47 ॥ इति श्रीकूर्मपुराणे षट्साहस्त्र्यां संहितायां पूर्वविभागे द्वाविशो ऽध्यायः सूत उवाच क्रोष्टोरेको ऽभवत् पुत्रो वृजिनीवानिति श्रुतिः । तस्य पुत्रो महान् स्वातिरुशद्गुस्तत्सुतो ऽभवत्
47 // iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge dvāviśo 'dhyāyaḥ sūta uvāca kroṣṭoreko 'bhavat putro vṛjinīvāniti śrutiḥ / tasya putro mahān svātiruśadgustatsuto 'bhavat
1 ॥ उशद्गोरभवत् पुत्रो नाम्ना चित्ररथो बली । अथ चैत्ररथिर्लोके शशबिन्दुरिति स्मृतः
1 // uśadgorabhavat putro nāmnā citraratho balī / atha caitrarathirloke śaśabinduriti smṛtaḥ
2 ॥ तस्य पुत्रः पृथुयशा राजाभूद् धर्मतत्परः । पृथुकर्मा च तत्पुत्रस्तस्मात् पृथुजयो ऽभवत्
2 // tasya putraḥ pṛthuyaśā rājābhūd dharmatatparaḥ / pṛthukarmā ca tatputrastasmāt pṛthujayo 'bhavat
3 ॥ पृथुकीर्तिरभूत् तस्मात् पृथुदानस्ततो ऽभवत् । पृथुश्रवास्तस्य पुत्रस्तस्यासीत् पृथुसत्तमः
3 // pṛthukīrtirabhūt tasmāt pṛthudānastato 'bhavat / pṛthuśravāstasya putrastasyāsīt pṛthusattamaḥ
4 ॥ उशना तस्य पुत्रो ऽबूत् सितेषुस्तत्सुतो ऽभवत् । तस्याभूद् रुक्मकवचः परावृत् तस्य सत्तमाः
4 // uśanā tasya putro 'būt siteṣustatsuto 'bhavat / tasyābhūd rukmakavacaḥ parāvṛt tasya sattamāḥ
5 ॥ परावृतः सुतो जज्ञे ज्यामघो लोकविश्रुतः । तस्माद् विदर्भः संजज्ञे विदर्भात् क्रथकैशिकौ
5 // parāvṛtaḥ suto jajñe jyāmagho lokaviśrutaḥ / tasmād vidarbhaḥ saṃjajñe vidarbhāt krathakaiśikau
6 ॥ रोमपादस्तृतीयस्तु बभ्रुस्तस्यात्मजो नृपः । धृतिस्तस्याभवत् पुत्रः संस्तस्तस्याप्यभूत् सुतः
6 // romapādastṛtīyastu babhrustasyātmajo nṛpaḥ / dhṛtistasyābhavat putraḥ saṃstastasyāpyabhūt sutaḥ
7 ॥ संस्तस्य पुत्रो बलवान् नाम्ना विश्वसहस्तु सः । तस्य पुत्रो महावीर्यः प्रजावान् कौशिकस्ततः । अभूत् तस्य सुतो धीमान् सुमन्तुस्तत्सुतो ऽनलः
7 // saṃstasya putro balavān nāmnā viśvasahastu saḥ / tasya putro mahāvīryaḥ prajāvān kauśikastataḥ / abhūt tasya suto dhīmān sumantustatsuto 'nalaḥ
8 ॥ कैशिकस्य सुतश्चेदिश्चैद्यास्तस्याभवन् सुताः । तेषां प्रधानो ज्योतिष्मान् वपुष्मांस्तत्सुतो ऽभवत्
8 // kaiśikasya sutaścediścaidyāstasyābhavan sutāḥ / teṣāṃ pradhāno jyotiṣmān vapuṣmāṃstatsuto 'bhavat
9 ॥ वपुष्मतो बृहन्मेधा श्रीदेवस्तत्सुतो ऽभवत् । तस्य वीतरथो विप्रा रुद्रभक्तो महाबलः
9 // vapuṣmato bṛhanmedhā śrīdevastatsuto 'bhavat / tasya vītaratho viprā rudrabhakto mahābalaḥ
10 ॥ क्रथस्याप्यभवत् कुन्ती वृष्णी तस्याभवत् सुतः । वृष्णेर्निवृत्तिरुत्पन्नो दशार्हस्तस्य तु द्विजाः
10 // krathasyāpyabhavat kuntī vṛṣṇī tasyābhavat sutaḥ / vṛṣṇernivṛttirutpanno daśārhastasya tu dvijāḥ
11 ॥ दशार्हपुत्रोप्यारोहो जीमूतस्तत्सुतो ऽभवत् । जैमूतिरभवद् वीरो विकृतिः परवीरहा
11 // daśārhaputropyāroho jīmūtastatsuto 'bhavat / jaimūtirabhavad vīro vikṛtiḥ paravīrahā
12 ॥ तस्य भीमरथः पुत्रः तस्मान्नवरथो ऽभवत् । दानधर्मरतो नित्यं सम्यक्शीलपरायणः
12 // tasya bhīmarathaḥ putraḥ tasmānnavaratho 'bhavat / dānadharmarato nityaṃ samyakśīlaparāyaṇaḥ
13 ॥ कदाचिन्मृगयां यातो दृष्ट्वा राक्षसमूर्जितम् । दुद्राव महातविष्टो भयेन मुनिपुङ्गवाः
13 // kadācinmṛgayāṃ yāto dṛṣṭvā rākṣasamūrjitam / dudrāva mahātaviṣṭo bhayena munipuṅgavāḥ
14 ॥ अन्वधावत संक्रुद्धो राक्षसस्तं महाबलः । दुर्योधनो ऽग्निसंकाशः शूलासक्तमहाकरः
14 // anvadhāvata saṃkruddho rākṣasastaṃ mahābalaḥ / duryodhano 'gnisaṃkāśaḥ śūlāsaktamahākaraḥ
15 ॥ राजा नवरथो भीत्या नातिदूरादनुत्तमम् । अपश्यत् परमं स्थानं सरस्वत्या सुगोपितम्
15 // rājā navaratho bhītyā nātidūrādanuttamam / apaśyat paramaṃ sthānaṃ sarasvatyā sugopitam
16 ॥ स तद्वेगेन महता संप्राप्य मतिमान् नृपः । ववन्दे शिरसा दृष्ट्वा साक्षाद् देवीं सरस्वतीम्
16 // sa tadvegena mahatā saṃprāpya matimān nṛpaḥ / vavande śirasā dṛṣṭvā sākṣād devīṃ sarasvatīm
17 ॥ तुष्टाव वाग्भिरिष्टाभिर्बद्धाञ्जलिरमित्रजित् । पपात दण्डवद् भूमौ त्वामहं शरणं गतः
17 // tuṣṭāva vāgbhiriṣṭābhirbaddhāñjaliramitrajit / papāta daṇḍavad bhūmau tvāmahaṃ śaraṇaṃ gataḥ
18 ॥ नमस्यामि महादेवीं साक्षाद् देवीं सरस्वतीम् । वाग्देवतामनाद्यन्तामीश्वरीं ब्रह्मचारिणीम्
18 // namasyāmi mahādevīṃ sākṣād devīṃ sarasvatīm / vāgdevatāmanādyantāmīśvarīṃ brahmacāriṇīm
19 ॥ नमस्ये जगतां योनिं योगिनीं परमां कलाम् । हिरण्यगर्भमहिषीं त्रिनेत्रां चन्द्रशेखराम्
19 // namasye jagatāṃ yoniṃ yoginīṃ paramāṃ kalām / hiraṇyagarbhamahiṣīṃ trinetrāṃ candraśekharām
20 ॥ नमस्ये परमानन्दां चित्कलां ब्रह्मरूपिणीम् । पाहि मां परमेशानि भीतं शरणमागतम्
20 // namasye paramānandāṃ citkalāṃ brahmarūpiṇīm / pāhi māṃ parameśāni bhītaṃ śaraṇamāgatam
21 ॥ एतस्मिन्नन्तरे क्रुद्धो राजानं राक्षसेश्वरः । हन्तुं समागतः स्थानं यत्र देवी सरस्वती
21 // etasminnantare kruddho rājānaṃ rākṣaseśvaraḥ / hantuṃ samāgataḥ sthānaṃ yatra devī sarasvatī
22 ॥ समुद्यम्य तदा शूलं प्रवेष्टुं बलदर्पितः । त्रिलोकमातुस्तत्स्थानं शशाङ्कादित्यसंन्निभम्
22 // samudyamya tadā śūlaṃ praveṣṭuṃ baladarpitaḥ / trilokamātustatsthānaṃ śaśāṅkādityasaṃnnibham
23 ॥ तदन्तरे महद् भूतं युगान्तादित्यसन्निभम् । शूलेनोरसि निर्भिद्य पातयामास तं भुवि
23 // tadantare mahad bhūtaṃ yugāntādityasannibham / śūlenorasi nirbhidya pātayāmāsa taṃ bhuvi
24 ॥ गच्छेत्याह महाराज न स्थातव्यं त्वया पुनः । इदानीं निर्भयस्तूर्णं स्थाने ऽस्मिन् राक्षसो हतः
24 // gacchetyāha mahārāja na sthātavyaṃ tvayā punaḥ / idānīṃ nirbhayastūrṇaṃ sthāne 'smin rākṣaso hataḥ
25 ॥ ततः प्रणम्य हृष्टात्मा राजा नवरथः पराम् । पुरीं जगाम विप्रेन्द्राः पुरन्दरपुरोपमाम्
25 // tataḥ praṇamya hṛṣṭātmā rājā navarathaḥ parām / purīṃ jagāma viprendrāḥ purandarapuropamām
26 ॥ स्थापयामास देवेशीं तत्र भक्तिसमन्वितः । ईजे च विविधैर्यज्ञैर्हेमैर्देवीं सरस्वतीम्
26 // sthāpayāmāsa deveśīṃ tatra bhaktisamanvitaḥ / īje ca vividhairyajñairhemairdevīṃ sarasvatīm
27 ॥ तस्य चासीद् दशरथः पुत्रः परमधार्मिकः । देव्या भक्तो महातेजाः शकुनिस्तस्य चात्मजः
27 // tasya cāsīd daśarathaḥ putraḥ paramadhārmikaḥ / devyā bhakto mahātejāḥ śakunistasya cātmajaḥ
28 ॥ तस्मात् करम्भः संभूतो देवरातो ऽभवत् ततः । ईजे स चाश्वमेधेन देवक्षत्रश्च तत्सुतः
28 // tasmāt karambhaḥ saṃbhūto devarāto 'bhavat tataḥ / īje sa cāśvamedhena devakṣatraśca tatsutaḥ
29 ॥ मधुस्तस्य तु दायादस्तस्मात् कुरुवशो ऽभवत् । पुत्रद्वयमभूत् तस्य सुत्रामा चानुरेव च
29 // madhustasya tu dāyādastasmāt kuruvaśo 'bhavat / putradvayamabhūt tasya sutrāmā cānureva ca
30 ॥ अनोस्तु पुरुकुत्सो ऽभूदंशुस्तस्य च रिक्थभाक् । अथांशोः सत्त्वतो नाम विष्णुभक्तः प्रतापवान् । महात्मा दाननिरतो धनुर्वेदविदां वरः
30 // anostu purukutso 'bhūdaṃśustasya ca rikthabhāk / athāṃśoḥ sattvato nāma viṣṇubhaktaḥ pratāpavān / mahātmā dānanirato dhanurvedavidāṃ varaḥ
31 ॥ स नारदस्य वचनाद् वासुदेवार्चनान्वितम् । शास्त्रं प्रवर्तयामास कुण्डगोलादिभिः श्रुतम्
31 // sa nāradasya vacanād vāsudevārcanānvitam / śāstraṃ pravartayāmāsa kuṇḍagolādibhiḥ śrutam
32 ॥ तस्य नाम्ना तु विख्यातं सात्त्वतं नाम शोभनम् । प्रवर्तते महाशास्त्रं कुण्डादीनां हितावहम्
32 // tasya nāmnā tu vikhyātaṃ sāttvataṃ nāma śobhanam / pravartate mahāśāstraṃ kuṇḍādīnāṃ hitāvaham
33 ॥ सात्त्वतस्तस्य पुत्रो ऽभूत् सर्वशास्त्रविशारदः । पुण्यश्लोको महाराजस्तेन वै तत्प्रवर्तितम्
33 // sāttvatastasya putro 'bhūt sarvaśāstraviśāradaḥ / puṇyaśloko mahārājastena vai tatpravartitam
34 ॥ सात्त्वतः सत्त्वसंपन्नः कौशल्यां सुषुवे सुतान् । अन्धकं वै महाभोजं वृष्णिं देवावृधं नृपम् । ज्येष्ठं च भजमानाख्यं धनुर्वेदविदां वरम्
34 // sāttvataḥ sattvasaṃpannaḥ kauśalyāṃ suṣuve sutān / andhakaṃ vai mahābhojaṃ vṛṣṇiṃ devāvṛdhaṃ nṛpam / jyeṣṭhaṃ ca bhajamānākhyaṃ dhanurvedavidāṃ varam
35 ॥ तेषां देवावृधो राजा चचार परमं तपः । पुत्रः सर्वगुणोपेतो मम भूयादिति प्रभुः
35 // teṣāṃ devāvṛdho rājā cacāra paramaṃ tapaḥ / putraḥ sarvaguṇopeto mama bhūyāditi prabhuḥ
36 ॥ तस्य बभ्रुरिति ख्यातः पुण्यश्लोको ऽभवन्नृपः । धार्मिको रूपसंपन्नस्तत्त्वज्ञानरतः सदा
36 // tasya babhruriti khyātaḥ puṇyaśloko 'bhavannṛpaḥ / dhārmiko rūpasaṃpannastattvajñānarataḥ sadā
37 ॥ भजमानस्य सृञ्जय्यां भजमाना विजज्ञिरे । तेषां प्रधानौ विख्यातौ निमिः कृकण एव च
37 // bhajamānasya sṛñjayyāṃ bhajamānā vijajñire / teṣāṃ pradhānau vikhyātau nimiḥ kṛkaṇa eva ca
38 ॥ महाभोजकुले जाता भोजा वैमार्तिकास्तथा । वृष्णेः सुमित्रो बलवाननमित्रः शिनस्तथा
38 // mahābhojakule jātā bhojā vaimārtikāstathā / vṛṣṇeḥ sumitro balavānanamitraḥ śinastathā
39 ॥ अनमित्रादभून्निघ्नो निघ्नस्य द्वौ बभूवतुः । प्रसेनस्तु महाभागः सत्राजिन्नाम चोत्तमः
39 // anamitrādabhūnnighno nighnasya dvau babhūvatuḥ / prasenastu mahābhāgaḥ satrājinnāma cottamaḥ
40 ॥ अनमित्राच्छिनिर्जज्ञे कनिष्ठाद् वृष्णिनन्दनात् । सत्यवान् सत्यसंपन्नः सत्यकस्तत्सुतो ऽभवत्
40 // anamitrācchinirjajñe kaniṣṭhād vṛṣṇinandanāt / satyavān satyasaṃpannaḥ satyakastatsuto 'bhavat
41 ॥ सात्यकिर्युयुधानस्तु तस्यासङ्गो ऽभवत् सुतः । कुणिस्तस्य सुतो धीमांस्तस्य पुत्रो युगन्धरः
41 // sātyakiryuyudhānastu tasyāsaṅgo 'bhavat sutaḥ / kuṇistasya suto dhīmāṃstasya putro yugandharaḥ
42 ॥ माद्रया वृष्णेः सुतो जज्ञे पृश्निर्वै यदुनन्दनः । जज्ञाते तनयौ पृश्नेः श्वफल्कश्चित्रकश्च ह
42 // mādrayā vṛṣṇeḥ suto jajñe pṛśnirvai yadunandanaḥ / jajñāte tanayau pṛśneḥ śvaphalkaścitrakaśca ha
43 ॥ श्वफल्कः काशिराजस्य सुतां भार्यामविन्दत । तस्यामजनयत् पुत्रमक्रूरं नाम धार्मिकम् । उपमङ्गुस्तथा मङ्गुरन्ये च बहवः सुताः
43 // śvaphalkaḥ kāśirājasya sutāṃ bhāryāmavindata / tasyāmajanayat putramakrūraṃ nāma dhārmikam / upamaṅgustathā maṅguranye ca bahavaḥ sutāḥ
44 ॥ अक्रूरस्य स्मृतः पुत्रो देववानिति विश्रुतः । उपदेवश्च पुण्यात्मा तयोर्विश्वप्रमाथिनौ
44 // akrūrasya smṛtaḥ putro devavāniti viśrutaḥ / upadevaśca puṇyātmā tayorviśvapramāthinau
45 ॥ चित्रकस्याभवत् पुत्रः पृथुर्विपृथुरेव च । अश्वग्रीवः सुबाहुश्च सुपार्श्वकगवेषणौ
45 // citrakasyābhavat putraḥ pṛthurvipṛthureva ca / aśvagrīvaḥ subāhuśca supārśvakagaveṣaṇau
46 ॥ अन्धकात् काश्यदुहिता लेभे च चतुरः सुतान् । कुकुरं भजमानं च शुचिं कम्बलबर्हिषम्
46 // andhakāt kāśyaduhitā lebhe ca caturaḥ sutān / kukuraṃ bhajamānaṃ ca śuciṃ kambalabarhiṣam
47 ॥ कुकुरस्य सुतो वृष्णिर्वृष्णेस्तु तनयो ऽभवत् । कपोतरोमा विपुलस्तस्य पुत्रो विलोमकः
47 // kukurasya suto vṛṣṇirvṛṣṇestu tanayo 'bhavat / kapotaromā vipulastasya putro vilomakaḥ
48 ॥ तस्यासीत् तुम्बुरुसखा विद्वान् पुत्रो नलः किल । ख्यायते तस्य नामानुरनोरानकदुन्दुभिः
48 // tasyāsīt tumburusakhā vidvān putro nalaḥ kila / khyāyate tasya nāmānuranorānakadundubhiḥ
49 ॥ स गोवर्धनमासाद्य तताप विपुलं तपः । वरं तस्मै ददौ देवो ब्रह्मा लोकमहेश्वरः
49 // sa govardhanamāsādya tatāpa vipulaṃ tapaḥ / varaṃ tasmai dadau devo brahmā lokamaheśvaraḥ
50 ॥ वंशस्य चाक्षयां कीर्ति गानयोगमनुत्तमम् । गुरोरभ्यधिकं विप्राः कामरूपित्वमेव च
50 // vaṃśasya cākṣayāṃ kīrti gānayogamanuttamam / gurorabhyadhikaṃ viprāḥ kāmarūpitvameva ca
51 ॥ स लब्ध्वा वरमव्यग्रो वरेण्यं वृषवाहनम् । पूजयामास गानेन स्थाणुं त्रिदशपूजितम्
51 // sa labdhvā varamavyagro vareṇyaṃ vṛṣavāhanam / pūjayāmāsa gānena sthāṇuṃ tridaśapūjitam
52 ॥ तस्य गानरतस्याथ भगवानम्बिकापतिः । कन्यारत्नं ददौ देवो दुर्लभं त्रिदशैरपि
52 // tasya gānaratasyātha bhagavānambikāpatiḥ / kanyāratnaṃ dadau devo durlabhaṃ tridaśairapi
53 ॥ तया स सङ्गतो राजा गानयोगमनुत्तमम् । अशिक्षयदमित्रघ्नः प्रियां तां भ्रान्तलोचनाम्
53 // tayā sa saṅgato rājā gānayogamanuttamam / aśikṣayadamitraghnaḥ priyāṃ tāṃ bhrāntalocanām
54 ॥ तस्यामुत्पादयामास सुभुजं नाम शोभनम् । रूपलावण्यसंपन्नां ह्रीमतीमपि कन्यकाम्
54 // tasyāmutpādayāmāsa subhujaṃ nāma śobhanam / rūpalāvaṇyasaṃpannāṃ hrīmatīmapi kanyakām
55 ॥ ततस्तं जननी पुत्रं बाल्ये वयसि शोभनम् । शिक्षयामास विधिवद् गानविद्यां च कन्यकाम्
55 // tatastaṃ jananī putraṃ bālye vayasi śobhanam / śikṣayāmāsa vidhivad gānavidyāṃ ca kanyakām
56 ॥ कृतोपनयनो वेदानधीत्य विधिवद् गुरोः । उद्ववाहात्मजां कन्यां गन्धर्वाणां तु मानसीम्
56 // kṛtopanayano vedānadhītya vidhivad guroḥ / udvavāhātmajāṃ kanyāṃ gandharvāṇāṃ tu mānasīm
57 ॥ तस्यामुत्पादयामास पञ्च पुत्राननुत्तमान् । वीणावादनतत्त्वज्ञान् गानशास्त्रविशारदान्
57 // tasyāmutpādayāmāsa pañca putrānanuttamān / vīṇāvādanatattvajñān gānaśāstraviśāradān
58 ॥ पुत्रैः पौत्रैः सपत्नीको राजा गानविशारदः । पूजयामास गानेन देवं त्रिपुरनाशनम्
58 // putraiḥ pautraiḥ sapatnīko rājā gānaviśāradaḥ / pūjayāmāsa gānena devaṃ tripuranāśanam
59 ॥ ह्रीमती चापि या कन्या श्रीरिवायतलोचना । सुबाहुर्नाम गन्धर्वस्तामादाय ययौ पुरीम्
59 // hrīmatī cāpi yā kanyā śrīrivāyatalocanā / subāhurnāma gandharvastāmādāya yayau purīm
60 ॥ तस्यामप्यभवन् पुत्रा गन्धर्वस्य सुतेजसः । सुषेणवीरसुग्रीवसुभोजनरवाहनाः
60 // tasyāmapyabhavan putrā gandharvasya sutejasaḥ / suṣeṇavīrasugrīvasubhojanaravāhanāḥ
61 ॥ अथासीदभिजित् पुत्रो वीरस्त्वानकदुन्दुभेः । पुनर्वसुश्चाभिजितः संबभूवाहुकः सुतः
61 // athāsīdabhijit putro vīrastvānakadundubheḥ / punarvasuścābhijitaḥ saṃbabhūvāhukaḥ sutaḥ
62 ॥ आहुकस्योग्रसेनश्च देवकश्च द्विजोत्तमाः । देवकस्य सुता वीरा जज्ञिरे त्रिदशोपमाः
62 // āhukasyograsenaśca devakaśca dvijottamāḥ / devakasya sutā vīrā jajñire tridaśopamāḥ
63 ॥ देववानुपदेवश्च सुदेवो देवरक्षितः । तेषां स्वसारः सप्तासन् वसुदेवाय ता ददौ
63 // devavānupadevaśca sudevo devarakṣitaḥ / teṣāṃ svasāraḥ saptāsan vasudevāya tā dadau
64 ॥ वृकदेवोपदेवा च तथान्या देवरक्षिता । श्रीदेवा शान्तिदेवा च सहदेवा सहदेवा च सुव्रता । देवकी चापि तासां तु वरिष्ठाभूत् सुमध्यमा
64 // vṛkadevopadevā ca tathānyā devarakṣitā / śrīdevā śāntidevā ca sahadevā sahadevā ca suvratā / devakī cāpi tāsāṃ tu variṣṭhābhūt sumadhyamā
65 ॥ अग्रसेनस्य पुत्रो ऽभून्न्यग्रोधः कंस एव च । सुभूमी राष्ट्रपालश्च तुष्टिमाञ्छङ्कुरेव च
65 // agrasenasya putro 'bhūnnyagrodhaḥ kaṃsa eva ca / subhūmī rāṣṭrapālaśca tuṣṭimāñchaṅkureva ca
66 ॥ भजमानादबूत् पुत्रः प्रख्यातो ऽसौ विदूरथः । तस्य शूरः शमिस्तस्मात् प्रतिक्षत्रस्ततो ऽभवत्
66 // bhajamānādabūt putraḥ prakhyāto 'sau vidūrathaḥ / tasya śūraḥ śamistasmāt pratikṣatrastato 'bhavat
67 ॥ स्वयंभोजस्ततस्तस्माद् हृदिकः शत्रुतापनः । कृतवर्माथ तत्पुत्रो देवरस्तत्सुतः स्मृतः । स शूरस्तत्सुतो धीमान् वसुदेवो ऽथ तत्सुतः
67 // svayaṃbhojastatastasmād hṛdikaḥ śatrutāpanaḥ / kṛtavarmātha tatputro devarastatsutaḥ smṛtaḥ / sa śūrastatsuto dhīmān vasudevo 'tha tatsutaḥ
68 ॥ वसुदेवावन्महाबाहुर्वासुदेवो जगद्गुरुः । बभूव देवकीपुत्रो देवैरभ्यर्थितो हरिः
68 // vasudevāvanmahābāhurvāsudevo jagadguruḥ / babhūva devakīputro devairabhyarthito hariḥ
69 ॥ रोहिणी च महाभागा वसुदेवस्य शोभना । असूत पत्नी संकर्षं रामं ज्येष्ठं हलायुधम्
69 // rohiṇī ca mahābhāgā vasudevasya śobhanā / asūta patnī saṃkarṣaṃ rāmaṃ jyeṣṭhaṃ halāyudham
70 ॥ स एव परमात्मासौ वासुदेवो जगन्मयः । हलायुधः स्वयं साक्षाच्छेषः संकर्षणः प्रभुः
70 // sa eva paramātmāsau vāsudevo jaganmayaḥ / halāyudhaḥ svayaṃ sākṣāccheṣaḥ saṃkarṣaṇaḥ prabhuḥ
71 ॥ भृगुशापच्छलेनैव मानयन् मानुषीं तनुम् । बभूत तस्यां देवक्यां रोहिण्यामपि माधवः
71 // bhṛguśāpacchalenaiva mānayan mānuṣīṃ tanum / babhūta tasyāṃ devakyāṃ rohiṇyāmapi mādhavaḥ
72 ॥ उमादेहसमुद्भूता योगनिद्रा च कौशीकी । नियोगाद् वासुदेवस्य यशोदातनया ह्यभूत्
72 // umādehasamudbhūtā yoganidrā ca kauśīkī / niyogād vāsudevasya yaśodātanayā hyabhūt
73 ॥ ये चान्ये वसुदेवस्य वासुदेवाग्रजाः सुताः । प्रागेव कंसस्तान् सर्वान् जघान मुनिपुङ्गवाः
73 // ye cānye vasudevasya vāsudevāgrajāḥ sutāḥ / prāgeva kaṃsastān sarvān jaghāna munipuṅgavāḥ
74 ॥ सुषेणश्च तथोदायी भद्रसेनो महाबलः । ऋजुदासो भद्रदासः कीर्तिमानपि पूर्वजः
74 // suṣeṇaśca tathodāyī bhadraseno mahābalaḥ / ṛjudāso bhadradāsaḥ kīrtimānapi pūrvajaḥ
75 ॥ हतेष्वेतेषु सर्वेषु रोहिणी वसुदेवतः । असूत रामं लोकेशं बलभद्रं हलायुधम्
75 // hateṣveteṣu sarveṣu rohiṇī vasudevataḥ / asūta rāmaṃ lokeśaṃ balabhadraṃ halāyudham
76 ॥ जाते ऽथ रामे देवानामादिमात्मानमच्युतम् । असूत देवकी कृष्णं श्रीवत्साङ्कितवक्षसम्
76 // jāte 'tha rāme devānāmādimātmānamacyutam / asūta devakī kṛṣṇaṃ śrīvatsāṅkitavakṣasam
77 ॥ रेवती नाम रामस्य भार्यासीत् सुगुणान्विता । तस्यामुत्पादयामास पुत्रौ द्वौ निशठोल्मुकौ
77 // revatī nāma rāmasya bhāryāsīt suguṇānvitā / tasyāmutpādayāmāsa putrau dvau niśaṭholmukau
78 ॥ षोडशस्त्रीसहस्त्राणि कृष्णस्याक्लिष्टकर्मणः । बभूवुरात्मजास्तासु शतशो ऽथ सहस्त्रशः
78 // ṣoḍaśastrīsahastrāṇi kṛṣṇasyākliṣṭakarmaṇaḥ / babhūvurātmajāstāsu śataśo 'tha sahastraśaḥ
79 ॥ चारुदेष्णः सुचारुश्च चारुवेषो यशोधरः । चारुश्रवाश्चारुयशाः प्रद्युम्नः शङ्ख एव च
79 // cārudeṣṇaḥ sucāruśca cāruveṣo yaśodharaḥ / cāruśravāścāruyaśāḥ pradyumnaḥ śaṅkha eva ca
80 ॥ रुक्मिण्य वासुदेवस्यां महाबलपराक्रमाः । विशिष्टाः सर्वपुत्राणां संबभूवुरिम् सुताः
80 // rukmiṇya vāsudevasyāṃ mahābalaparākramāḥ / viśiṣṭāḥ sarvaputrāṇāṃ saṃbabhūvurim sutāḥ
81 ॥ तान् दृष्ट्वा तनयान् वीरान् रौक्मिणेयाञ्जनार्दनम् । जाम्बवत्यब्रवीत् कृष्णं भार्या तस्य शुचिस्मिता
81 // tān dṛṣṭvā tanayān vīrān raukmiṇeyāñjanārdanam / jāmbavatyabravīt kṛṣṇaṃ bhāryā tasya śucismitā
82 ॥ मम त्वं पुण्डरीकाक्ष विशिष्टं गुणवत्तमम् । सुरेशसदृशं पुत्रं देहि दानवसूदन
82 // mama tvaṃ puṇḍarīkākṣa viśiṣṭaṃ guṇavattamam / sureśasadṛśaṃ putraṃ dehi dānavasūdana
83 ॥ जात्बवत्या वचः श्रुत्वा जगन्नाथः स्वयं हरिः । समारेभे तपः कर्तुं तपोनिधिररिन्दमः
83 // jātbavatyā vacaḥ śrutvā jagannāthaḥ svayaṃ hariḥ / samārebhe tapaḥ kartuṃ taponidhirarindamaḥ
84 ॥ तच्छृणुध्वं मुनिश्रेष्ठा यथासौ देवकीसुतः । दृष्ट्वा लेभे सुतं रुद्रं तप्त्वा तीव्रं महत् तपः
84 // tacchṛṇudhvaṃ muniśreṣṭhā yathāsau devakīsutaḥ / dṛṣṭvā lebhe sutaṃ rudraṃ taptvā tīvraṃ mahat tapaḥ