन्यते ऽनुगतम्परैः

vrajamānas tathātmānaṃ manyate 'nugatamparaiḥ

विमना विफलारम्भः संसीदत्यनिमित्ततः

vimanā viphalārambhaḥ saṃsīdatyanimittataḥ

कन्या वरं न चाप्नोति न चापत्यं वराङ्गना

kanyā varaṃ na cāpnoti na cāpatyaṃ varāṅganā

आचार्यत्वं श्रोत्रियश् च न शिष्यो ऽध्ययनं लभेत्

ācāryatvaṃ śrotriyaś ca na śiṣyo 'dhyayanaṃ labhet

धनी न लाभमाप्नोति न कृषिञ्च कृषीबलः

dhanī na lābhamāpnoti na kṛṣiñca kṛṣībalaḥ

राजा राज्यं न चाप्नोति स्नपनन्तस्य कारयेत्

rājā rājyaṃ na cāpnoti snapanantasya kārayet

हस्तपुष्याश्वयुक्सौम्ये वैष्णवे भद्रपीठके

hastapuṣyāśvayuksaumye vaiṣṇave bhadrapīṭhake

गौरसर्षपकल्केन साज्येनोत्सादितस्य च

gaurasarṣapakalkena sājyenotsāditasya ca

सर्वौषधैः सर्वगन्धैः प्रलिप्तशिरसस् तथा

sarvauṣadhaiḥ sarvagandhaiḥ praliptaśirasas tathā

चतुर्भिः कलसैः स्नानन्तेषु सर्वौषाधौ क्षिपेत्

caturbhiḥ kalasaiḥ snānanteṣu sarvauṣādhau kṣipet

अश्वस्थानाद्गजस्थानाद्वल्मीकात् सङ्गमाद्ध्रदात्

aśvasthānādgajasthānādvalmīkāt saṅgamāddhradāt

मृत्तिकां रोचनाङ्गन्धङ्गुग्गुलुन्तेषु निक्षिपेत्

mṛttikāṃ rocanāṅgandhaṅguggulunteṣu nikṣipet

सहस्राक्षं शतधारमृषिभिः पावनं कृतम्

sahasrākṣaṃ śatadhāramṛṣibhiḥ pāvanaṃ kṛtam

तेन त्वामभिषिञ्चामि पावमान्यः पुनन्तु ते

tena tvāmabhiṣiñcāmi pāvamānyaḥ punantu te

भगवन्ते वरुणो राजा भगं सूर्यो वृहस्पतिः

bhagavante varuṇo rājā bhagaṃ sūryo vṛhaspatiḥ

भगमिन्द्रश् च वायुश् च भगं सप्तर्षयो ददुः

bhagamindraś ca vāyuś ca bhagaṃ saptarṣayo daduḥ

यत्ते केशेषु दौर्भाग्यं सीमन्ते यच्च मूर्धनि

yatte keśeṣu daurbhāgyaṃ sīmante yacca mūrdhani

ललाटे कर्णयोरक्ष्णोरापस्तद्घ्नन्तु सर्वदा

lalāṭe karṇayorakṣṇorāpastadghnantu sarvadā

दर्भपिञ्जलिमादाय वामहस्ते ततो गुरुः

darbhapiñjalimādāya vāmahaste tato guruḥ

स्नातस्य सार्षपन्तैलं श्रुवेणौडुम्बरेण च

snātasya sārṣapantailaṃ śruveṇauḍumbareṇa ca

जुहुयान्मूर्धनि कुशान् सव्येन परिगृह्य च

juhuyānmūrdhani kuśān savyena parigṛhya ca

मितश् च सम्मितश् चैव तथा शालककण्टकौ

mitaś ca sammitaś caiva tathā śālakakaṇṭakau

कुष्माण्डो राजपुत्रश् च एतैः स्वाहासमन्वितैः

kuṣmāṇḍo rājaputraś ca etaiḥ svāhāsamanvitaiḥ

नामभिर्बलिमन्त्रैश् च नमस्कारसमन्वितैः

nāmabhirbalimantraiś ca namaskārasamanvitaiḥ

दद्याच्चतुष्पथे शूर्पे कुशानास्तीर्य सर्वतः

dadyāccatuṣpathe śūrpe kuśānāstīrya sarvataḥ

कृताकृतांस्तण्डुलांश् च पललौदनमेव च

kṛtākṛtāṃstaṇḍulāṃś ca palalaudanameva ca

मत्स्यान्पङ्कांस्तथैवामान् पुष्पं चित्रं सुरां त्रिधा

matsyānpaṅkāṃstathaivāmān puṣpaṃ citraṃ surāṃ tridhā

मूलकं पूरिकां पूपांस्तथैवैण्डविकास्रजः

mūlakaṃ pūrikāṃ pūpāṃstathaivaiṇḍavikāsrajaḥ

दध्यन्नं पायसं पिष्टं मोदकं गुडमर्पयेत्

dadhyannaṃ pāyasaṃ piṣṭaṃ modakaṃ guḍamarpayet

विनायकस्य जननीमुपतिष्ठेत्ततो ऽम्बिकां

vināyakasya jananīmupatiṣṭhettato 'mbikāṃ

दूर्वासर्षपपुष्पाणां दत्वार्घ्यं पूर्णमञ्जलिं

dūrvāsarṣapapuṣpāṇāṃ datvārghyaṃ pūrṇamañjaliṃ

रूपं देहि यशो देहि सौभाग्यं सुभगे मम

rūpaṃ dehi yaśo dehi saubhāgyaṃ subhage mama

पुत्रं देहि धनं देहि सर्वान् कामांश् च देहि मे

putraṃ dehi dhanaṃ dehi sarvān kāmāṃś ca dehi me

भोजयेद्ब्राह्मणान्दद्याद्वस्त्रयुग्मं गुरोरपि

bhojayedbrāhmaṇāndadyādvastrayugmaṃ gurorapi

विनायकं ग्रहान्प्रार्च्य श्रियं कर्मफलं लभेत्

vināyakaṃ grahānprārcya śriyaṃ karmaphalaṃ labhet